52-109/2025

U T T A N R Í K I S – O G F I S KI MÁ LA R Á Ð I Ð
TINGANES • P.O. BOX 64 • FO-110 TÓRSHAVN • FAROE ISLANDS
TELEPHONE + 298 35 87 00 • E-MAIL: UFMR@UFMR.FO • Homepage: www.ufmr.fo
Løgtingið
Tinghúsvegur 1-3
100 Tórshavn
Tórshavn, 26. mai 2026
J.nr.: 26/13710-2
Svar frá Bárði á Steig Nielsen, landsstýrismanni, uppá fyrispurning 52-109/2025 frá
Bjarna Kárason Petersen, løgtingsmanni, um støðuna hjá føroyingum í
Persaraflógvanum
Spurningurin var soljóðandi:
1. Hevur landsstýrið eitt yvirlit yvir føroyingar og føroysk reiðarí, ið eru innibyrgd ella á
annan hátt avmarkaði í Persaraflógvanum?
2. Hvat ger landsstýrið fyri at fáa eitt greitt yvirlit yvir føroyingar og føroysk reiðarí, ið
eru innibyrgd í Persaraflógvanum?
3. Arbeiðir landsstýrið við at fáa føroyingar heim á tryggan hátt, og at føroyingar ið eru
verandi í økinum annars eru tryggir?
4. Verður landsstýrið kunnað um og tikið við í uttanríkis- og trygdarpolitiskar avgerðir, ið
verða tiknar, ið viðvíkja stongslinum av Hormuz-sundinum – eitt nú avgerðir frá
danskari síðu um at geva hernaðarlig íkast til hernaðarátøk í økinum?
Til spurningar 1-3
At kalla eingin skipaferðsla hevur verið gjøgnum Hormuz-sundið síðan um mánaðarskiftið
februar-mars. Støðan í økinum broytist frá degi til dags, og ber í sær óvissur fyri tey mongu
skip og sjófólk, sum ikki sleppa úr Hormuz-sundinum orsakað av støðuni.
Uttanríkistænastan samstarvar við danska uttanríkisráðið um mál, sum viðvíkja borgaratænastu
til føroyingar úti í heimi. Í tílíkum málum er meginreglan tann, at borgarar, ið hava tørv á hjálp,
ráðgeving ella øðrum tænastum venda sær beinleiðis til Uttanríkistænastuna ella til danska
uttanríkisráðið. Enn er eingin fyrispurningur um borgaratænastu frá føroyingum í Hormuz-
økinum skrásettur.
Landsstýrið fylgir gongdini í økinum við tí fyri eygað eftir førimuni – og í samstarvi við onnur
lond í líknandi støðu – at kunna veita hjálp og ráðgeving.
Vinnumálaráðið hevur upplýst, at einki skip í føroysku skipaskráunum er í Hormuz-sundinum
ella innanfyri.
Føroyskir myndugleikar hava ikki eitt samlað yvirlit yvir, hvørjum skipum føroysk sjófólk
sigla við, ella hvar ið skip við føroyskum sjófólkum eru stødd.

-- 1 of 2 --

U T T A N R Í K I S - O G F I S K I M Á L A R Á Ð I Ð
Til spurning 4
Landsstýrið fær vanliga kunning um viðkomandi ætlanir hjá donsku stjórnini av uttanríkis-
trygdar- og verjupolitiskum slagi. Lagt er upp til, at skuldi hesin spurningur verðið aktuellur í
mun til støðuna í Hormuz-sundinum, fær landsstýrið kunning.
Uttanríkis- og fiskimálaráðið, 26. mai 2026
Bárður á Steig Nielsen,
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Bjarni Kárason Petersen, løgtingsmaður
Svarari: Bárður á Steig Nielsen, landsstýrismaður í uttanríkis- og fiskivinnumálum
Evni: Støðan hjá føroyingum í Persaraflógvanum
Spurningar:
1. Hevur landsstýrið eitt yvirlit yvir føroyingar og føroysk reiðarí, ið eru
innibyrgd ella á annan hátt avmarkaði í Persaraflógvanum?
2. Hvat ger landsstýrið fyri at fáa eitt greitt yvirlit yvir føroyingar og føroysk
reiðarí, ið eru innibyrgd í Persaraflógvanum?
3. Arbeiðir landsstýrið við at fáa føroyingar heim á tryggan hátt, og at føroyingar
ið eru verandi í økinum annars eru tryggir?
4. Verður landsstýrið kunnað um og tikið við í uttanríkis- og trygdarpolitiskar
avgerðir, ið verða tiknar, ið viðvíkja stongslinum av Hormuz-sundinum – eitt
nú avgerðir frá danskari síðu um at geva hernaðarlig íkast til hernaðarátøk í
økinum?
Viðmerkingar:
Eftir at USA og Ísrael tann 28. februar 2026 framdu eitt umfatandi álop á Iran, sum
hevur elvt til eitt umfatandi stríð landanna millum, hevur iranska tjóðarhirðin stongt
Hormuz-sundið. Orsakað av hesum eru 1500-2000 skip innibyrgd í Persaraflógvanum,
við upp til 35.000 sjófólkum og ferðafólkum umborð (IMO). Fleiri skip eru álopin, og
fólk eru bæði deyð og løstaði í hesum álopum. Skipini eru kringsett av
hernaðarflogførum, dronum og herskipum frá fleiri pørtum. Støðan er sostatt sera
ótrygg og broytist dag fyri dag.
Nógvir føroyingar sigla við altjóða handilsflotanum, eitt nú við Mærsk, og tí kann
hugsast, at fleiri føroyingar eru raktir av stonglinum av Hormuz-sundinum. Dømir eru
um føroyingar, sum eru umborð á skipum í flógvanum, sum hava stúrin avvarðandi
heima í Føroyum.
Føroyar hava sum fremstu ábyrgd at verja og tryggja lív og heilsu hjá okkara íbúgvum,
bæði úti og heima.
Fyri at fáa greiðu á, hvør støðan er hjá teimum føroyingum, ið eru raktir av stongslinum
av Hormuz-sundinum, og hvussu landsstýrið fyriheldur seg til støðuna í økinum annars,
verða hesir spurningar settir.
Á Løgtingi, 13. mai 2026
Bjarni Kárason Petersen

-- 1 of 1 --