52-090/2025

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 23. februar 2026
Mál.: 26/04417
Viðgjørt AE
Tygara skriv: 52-090/2025
Svar til skrivligan fyrispurning nr. 52-090/25 frá Hannu Jensen, løgtingkvinnu, settur
landsstýriskvinnuni í fíggjarmálum, Ruth Vang, um bráðfeingis ferðsluábøtur við Streymin
Fyrispurningurin er soljóðandi:
1. Hvørjar bráðfeingis ferðsluábøtur er ætlanin at fremja við vegamótið landsvegurin við
brúnna um Streymin og innkoyringina til Norðskála, og hvat kosta tær?
2. Hvussu skjótt kunnu hesar bráðfeingis ábøtur fremjast og fáast at virka?
Svar til spurning 1
Arbeitt hevur verið við ymiskum loysnum at loysa ferðslutrupulleikarnar við vegamótið við Brúnna
um Streymin og íbindingarnar við Norðskála og Oyrarbakka.
Ferðslutrygdin eigur at verða sett fremst, og tað er at fegnast um, at Løgtingið hevur raðfest at gera
ferðsluábøtur á staðnum við at marka 300 tús. kr. til endamálið.
Fyri 4 áum síðani varð loyvda ferðin skeltað niður frá 80 km/t til 60 km/t fyri at fáa ferðina niður
fram við íbindingunum báðu megin brúnna. Tað vísir seg tó, at ferðin er ov høg hjá nøkrum
akførum. Bilførarar varnast ikki skeltini ella virða ikki ferðavmarkingarnar.
Neyðugt er at gera annað meira sjónligt átak, ið minnir bilførarar á ikki at koyra ov skjótt. Arbeitt
verður við eini loysn við ferðgáum báðu megin brúnna. Ein ferðgái er eitt elektroniskt
ferðslutrygdartól, sum vísir ferðina hjá akfarinum á einum ljósskelti, við blinki, um koyrt verður ov
skjótt. Ferðgáar verða settir upp við vegir fyri at minka um ferðina hjá akførum. Kanningar vísa, at tá
ferðin verður gjørd sjónlig á henda hátt, laga bilførarar ferðina eftir hesum, og ferðin minkar
munandi.
Svar til spurning 2
Ferðgáarnir eru keyptir, og er ætlanin at seta teir upp sum skjótast. Miðað verður eftir, at skipanin fer
at virka í mars 2026. Játtanin uppá 300 tús. kr. røkkur til hesa ferðslutrygdarskipanina.
Ruth Vang
Landsstýriskvinna

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Hanna Jensen, løgtingskvinna
Svarari: Ruth Vang, landsstýriskvinna í fíggjarmálum
Evni: Bráðfeingis ferðsluábøtur við Streymin
Spurningar:
1. Hvørjar bráðfeingis ferðsluábøtur er ætlanin at fremja við vegamótið
landsvegurin við brúnna um Streymin og innkoyringina til Norðskála, og hvat
kosta tær?
2. Hvussu skjótt kunnu hesar bráðfeingis ábøtur fremjast og fáast at virka?
Viðmerkingar:
Fíggjarárið 2026 er enn ungt, og væntast kann sjálvandi ikki, at allar játtanir eru fult
virknar enn. Sumt virksemi er ætlað at seta í gongd, tá árið er hálvrunnið, okkurt fyrr
og okkurt seinni.
Í broytingaruppskoti til fíggjarlóg fyri 2026 markaði meirilutin til 2. viðgerð 300 tús.
kr. til ferðsluábøtur við Streymin, Eysturoyarmegin. Greitt var tá, at ymsar loysnir á
ferðsluavbjóðingunum í økinum millum Norðskála, Oyrabakka og landsvegin við
brúnna um Streymin verða kannaðar og viðgjørdar, men tó var eingin heildarætlan
prosjekterað ella klár; tørvurin á ábótum var, hóast hetta, heilt stórur.
Tað var tíverri sjón fyri søgn, nú ferðsluóhapp aftur er staðfest á vegamótinum millum
landsvegin við Streymin og innkoyringina við Norðskála, hin 5. februar. Ein kend
støða, har samanstoytur hendir millum akfar, sum koyrir suður eftir landsvegnum og
akfar, sum koyrir út frá Norðskála inn á landsvegin.
Tí er greitt, at tørvur beinanvegin er á markaðu játtanini til bráðfeingis ábøtur á
ferðslutrygdina á hesum staði.
Tí verða hesir spurningar settir.
Á Løgtingi, 11.februar 2026
Hanna Jensen

-- 1 of 1 --