52-073/2025

UTTANRÍKIS- OG MENTAMÁLARÁÐIÐ
Tinganes • FO-100 Tórshavn
Tel. (+298) 35 87 00 • ummr@ummr.fo • www.ummr.fo
Tórshavn, tann 31. januar 2026
J. nr.: 26/01779
Svar
upp á
skrivligan fyrispurning nr. 52-073/2025 eftir § 52 a í Tingskipanini frá Bárði á Lakjuni,
løgtingsmanni, um treytir og eftirlit viðvíkjandi útlendingum í Føroyum
Fyrispurningurin er soljóðandi:
1. Eru persónar skrásettir sum verandi í Føroyum uttan galdandi arbeiðs- ella
uppihaldsgrundarlag, og hvat verður ítøkiliga gjørt fyri at tryggja, at slíkir persónar ikki
ólógliga verða verandi í Føroyum?
2. Hvørjar eru treytirnar fyri varandi uppihaldsloyvi (undir hesum áramál og møgulig
inntøkukrøv)? Eru almennar veitingar (ALS, fiskavirkisskipanin) íroknaðar, tá ið krøv um
vikuliga arbeiðstíð og onnur krøv verða gjørd upp?
3. Hvussu nógvir útlendingar eru í fiskavirkisskipanini og í arbeiðsloysis-skipanini?
4. Hvørjar eru treytirnar viðvíkjandi revsiváttan, tá um útlendska arbeiðsmegi ræður?
Svar til spurning 1
Ymiskar reglur og eftirlitsskipanir eru, sum skulu tryggja, at avleiðingar eru av ólógligum
uppihaldi í Føroyum og innan Schengenøkið. Millum annað eru revsireglur í útlendingalógini um
ólógligt uppihald, ólógligt arbeiði og um ólógliga at flyta ein útlending um markið, sonevnt
‘transportøransvar’.
Eingin skrá ella yvirlit eru yvir persónar, sum uppihalda sær í Føroyum. Tað kunnu tí vera
útlendingar, sum eru ólógliga í Føroyum og eru skrásettir í Landsfólkayvirlitinum ella eru her í
landinum uttan at vera skrásettir í Landsfólkayvirlitinum ella í skipanunum hjá
útlendingamyndugleikunum.
Sambært lóg um fólkayvirlit er tað ein treyt fyri at skráseta bústað í Føroyum við komu til landið,
at útlendingurin - um talan ikki er um norðurlendskan ríkisborgara - kann vísa gildugt
uppihaldsloyvi, umframt at meiri enn 3 mánaðir eru eftir av tíðarskeiðinum á uppihaldsloyvinum.

