52-067/2025

L Ø G M A N S S K R I V S T O V A N
P r i m e M i n i s t e r ´ s O f f i c e
Tinganes - Fo-100 Tórshavn – Faroes
Tel: (+298)306000 – e-mail: info@tinganes.fo - www.lms.fo
Løgtingið
Tinghúsvegur 1-3
Postboks 208
110 Tórshavn
Svar
uppá
skrivligan fyrispurning nr. 52-067/2025 eftir tingskipanini § 52a til Aksel V. Johannesen,
løgmann, frá Bárði á Steig Nielsen, løgtingsmanni, um ríkisfelagsskapin
Fyrispurningurin var soljóðandi:
1. Stuðlar løgmaður ríkisfelagsskapinum?
2. Eru eftirverandi flokkarnir í sokallaðu tjóðarsemjuni – Javnaðarflokkurin, Tjóðveldi,
Fólkaflokkurin og Framsókn – samdir um at loysa Føroyar úr ríkisfelagsskapinum?
3. Er fundur avtalaður við donsku stjórnina um at loysa Føroyar úr ríkisfelagsskapinum?
Svar:
Til spurning 1
Eg eri samdur við spyrjaranum í, at støðan hjá Grønlandi, sum er í ríkisfelagsskapi við Danmark, er sera
álvarsom. Somuleiðis mugu vit ásanna, at tað er nógv, sum bendir á, at tann heimsskipan, sum vit kenna
í dag, og sum hevur skapt karmarnar fyri friði og framgongd síðani seinna heimsbardaga, er um at fara
fyri skeyti. Landsstýrið stuðlar treytaleyst Grønlandi og grønlendska fólkinum. Tað eru bara tey, ið kunnu
taka avgerð um teirra framtíð. Somuleiðis er landsstýrið av teirri fatan, at heimsins lond eiga at halda seg
til altjóða lóg, og tað er ikki í lagi, at lond gera seg inn á landaøkið hjá øðrum.
Landsstýrið hevur altíð trygdina hjá Føroyum og føroyingum fyri eygað fyrst og fremst. Hetta er eisini tí,
at landsstýrið valdi at fylgja okkara sameindu við at seta nýggj avmarkandi tiltøk móti Russlandi í verk,
sum m.a. fevna um tvey navngivin russisk reiðarí. Okkara sameindu – bæði í Evropa og vestan hav –
fylgja væl við í tí sum vit gera, og meta tað hava týdning, at Føroyar í verki fremja átøk til frama fyri trygd
og støðufesti. Tí kann tað verða ein álvarsom støða fyri Føroyar ikki at fylgja okkara sameindu við
tiltøkum móti Russlandi, eins og stóru andstøðuflokkarnir ynskja. Harvið er vandi fyri, at Føroyar verða
fataðar sum ein óálítandi samstarvsfelagi í eini tíð, tá ið samanhald millum lond valla hevur havt størri
týdning.

-- 1 of 2 --

L Ø G M A N S S K R I V S T O V A N
P r i m e M i n i s t e r ´ s O f f i c e
Tinganes - Fo-100 Tórshavn – Faroes
Tel: (+298)306000 – e-mail: info@tinganes.fo - www.lms.fo
Til spurning 2 og 3
Sum eg havi svarað spyrjaranum áður, m.a. í § 52a fyrispurningi 52-110/2024, so eru fimm av seks
flokkum á Løgtingi samdir um, at Føroyar tørva størri uttanríkispolitiskar heimildir, og ynskja eina
skipan, sum gevur Føroyum uttanríkispolitiskar heimildir og byggir á samstarv millum javnbjóðis lond í
einum felagsskapi. Altso at broyta ríkisfelagsskapin til ein ríkjafelagsskap. Ein skipan, sum fyrrverandi
løgmaður og formaður í Sambandsflokkinum, og núverandi tingmaður hjá Sambandsflokkinum, Kaj Leo
Holm Johannesen, longu skeyt upp í ólavsøkurøðu síni í 2012.
Sum eg havi sagt fleiri ferðir áður, so er hetta eitt arbeiði, sum væntandi kemur at strekkja seg longur enn
verandi valskeið, og tí er tað, sum hevur størstan týdning, at arbeiðið verður gjørt rætt og væl, og í so
breiðari semju sum møguligt. Bæði innanhýsis í Føroyum, og millum Føroyar og Danmark. Enn er eingin
fundur avtalaður millum landsstýrið og donsku stjórnina um hesi viðurskifti.
Í Tinganesi, 26. januar 2026
Aksel V. Johannesen
løgmaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Bárður á Steig Nielsen, løgtingsmaður
Svarari: Aksel V. Johannesen, løgmaður
Evni: Ríkisfelagsskapurin
Spurningar:
1. Stuðlar løgmaður ríkisfelagsskapinum?
2. Eru eftirverandi flokkarnir í sokallaðu tjóðarsemjuni – Javnaðarflokkurin,
Tjóðveldi, Fólkaflokkurin og Framsókn – samdir um at loysa Føroyar úr
ríkisfelagsskapinum?
3. Er fundur avtalaður við donsku stjórnina um at loysa Føroyar úr
ríkisfelagsskapinum?
Viðmerkingar:
Alt meðan heimurin er í upploysn, hevur javnaðarløgmaður saman við
Fólkaflokkinum, Tjóðveldi og Framsókn gjørt eina sokallaða tjóðarsemju um at loysa
Føroyar úr ríkisfelagsskapinum.
Løgmaður boðaði í gjár, 13. januar, frá, at hann stuðlar Grønlandi. Grønland er
feskasta dømi um, at smálond sleppa ikki at liggja einsamøll. Tey verða løgd undir
ræðið av einum størri landi so ella so. Hetta eigur at verða tikið við í kjakið um
fullveldi her heima í Føroyum, tí hetta er ein spurningur um, hvørjum vit vilja vera
saman við – Danmark, USA ella okkurt nógv verri.
Løgmaður hevur fyri eini tíð síðani boðað frá, at fundur verður við donsku stjórnina
um sokallaðu tjóðarsemjuna fyrst í hesum árinum, men enn eru ongi boð komin um,
nær og um hetta verður.
Á Løgtingi, 14. januar 2026
Bárður á Steig Nielsen

-- 1 of 1 --