52-060/2025

B A R N A - O G Ú T B Ú G V I N G A R M Á L A R Á Ð I Ð
J. H. Schrøtersgøta 7 • FO-100 Tórshavn • Tel: +298 306500 • bumr@bumr.fo
Løgtingið 18. desember 2025
Tinghúsvegur 1-3 Mál: 22/22133-146
100 Tórshavn Viðgjørt: EØ
Svar
upp á
skrivligan fyrispurning nr. 52-060/2025 frá Anniku Olsen, løgtingskvinnu, eftir § 52a í
Tingskipanini, settur Djóna Nolsøe Joensen, landsstýrismanni í barna- og útbúgvingarmálum,
um samsýning til fosturforeldur.
Fyrispurningurin er soljóðandi:
1. Er Fosturforeldrafelagið við í arbeiðinum í sambandi við eftirmeting av
fosturforeldraskipanini?
2. Um nei, hvør er orsøkin til tað?
3. Er spurningurin um samsýning til fosturforeldur ein partur av hesum arbeiðinum?
4. Er ætlanin at hækka samsýningina til fosturforeldur?
Svar
Til 1 og 2: Barna- og útbúgvingarmálaráðið hevði tann 9. desember 2025 innleiðandi fund um
arbeiðið at eftirmeta fosturforeldraskipanina, har allir viðkomandi partar, eitt nú
Fosturforeldrafelagið, luttóku.
Eftir ætlan fer sjálvt arbeiðið í gongd í januar 2026, og verður Fosturforeldrafelagið og aðrir
viðkomandi partar tikin við undir tilgongdini av arbeiðinum.
Til 3: Ja, spurningurin um samsýning fer at verða fevndur av arbeiðinum.
Til 4: Í hvønn mun ætlanin er at hækka samsýningina, er tongt at tí niðurstøðu, sum kemur í sambandi
við greining av sp. 3, men ikki er ósannlíkt, at samsýningin verður broytt.
Vísandi til at kommunurnar eru inn yvir, hvat fígging viðvíkur, er tað tó umráðandi at hava tær við í
hesum, soleiðis at ein skynsamur fíggingarleistur við samsýningum verður gjørdur.
Vinarliga
Djóni Nolsøe Joensen
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Annika Olsen
Svarari: Djóni Nolsøe Joensen, landsstýrismaður í barna- og útbúgvingarmálum
Evni: Samsýning til fosturforeldur
Spurningar:
1. Er Fosturforeldrafelagið við í arbeiðinum í sambandi við eftirmeting av
fosturforeldraskipanini?
2. Um nei, hvør er orsøkin til tað?
3. Er spurningurin um samsýning til fosturforeldur ein partur av hesum
arbeiðinum?
4. Er ætlanin at hækka samsýningina til fosturforeldur?
Viðmerkingar:
Nú eitt arbeiði um at endurskoða fosturforeldraskipanina skal gerast, er tað umráðandi
at hava røttu samansetingina av fólkum, sum hava kunnleika um og innlit í
viðurskiftini hjá fosturforeldrum, við í arbeiðinum. Fosturforeldrafelagið varð
stovnað í 2000 og hevur just havt 25 ára stovningardag. Fosturforeldrafelagið hevur
havt ein stóran leiklut í arbeiðinum at styrkja fosturforeldaskipanina og at hjálpa og
stuðla fosturforeldrum í uppgávuni at stuðla og stimbra korini hjá føroyskum børnum.
Endamálið við fosturforeldrafelagnum er at betra um umstøðurnar hjá teimum, ið taka
børn til fosturs ella umlættingar, at betra um umstøðurnar hjá børnum, sum eru til
fosturs ella umlætting. Endmálið er eisini saman við myndugleikunum at arbeiða fyri
at útbúgva, upplýsa, menna, ráðgeva og stuðla teimum, sum taka børn til fosturs ella
umlættingar og at gera avtalu við myndugleikarnar um setanar- og lønarkor hjá
fosturforeldrum. At taka sær av einum fosturbarni ella fosturbørnum er
kostnaðarmikið. Samsýningin hevur staðið í stað í 7 ár (frá 2014-2021). Meðan onnur
fingu 2-3 % í lønarhækkan hesi árini, fingu fosturforeldur ikki somu sømdir, og eru tí
afturútsigld fíggjarliga. Neyðugt er tí eisini at taka fíggjarliga partin við í
endurskoðanini av fosturforeldraskipanini, og tí verða hesir spurningar settir
landsstýrismanninum.
Á Løgtingi, 11. desember 2025
Annika Olsen

-- 1 of 1 --