-- 1 of 5 --

UMHVØRVISMÁLARÁÐIÐ
Ministry of Environment
2/5
Uppihalds- og arbeiðsloyvir í Føroyum skulu sum meginregla fáast til vega, áðrenn útlendingurin
kemur til Føroyar. Hóast hesa meginreglu eru fleiri sløg av umsóknum, sum kunnu latast inn,
meðan útlendingurin er staddur í Føroyum við gildugum ferðaloyvi ella ferðaloyvisfríum
uppihaldi. Er útlendingurin ólógliga í Føroyum, tá umsóknin verður latin inn, noktar
Útlendingastovan at viðgera umsóknina, og útlendingurin fær vegleiðing um at fara av landinum
beinanvegin. Fær Útlendingastovan frænir av, at útlendingurin hóast hetta ikki er farin av
landinum, verður málið sent løgregluni, sum hevur til uppgávu at senda útlendingar av landinum,
sum hava ólógligt uppihald. Verður Útlendingastovan varug við, at útlendingurin hevur arbeitt
ólógliga í Føroyum, boðar Útlendingastovan løgregluni frá.
Tá Útlendingastovan í málsviðgerðini gerst varug við, at ein útlendingur er ólógliga í Føroyum, er
tað aloftast tí, at søkt ikki er rættstundis um at leingja uppihaldsloyvið. Uppihaldsloyvir verða
vanliga bert givin fyri í mesta lagi 1 ár í senn, og tí kemur slíkt fyri nakrar ferðir um árið. Av og á
fær Útlendingastovan fráboðan frá kommunum, arbeiðsgevarum ella privatpersónum um
útlendingar við ólógligum uppihaldi ella ólógligum arbeiði í Føroyum. Útlendingastovan sendir tá
løgregluni fráboðanina.
TAKS, Arbeiðs- og brunaeftirlitið og løgreglan samstarva um eftirlit á arbeiðsplássum. Løgreglan
kannar tá, um útlendingarnir á arbeiðsplássunum hava gildugt arbeiðsloyvi til arbeiðið.
Løgreglan hevur heimildir til at biðja persónar í Føroyum um samleikaprógv og prógv fyri
uppihaldsloyvi. Løgreglan kann sostatt í nógvum ymsum samanhangum gerast varug við
útlending, sum ikki/ikki longur er lógliga í Føroyum og senda útlendingin av landinum.
Annars hevur útlendingur, sum kemur til landið, ábyrgdina av, at hann kemur higar lógliga, og at
hann fer av landinum aftur, tá ferðaloyvið, ferðaloyvisfría uppihaldið ella uppihaldsloyvið gongur
út.
Svar til spurning 2
Treytirnar fyri at fáa varandi uppihaldsloyvi eru sum niðanfyri lýst, men í sambandi við arbeiði at
gera nýggja útlendingalóg fyri Føroyar verður arbeitt við at herða krøvini fyri at fáa varandi
uppihaldsloyvi.
Varandi uppihaldsloyvi kann eftir umsókn latast útlendingi, sum hevur búð lógliga í Føroyum
longur enn tey seinastu trý árini, um útlendingurin í hesum tíðarskeiðinum hevur havt
uppihaldsloyvi við atliti at varandi uppihaldi í Føroyum. Tað eru m.a. uppihaldsloyvir eftir
reglunum um friðskjól og familjusameining. Víst verður til § 11, stk. 3 í útlendingalógini.
Er útlendingurin revsaður ella hevur størri skuld til tað almenna enn 97.436,38 kr. (2026-støði)
kann viðkomandi tó ikki fáa varandi loyvi, uttan so at útlendingurin hevur gjørt avtalu um at rinda
skuldina aftur og heldur hesa avtaluna. Víst verður til § 11, stk. 5 í útlendingalógini.
Tað er eisini ein grundleggjandi treyt, at útlendingurin framvegis lýkur treytirnar fyri sínum
upprunaliga uppihaldsloyvi.
Í § 11, stk. 4 í útlendingalógini er heimild til, at varandi uppihaldsloyvir eftir umsókn kunnu latast
útlendingum í øðrum førum um so er, at týðandi fyrilit tala fyri hesum. Ásetingarnar um, at
útlendingurin ikki má vera revsaður ella hava størri skuld til tað almenna, er tó eisini galdandi í
slíkum førum.

