52-084/2025

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 24. februar 2026
J. nr.: 26/03466
Svar uppá fyrispurning nr. 52-084/2025 frá Anniku Olsen, løgtingskvinnu, settur Ruth Vang,
landsstýriskvinnu í fíggjarmálum, um at samráðast í krónum.
Fyrispurningurin er soljóðandi:
1. Verður samráðst í krónum undir sáttmálasamráðingunum?
Svar til fyrispurning nr. 1:
Útgangsstøðið hjá landsstýrinum er kent. Í løgmansrøðuni varð sagt, at útgangsstøðið er, at vit í
størri mun samráðast um krónur.
Fyri framman eru nú sáttmálasamráðingar, har fakfeløgini hvør sær skulu samráðast við
Fíggjarmálaráðið um sín egna sáttmála. Hetta er galdandi fyri øll fakfeløg, eisini tey, sum nú
hava gjørt avtalu um felags lønarkarm. Av tí at samráðingarnar við hesi fakfeløgini ikki eru
byrjaðar enn, er í løtuni ikki møguligt at siga meira um innihaldið og gongdina í samráðingunum.
Tað tænir ikki endamálinum at umrøða samráðingar alment, meðan sáttmálasamráðingarnar eru.
Fíggjarmálaráðið virðir fría samráðingarrættin hjá fakfeløgunum, og samráðingarnar eru í
trúnaði, eins og vanligt er, inntil sáttmáli er undirskrivaður.
Landsstýriskvinnan skal tó viðmerkja, at ein misskiljing tykist vera komin í um tann karm, sum
nú er avtalaður við 12 fakfeløg á almenna arbeiðsmarknaðinum. Henda avtalan bindur –
sjálvandi - ikki onnur fakfeløg enn tey, sum hava undirritað avtaluna.
Tað vanliga hevur verið, at tað fakfelagið, sum samráðist fyrst, leggur støðið. Munurin hesaferð
er, at 12 fakfeløg hava verið við til at leggja støðið. Landsstýrið hevur í avtaluni við tey 12
fakfeløgini bundið seg sjálvt til, at um tað verður ein munur í teimum avtalum, sum verða
gjørdar, skal tað verða grundgivið væl, um hví tað verður gjørt, og tað skal verða gjøgnumskygni
um bæði orsøk og grundarlag.
Tinganes, 24. februar 2026
Ruth Vang
Landsstýriskvinna í fíggjarmálum

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Annika Olsen, løgtingskvinna
Svarari: Ruth Vang, landsstýriskvinna í fíggjarmálum
Evni: Samráðast í krónum
Spurningar:
1. Verður samráðst í krónum undir sáttmálasamráðingunum?
Viðmerkingar:
Nú samráðingarnar eru farnar í gongd á almenna arbeiðsmarknaðinum, er tað
áhugavert at vita, um tað verður framhaldandi samráðst í prosentum, ella um tað eisini
verður samráðst í krónum.
Hendan samgongan setti sær fyri at minka um lønargjónna við m.a. at geva nøkrum
útvaldum bólkum í samfelagnum eitt lønarlyft. Talan var m.a. um námsfrøðingar,
námsfrøðilig hjálparfólk, heilsurøktarar, heilsuhjálparar og hjálparfólk.
Endamálið við lønarlyftinum var at bøta um tann lønarstigan, sum varð settur í gildi
við lønarreforminum frá 1969, sum setti tey, sum starvast innan heilsu- og
umsorganarøkini, niðast í lønarstiganum.
Eftir lønarreformin í 1969 hevur verið samráðst í prosentum, og lønargjógvin er stútt
og støðugt vaksin síðan, inntil lønarlyftið varð givið.
Lønarlyftið, sum samgongan framdi, kostaði landskassanum 47 mió. kr. Fyri at hetta
lønarlyftið ikki verður útholað aftur við framhaldandi at samráðast í prosentum, er tað
áhugavert at vita, um tað verður tikin hædd fyri hesum, nú lønarsamráðingarnar eru
byrjaðar, og tí verður hesin fyrispurningur settur.
Á Løgtingi, 5. februar 2026
Annika Olsen

-- 1 of 1 --