52-095/2025

TILFEINGIS- OG VINNUMÁLARÁÐIÐ
M i n is t r y o f F is h e r i e s , I n d u s t r y a n d T r a d e
G o n g i n 7 • P . O . B o x 6 4 • F O - 1 1 0 T ó r s h a v n • F a r o e I s la n d s
T e l . ( + 2 9 8 ) 3 5 3 0 3 0 • t v m r @ t v m r . f o • w w w . t v m r . f o
Løgtingið
Tinghúsvegur 1-3
100 Tórshavn
28. februar 2026
Mál: 26/04656-3
(at tilskila í svari)
Tygara skriv: 52-095/2025
Svar frá Eiriki í Jákupsstovu, landsstýrismanni, upp á § 52a fyrispurning nr. 52-
095/2025 frá Dennis Holm, løgtingsmanni, um bólk 5 í fiskidagaskipanini
Spurningar:
1. Hvussu gongur við arbeiðinum at útinna samtyktina í løgtingsmáli 28/2025?
2. Kann landsstýrismaðurin upplýsa, hvørjum ætlanum arbeitt verður við í hesum
sambandi?
Svar til spurning 1 og 2
Arbeitt hevur verið í eina tíð at gera eina nýggja skipan fyri bátarnar í bólki 5 A og 5 B.
Bulurin í hesum arbeiði er at menna eina skipan, sum tryggjar nøktandi dagar til tey,
sum liva av útróðri, og samstundis er løtt at umsita. Harumframt skal nýggja skipanin
leggja upp fyri, at bólkur 5 B er ein samansettur bólkur, har stórur munur er á
virkseminum hjá bátunum.
Ein partur av hesum arbeiði er m.a. at viðgera, hvat er eitt nøktandi dagatal til bátarnar í
bólki 5 A og 5 B. Í hesum sambandi skal eisini metast um teir leistir, sum vera nevndir í
uppskotinum til samtyktar.
Nú val er útskrivað, verður bíðað við nærri viðgerð, til eitt nýtt landsstýrisfólk er tilnevnt
fyri økið.
Tilfeingis- og vinnumálaráðið, 28. februar 2026
Eirikur í Jákupsstovu
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Dennis Holm, løgtingsmaður
Svarari: Eirikur í Jákupsstovu, landsstýrismaður í tilfeingis- og vinnumálum
Evni: Bólkur 5 í fiskidagaskipanini
Spurningar:
1. Hvussu gongur við arbeiðinum at útinna samtyktina í løgtingsmáli 28/2025?
2. Kann landsstýrismaðurin upplýsa, hvørjum ætlanum arbeitt verður við í
hesum sambandi?
Viðmerkingar:
Ein samanrenning millum viðrák í náttúruni, eitt politisk val um at fylgja tilmælinum
frá Havstovuni við fokus á burðardyggan fiskiskap og góðar fiskaprísir hevur ført við
sær, at tað seinastu mánaðirnar hevur verið nógv virksemi í heimaflotanum, eisini hjá
útróðrarbátunum í bólki 5 í fiskidagaskipanini.
Góða gongdin heldur áfram í januar, og hava bátar í bólki 5 í tonsum fiskað 35%
meiri í januar í ár enn í 2025, og avreiðingarvirðið er góð 57% hægri í januar í ár,
samanborið við januar í 2025.
Góða gongdin í 2025 førdi við sær, at fiskidagarnir hjá bólki 5B vóru uppi um hálvan
oktober í fjør. Hetta førdi eisini við sær, at Løgtingið 18. november samtykti uppskot
til samtyktar um fiskidagar hjá bólki 5.
Løgtingið samtykti eisini at heita á landsstýrismannin um at javnseta bólk 5A og bólk
5B við hinar bólkarnar í fiskidagaskipanini, um at taka upp spurningin um smáar
avreiðingar skulu telja við sum fiskidagar – og um at gera eina serskipan fyri opnar
føroyskar bátar, sum er uttanfyri fiskidagaskipanina.
Nú farið er um hálvan februar er áhugavert at vita, hvussu líður við arbeiðinum.
Á Løgtingi, 17. februar 2025
Dennis Holm

-- 1 of 1 --