52-108/2025

V I N N U M Á L A R Á Ð I Ð
GONGIN 7 • FO-100 TÓRSHAVN •
TELEFON 30 66 00 • E-MAIL: VMR@VMR.FO
Løgtingið
Tinghúsvegur 1-3
100 Tórshavn
Tórshavn, 22. mai 2026
J.nr.: 26/12751
Svar frá Jacob Vestergaard, landsstýrismanni, upp á § 52a-fyrispurning nr. 52-108/2025
frá Fróða Magnussen, løgtingsmanni, um støðuna við MobilePay
Spurningurin var soljóðandi:
1. Kann landsstýrismaðurin greiða frá, hvørjar forðingar eru fyri at brúka MobilePay í
Føroyum, og hvussu tað líður at beina hesar av vegnum?
Svarað verður undir einum:
Eingin beinleiðis løgfrøðilig forðing er fyri at brúka MobilePay-skipanina í Føroyum. Tó hevur
tað víst seg, at tað er ein óbeinleiðis løgfrøðilig forðing fyri, at MobilePay loysnin kann virka í
Føroyum. Felagið, sum eigur MobilePay, Vipps MobilePay, er skrásett í Noregi, sum er eitt
EFTA-land, og felagið kann tí á jøvnum føti við onnur, sum veita elektroniskar gjaldsloysnir,
hava sítt virksemi í Danmark gjøgnum eina deild, sbrt. § 1, stk. 2, í lov om betalinger, sum er
galdandi í Danmark.
Henda áseting er ikki tikin við í gjaldslógina, sum er sett í gildi fyri Føroyar, tí Føroyar eru
hvørki ES- ella EFTA-land. Tí mugu veitarar, sum hava sítt virksemi í Danmark ígjøgnum eina
deild, søkja danska Fíggjareftirlitið um loyvi til at veita hesar tænasturnar í Føroyum.
Ábendingar eru um, at tað sjálvstøðuga loyvið, sum krevst til at kunna veita hesar gjaldsloysnir
í Føroyum, kann hava við sær eyka umsitingarligar og tøkniligar útreiðslur fyri veitararnar, og
ivasamt er, um hesir eru sinnaðir at bera hesar útreiðslurnar fyri at koma inn á tann føroyska
marknaðin.
Vinnumálaráðið er saman við Fíggjareftirlitinum farið undir at kanna, hvussu hesin trupulleikin
kann loysast, so veitarar av gjaldsloysnum fáa atgongd til tann føroyska marknaðin eftir
treytum, sum teir eru sinnaðir at virka undir.
Helst er neyðugt at broyta føroysku gjaldslógina fyri at loysa málið, og kannað verður, hvussu
hetta skal gerast, so fyrimunirnir við at broyta lógina ikki hava avleiðingar fyri tey
vinnurekandi, sum frammanundan virka á hesum øki. Miðað verður eftir, at málið verður loyst
í komandi tingári.
Vinnumálaráðið, 22. mai 2025
Jacob Vestergaard
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Fróði Magnussen, løgtingsmaður
Svarari: Jacob Vestergaard, landsstýrismaður í vinnumálum
Evni: Støðan við MobilePay
Spurningar:
1. Kann landsstýrismaðurin greiða frá, hvørjar forðingarnar eru fyri at brúka
MobilePay í Føroyum, og hvussu tað líður at beina hesar av vegnum?
Viðmerkingar:
Seinastu árini er talgilda gjaldskipanin vorðin ein natúrligur partur av gerandisdegnum
hjá fólki og fyritøkum kring Norðurlond. Í Danmark verður MobilePay brúkt í stóran
mun bæði millum privatpersónar, fyritøkur, feløg og almenn tiltøk, og nógvir
føroyingar kenna skipanina væl frá arbeiði, lestri, ferðing og øðrum uppihaldi
uttanlands.
Føroyingar ferðast nógv til Danmarkar og hini Norðurlondini, og fleiri uppliva tað
sum eina avmarking, at føroyskir bankakundar ikki hava somu atgongd til talgildar
gjaldskipanir sum grannalond okkara. Tað hevði verið ein fyrimunur hjá bæði
privatfólki, vinnulívi og felagsskapum, um møguleiki var hjá føroyingum at nýta
skipanir sum MobilePay á jøvnum føti við onnur í Norðurlondum.
Harumframt hevði ein slík loysn lætt um smærri flytingar millum privatpersónar,
gjaldingar í sambandi við tiltøk, ítrótt, felagsskapir og handil, og hevði gjørt tað
lættari hjá føroyskum brúkarum at virka í einum alsamt meira talgildum og
norðurlendskum gjaldsheimi.
Tað hevur tó verið ført fram, at løgfrøðiligar og fyriskipanarligar forðingar gera, at
føroyskir brúkarar ikki kunnu fáa atgongd til MobilePay. Spyrjarin ynskir tí at fáa
greiðu á, hvørjar hesar forðingar eru, og um landsstýrið sær møguleikar fyri at arbeiða
fyri, at tær verða beindar av vegnum.
Á Løgtingi, 13. mai 2026
Fróði Magnussen

-- 1 of 1 --