-- 2 of 5 --

UMHVØRVISMÁLARÁÐIÐ
Ministry of Environment
3/5
Tað hevur verið føst siðvenja í málsviðgerðini hjá útlendingamyndugleikunum í nógv ár, at
útlendingar, ið koma higar at arbeiða, og samfylgjandi familja teirra, sum hava búð lógliga í
Føroyum longur enn seinastu 7 árini, í høvuðsheitum á sama grundarlagi eftir umsókn kunnu fáa
varandi uppihaldsloyvi í Føroyum, um so er, at tey í sonevndari integratiónssamrøðu kunnu vísa
á, at tey hava tilognað sær føroyskan málkunnleika umframt vitan um føroysku mentanina og
samfelagið. Varandi uppihaldsloyvi verður tá latið við heimild í § 11, stk. 4 í útlendingalógini.
Siðvenjan er upprunaliga komin í lag eftir ynski frá Føroya Landsstýri, tí áðrenn hetta høvdu
útlendingar við arbeiðsloyvi og samfylgjandi familja teirra ikki møguleika at fáa varandi
uppihaldsloyvi. Tað er eisini í hesum málum ein grundleggjandi treyt, at útlendingurin framvegis
lýkur treytirnar fyri sínum upprunaliga uppihaldsloyvi.
Viðvíkjandi inntøkutreytum
Tað er ikki ein treyt fyri at fáa varandi uppihaldsloyvi, at útlendingurin ella herbúgvandi persónurin
(tilvísingin) hevur eina ávísa inntøku. Hinvegin eru ymiskar treytir um at kunna uppihalda sær
sjálvum og familju sínari fíggjarliga alt eftir, um útlendingurin, ið søkir um varandi uppihaldsloyvi,
frammanundan hevur uppihaldsloyvi eftir reglunum um familjusameining, arbeiðsloyvi ella sum
samfylgjandi familja. Hesar treytirnar skulu sum áður nevnt framvegis vera loknar, um varandi
uppihaldsloyvi skal latast útlendinginum.
Viðvíkjandi familjusameining
Ein útlendingur, sum ikki er norðurlendingur ella hevur friðskjól í Føroyum, og sum hevur havt
varandi loyvi í Føroyum longur enn seinastu trý árini, skal átaka sær og skjalprógva at hava førleika
til at uppihalda sær og sínum hjúnafelaga ella samliva fíggjarliga, um hjúnafelagin ella samlivin
skal fáa uppihaldsloyvi eftir reglunum um familjusameining. Hendan treytin skal framvegis vera
lokin, tá hjúnafelagin ella samlivin eftir trimum árum søkir um at fáa varandi uppihaldsloyvi.
Ein útlendingur, sum ikki er norðurlendingur ella hevur friðskjól í Føroyum, og sum hevur havt
varandi loyvi í Føroyum longur enn tey seinastu trý árini, skal bert í ávísum førum skjalprógva at
hava førleika til at fíggjarliga uppihalda sær og sínum barni, um barnið skal fáa uppihaldsloyvi
eftir reglunum um familjusameining. Er treytin sett áður, so skal hendan treytin framvegis vera
lokin, tá barnið eftir trimum árum søkir um at fáa varandi uppihaldsloyvi.
Ein føroyingur skal eisini átaka sær og skjalprógva at hava førleika til at uppihalda sær og sínum
útlendska foreldri, ið er yvir 60 ár, fíggjarliga, um foreldrið skal fáa uppihaldsloyvi eftir reglunum
um familjusameining. Hendan treytin skal framvegis vera lokin, tá foreldrið søkir um at fáa varandi
uppihaldsloyvi.
Fær útlendingurin, við uppihaldsloyvi eftir reglunum um familjusameining í omanfyri nevndu
førunum, forsorg frá tí almenna, kann uppihaldsloyvið verða tikið frá viðkomandi. Arbeiðsloysis-
og fiskavirkisskipanirnar eru arbeiðsloysistryggingar, sum eisini útlendingurin og arbeiðsgevari
hansara rinda til. Útgjald úr hesum skipanum er tí ikki forsorg. Stuðul til lesandi og annað tílíkt er
heldur ikki forsorg.
Viðvíkjandi arbeiðsloyvi
Grundleggjandi treytirnar fyri at fáa uppihaldsloyvi grundað á arbeiði í Føroyum eru, at talan skal
vera um fulltíðararbeiði, lønar- og setanartreytirnar skulu vera vanligar eftir føroyskum
viðurskiftum og útlendingurin skal kunna uppihalda sær sjálvum fíggjarliga. Fær útlendingurin
forsorg frá tí almenna, kann uppihaldsloyvið verða tikið frá viðkomandi. Tá Útlendingastovan í
málum um at leingja arbeiðsloyvi skal meta um, hvørt útlendingurin hetta seinasta loyvisskeiðið

