52-082/2025

UTTANRÍKIS- OG MENTAMÁLARÁÐIÐ
Tinganes • FO-100 Tórshavn
Tel. (+298) 35 87 00 • ummr@ummr.fo • www.ummr.fo
Tórshavn, tann 11. februar 2026
J. nr.: 26/03277
Svar
upp á
skrivligan fyrispurning nr. 52-082/2025 eftir § 52 a í Tingskipanini frá Johan Dahl,
løgtingsmanni, um óavgreiddar umsóknir um arbeiðs- og uppihaldsloyvi og uppihaldsloyvi
til makar
Fyrispurningurin er soljóðandi:
1. Hvussu nógvar umsóknir um at endurnýggja arbeiðsloyvi hevur Útlendingastovan til
viðgerðar - skilt sundur á mál eftir Fast-Track skipanini og onnur mál um arbeiðsloyvi?
2. Hvussu nógvar av omanfyri nevndu umsóknum eru óviðgjørdar ávikavist ikki endaliga
avgreiddar?
3. Hvussu nógvar umsóknir um uppihaldslovi til makar ella samlivar hjá útlendingum við
arbeiðs- og uppihaldsloyvi í Føroyum hevur Útlendingastovan, sum í løtuni eru
óviðgjørdar ávikavist ikki endaliga avgreiddar?
4. Metir landsstýriskvinnan Útlendingastovuna hava nóg nógva starvsfólkaorku og
fíggjarliga orku at røkja sínar uppgávur á ein fyrisitingarliga haldgóðan hátt í mun til
málsviðgerðartíðina av málum?
5. Um ikki, hvussu nógv eyka starvsfólk og eyka fíggjarliga orku metir landsstýriskvinnan
Útlendingastovuna hava tørv á fyri at røkja uppgávurnar nøktandi?
6. Hevur landsstýriskvinnan nakrar ítøkiligar ætlanir um átøk at bøta um støðuna hjá
Útlendingastovuni við atliti at arbeiðsbyrðu, fyrisitingarligari góðsku og
avgreiðslutíðum?
Svar til spurning 1
Útlendingastovan upplýsir, at síðan málsviðgerðin í ávísum útlendingamálum varð flutt til
Útlendingastovuna at umsita, hin 1. september 2024, hevur Útlendingastovan, pr. 9. februar 2026,
skrásett 6.151 mál í nýggju málsviðgerðarskipanini. Av hesum eru 1.874 mál framvegis ikki
avgreidd. Útlendingastovan hevur sostatt avgreitt á leið 4.277 mál og í 3.600 av hesum málum átti
málsviðgerðartíðin at verið 30 dagar.

-- 1 of 3 --

UMHVØRVISMÁLARÁÐIÐ
Ministry of Environment
2/3
Stórt trýst hevur verið á at málsviðgera t.d. arbeiðsmál skjótt, og hevur hetta ávirkað raðfestingina
hjá Útlendingastovuni. Harumframt hevur Útlendingastovan uppraðfest at viðgera mál, har
útlendingurin bíðar eftir at sleppa til landið ella at byrja at arbeiða. Hetta hevur havt við sær, at
umsøkjarar, sum rættstundis hava søkt um at leingja sítt loyvi ella sína góðkenning, og sum tí
kunnu halda áfram við somu rættindum í málsviðgerðartíðini, hava bíðað munandi longri eftir
svari í sínum máli.
Yvirlit yvir umsóknir um framleingjan av arbeiðsloyvi – mál í viðgerð, pr. 4. februar 2026:
Fast Track 	ES-lógin 	Vanligt
lønararbeiði, eftir
útlendingalógini
Tilsamans
Framleingjan,
mál í viðgerð
429 	50 	70 	549
Útlendingastovan upplýsir, at ávís fyrivarni skulu takast fyri tølunum.
Útlendingastovan hevur 38 umsóknir um varandi uppihaldsloyvi til arbeiðstakara í viðgerð. Um
ein slík umsókn ikki verður gingin á møti, verður vanliga hugt eftir, um uppihaldsloyvi skal
framleingjast, um tað er neyðugt.
Svar til spurning 2
Útlendingastovan upplýsir, at tað ikki ber til at geva nágreinilig tøl til spurningin um, hvussu
nógvar umsóknir um at endurnýggja arbeiðsloyvi eru ávikavist óviðgjørdar ella ikki avgreiddar.
Orsøkin til hetta er, at øll mál verða sett í viðgerð so skjótt, sum tað er møguligt, tað vil siga, at
Útlendingastovan innleiðandi biður um fyrsta bindandi tilmæli frá donskum myndugleikum.
Útlendingastovan upplýsir, at higartil eru 760 umsóknir um framleingjan av arbeiðsloyvum
avgreiddar.
Svar til spurning 3
Yvirlit yvir samfylgjandi familju, makar ella samlivar – mál í viðgerð:
Hjúnafelagið
o.líkn.
Upprunamál
Samfylgjandi familja 34
Framleingjan
Samfylgjandi familja 89
Varandi
Samfylgjandi familja 5
Tilsamans 	128
Útlendingastovan upplýsir, at 241 umsóknir viðvíkjandi børnum sum samfylgjandi familja eru í
viðgerð, tað eru 55 upprunaloyvi (fyrstu ferð), 176 framleingjanir og 10 varandi uppihaldsloyvi.