-- 3 of 5 --

UMHVØRVISMÁLARÁÐIÐ
Ministry of Environment
4/5
hevur fingið røttu lønina, verður lønarinntøka frá arbeiðsgevaranum tikin við í metingina. Hartil
verður barsilsútgjald, sjúkradagpeningur, og útgjald úr fiskavirkisskipanini ella
Trygdargrunninum tikið við í metingina, tí talan er tá ikki um forsorg, men um útgjøld fyri mista
arbeiðsinntøku vegna barnsburð, sjúku ella væntandi rávøru. Fær útlendingurin útgjald úr
arbeiðsloysisskipanini merkir tað, at grundarlagið fyri uppihaldsloyvinum, t.e. starvið, er burtur,
og uppihaldsloyvið kann tí verða tikið frá viðkomandi.
Serligar avtalur og reglur eru harafturat um sonevnd hálvprofessionel ítróttarfólk, ES-skipan, Fast
Track-skipan, sum í størri ella minni mun áseta reglur ella mannagongdir, ið víkja frá
grundleggjandi treytunum ella áseta nærri treytir fyri at nýta hesar serskipanir. ES-borgarar kunnu
sostatt arbeiða 30 tímar um vikuna og ítróttarfólk arbeiða hálva tíð. Lønar- og setanartreytirnar
skulu tó framvegis verða vanligar eftir føroyskum viðurskiftum, og útlendingurin skal kunna
uppihalda sær sjálvum fíggjarliga.
Svar til spurning 3
Arbeiðsloysisskipanin vísir í svari til mín á, at tað eru ymisk sløg av arbeiðs- og uppihaldsloyvum,
og rætturin til eitt nú almannaveitingar og arbeiðsloysisstuðul er ymiskur alt eftir, hvat slag av
arbeiðs- ella uppihaldsloyvi ein útlendingur hevur.
Ein aðalregla, fyri at hava rætt til vanligan arbeiðsloysisstuðul frá ALS, er, at persónur er tøkur.
Hetta merkir m.a. at persónurin er sinnaður og seinast dagin eftir, at arbeiði verður ávíst, kann
átaka sær eitt og hvørt arbeiði, ávíst av arbeiðsloysisskipanini, og sum viðkomandi hevur fakligan
førleika til.
Útlendingar við staðbundnum ella tíðaravmarkaðum uppihaldsloyvi – eitt nú eftir Fast Track-
skipanini – lúka ikki treytirnar um at vera tøkir, tí arbeiðs-/uppihaldsloyvið hjá teimum er knýtt at
einum ávísum arbeiði/arbeiðsgevara, og loyvir ikki, at teir fara til arbeiðis hjá øðrum arbeiðsgevara
við stuttum varsli. Tað krevur broytt arbeiðsloyvi.
Av hesi orsøk er talið av útlendingum í vanligu arbeiðsloysisskipanin sera avmarkað. Í dag eru tað
22 persónar, sum ikki eru danskir ríkisborgarar, í vanligu arbeiðsloysisskipanini. Talan er um aðrar
norðurlendingar, flóttar úr Ukraina og so nakrar útlendingar, sum hava varandi uppihaldsloyvi í
Føroyum – eitt nú tí tey hava fingið familjusamanføring í Føroyum.
Í fiskavirkisskipanini eru treytirnar og støðan øðrvísi. Har kunnu útlendingar við
staðbundnum/tíðaravmarkaðum arbeiðs-/uppihaldsloyvi fáa innivist og hava rætt til
arbeiðsloysistuðul, um ikki nóg mikið av arbeiði er til teirra á fiskavirkinum, teir eru knýttir at.
Arbeiða teir færri enn 32 tímar eina viku, so hava teir rætt til arbeiðsloysisstuðul upp til 32 tímar
um vikuna.
Hetta hava teir rætt til, hóast tað er ein treyt fyri at fáa arbeiðs-/uppihaldslovyi í Føroyum, at
viðkomandi hevur eitt fulltíðarstarv, tá viðkomandi kemur til Føroyar at arbeiða. Fulltíðarstarv er
vanliga 40 tímar um vikuna. Fyri ES-borgarar er kravið til tal av tímum nakað lægri enn fyri
triðjalandsborgarar.
Arbeiðsloysisskipanin upplýsir, at av teimum 985 persónunum, sum eru knýttir at
fiskavirkisskipanin í dag, eru 437 (44%) ríkisborgarar í øðrum landi enn í Føroyum/Danmark.

-- 4 of 5 --

UMHVØRVISMÁLARÁÐIÐ
Ministry of Environment
5/5
Fyri alt árið 2025 vóru samanlagt – ikki øll samstundis – 1.464 fólk knýtt at fiskavirkisskipanini,
og av teimum vóru 647 (44%) ríkisborgarar í øðrum landi enn í Føroyum/Danmark.
Svar til spurning 4
Eingin treyt er um, at útlendskir arbeiðstakarar skulu útvega revsiváttan í sambandi við, at teir
søkja arbeiði í Føroyum, men frá politiskari síðu er semja um, at reglur skulu ásetast um, at
arbeiðsgevarar her á landi, sum seta útlendingar í starv, skulu seta krav til útlendskar arbeiðstakarar
um m.a. at útvega revsiváttan í sambandi við starvssetanina.
Uttanríkis- og mentamálaráðið, tann 31. januar 2026
Sirið Stenberg
landsstýriskvinna

-- 5 of 5 --

Skrivligur fyrispurningur
eftir § 52a í Tingskipanini
Spyrjari: Bárður á Lakjuni, løgtingsmaður
Svarari: Sirið Stenberg, landsstýriskvinna í uttanríkis- og mentamálum
Evni: Treytir og eftirlit viðvíkjandi útlendingum í Føroyum
Spurningar:
1. Eru persónar skrásettir sum verandi í Føroyum uttan galdandi arbeiðs- ella
uppihaldsgrundarlag, og hvat verður ítøkiliga gjørt fyri at tryggja, at slíkir
persónar ikki ólógliga verða verandi í Føroyum?
2. Hvørjar eru treytirnar fyri varandi uppihaldsloyvi (undir hesum áramál og
møgulig inntøkukrøv)? Eru almennar veitingar (ALS,
fiskavirkisskipanin) íroknaðar, tá ið krøv um vikuliga arbeiðstíð og onnur krøv
verða gjørd upp?
3. Hvussu nógvir útlendingar eru í fiskavirkisskipanini og í arbeiðsloysis-
skipanini?
4. Hvørjar eru treytirnar viðvíkjandi revsiváttan, tá um útlendska arbeiðsmegi
ræður?
Viðmerkingar:
Eingin ivi er um, at útlendska arbeiðsmegin eigur sín stóra lut í vinnuliga og fíggjarliga
framburðinum seinnu árini, og á tann hátt ber til at siga, at snarskipanin – Fast Track-
skipanin – hevur riggað. Hinvegin, so síggja og merkja vit øðrvísi og størri broytingar
í føroyska samfelagnum, enn vit áður hava sæð. Broytingar, sum eru elvdar til av
møtinum millum ymisk mál og rættiliga ymiskar mentanir.
Vit kunnu og eiga av røttum at spyrja, hvussu nógv vælferðarsamfelag okkara megnar
at bera av eyka byrðum, áðrenn skipanirnar byrja at ridla og kanska enntá hokna.
Spurningurin er, um vit eiga at umhugsa at broyta mannagongdir og seta størri krøv,
harðari treytir og betra um eftirlitið, tá tað um útlendska arbeiðsmegi og tilflytarar
ræður.
Vit síggja avleiðingar av tilflytingini ymsastaðni í skipanum okkara, m.a. í
fólkaskúlanum, á barnaansingarøkinum og tíverri eisini í virkseminum hjá
barnaverndunum kring landið. Men tað tykist tó ikki at vera nóg stór vitan um vavið av
tilflytingini til Føroya. Undirritaði metir, at Løgtingið hevur brúk fyri greiðum tølum
og greiðum svarum um tilflytingina, soleiðis at vit á haldgóðum grundarlagi kunnu
leggja ein útlendingapolitikk, sum hevur til endamáls at lata eftirkomarum okkara eitt
gott, trygt og frælst vælferðarsamfelag í arv, og eitt samfelag, sum megnar at taka væl
ímóti og lofta tilflytarum á skilabesta hátt.

-- 1 of 2 --

Fyri at fáa greiði á nøkrum viðurskiftum viðvíkjandi treytum og eftirliti, tá um
útlendska arbeiðsmegi og tilflytarar í Føroyum ræður, verða hesir spuningar settir
avvarðandi landsstýrisfólki.
Á Løgtingi, 20. januar 2026
Bárður á Lakjuni

-- 2 of 2 --