-- 2 of 3 --

UMHVØRVISMÁLARÁÐIÐ
Ministry of Environment
3/3
Tað ber ikki til hjá Útlendingastovuni at geva nágreinilig tøl til spurningin um, hvussu nógvar
umsóknir eru ávikavist óviðgjørdar ella ikki avgreiddar. Útlendingastovan upplýsir tó, at hon
hevur hava avgreitt 37 umsóknir frá samfylgjandi familju, hjúnafelagar og makar, meðan 57
umsóknir viðvíkjandi børnum eru avgreiddar.
Svar til spurning 4, 5 og 6
Útlendingamál er danskt málsøki, men sjálv málsviðgerðin av arbeiðs- og uppihaldsloyvum varð,
sum omanfyri nevnt, flutt til Útlendingastovuna at umsita fyri knøppum hálvum øðrum ári síðani.
Atfinningar hava síðani verið um, at málsviðgerðartíðirnar hjá Útlendingastovuni hava verið ov
drúgvar í ávísum málum.
Orsøkin til drúgvu viðgerðartíðinar er samansett. Talan er um eitt økið, sum er undir uppbygging,
bæði fakliga og skipanarliga, og hetta hevur gjørt arbeiðsgongdina tíðarkrevjandi.
Útlendingastovan arbeiðir alsamt við at menna mannagongdir, málsviðgerðarskipanir og fakligar
førleikar, samstundis sum sjálv málsviðgerðin fer fram.
Umframt hetta verður framhaldandi arbeitt við, at fáa skipanina við uppihaldskortum at virka.
Hendan skipan datt av misgáum niður fyri, tá málsviðgerðin varð flutt til Føroyar. Tá hendan
skipan fer at virka, sleppur Útlendingastovan undan at útskriva afturferðarloyvi, hvørja ferð ein
útlendingur við uppihaldsloyvi í Føroyum fer av landinum. Hetta fer at lætta um arbeiðsbyrðuna á
Útlendingastovuni.
Hóast roynt hevur verið at effektivisera arbeiðið á Útlendingastovuni, so hevur tað víst seg, at
Útlendingastovan hevur tørv á størri arbeiðsorku í mun arbeiðsbyrðuna. Útlendingastovan fekk tí
eyka fígging til 2 ársverk á heysti 2025, og er henda fígging framskrivað til 2026. Í framhaldi av
hesum hevur Útlendingastovan nýliga sett eitt skrivstovufólk og ein løgfrøðing í starv afturat.
Umframt hetta er ætlanin í næstum at innføra ómaksgjøld fyri málsviðgerð hjá Útlendingastovuni.
Hetta fer væntandi at gera tað møguligt at seta eini tvey starvsfólk afturat. Eisini er ætlanin at
menna málsviðgerðarskipanina víðari við tí endamáli at rationalisera og automatisera
arbeiðsgongdirnar.
Við hesi betring av arbeiðsorkuni, saman við menning av málsviðgerðarskipanini við tí endamáli
at rationalisera og automatisera arbeiðsgongdirnar, vænti eg, at Útlendingastovan fer at hava
nøktandi starvsfólkaorku til at røkja sínar uppgávur á ein fyrisitingarliga fullgóðan hátt, soleiðis at
avgreiðslutíðirnar styttast.
Uttanríkis- og mentamálaráðið, 11. februar 2026
Sirið Stenberg
landsstýriskvinna

-- 3 of 3 --

Skrivligur fyrispurningur
eftir § 52a í Tingskipanini
Spyrjari: Johan Dahl, løgtingsmaður
Svarari: Sirið Stenberg, landsstýriskvinna í uttanríkis- og mentamálum
Evni: Óavgreiddar umsóknir um arbeiðs- og uppihaldsloyvi og uppihaldsloyvi til
makar
Spurningar:
1. Hvussu nógvar umsóknir um at endurnýggja arbeiðsloyvi hevur
Útlendingastovan til viðgerðar - skilt sundur á mál eftir Fast-Track skipanini
og onnur mál um arbeiðsloyvi?
2. Hvussu nógvar av omanfyri nevndu umsóknum eru óviðgjørdar ávikavist ikki
endaliga avgreiddar?
3. Hvussu nógvar umsóknir um uppihaldslovi til makar ella samlivar hjá
útlendingum við arbeiðs- og uppihaldsloyvi í Føroyum hevur
Útlendingastovan, sum í løtuni eru óviðgjørdar ávikavist ikki endaliga
avgreiddar?
4. Metir landsstýriskvinnan Útlendingastovuna hava nóg nógva starvsfólkaorku
og fíggjarliga orku at røkja sínar uppgávur á ein fyrisitingarliga haldgóðan hátt
í mun til málsviðgerðartíðina av málum?
5. Um ikki, hvussu nógv eyka starvsfólk og eyka fíggjarliga orku metir
landsstýriskvinnan Útlendingastovuna hava tørv á fyri at røkja uppgávurnar
nøktandi?
6. Hevur landsstýriskvinnan nakrar ítøkiligar ætlanir um átøk at bøta um støðuna
hjá Útlendingastovuni við atliti at arbeiðsbyrðu, fyrisitingarligari góðsku og
avgreiðslutíðum?
Viðmerkingar:
Tá Føroyar hava valt at yvirtaka og umsita partar av útlendingaøkinum er avgerandi at
seta neyðuga fíggjarliga og starvsfólkaliga orku av til at røkja uppgávuna til lítar. Uttan
hetta er vandi fyri, at lógarásettar uppgávur ikki verða røktar til fulnar, og at borgarar
og arbeiðsgevarar verða raktir av óneyðugum seinkingum og ótryggleika. Tí verður
hesin fyrispurningur settur.
Á Løgtingi, 2. februar 2026
Johan Dahl

-- 1 of 1 --