52-055/2025

1 / 2
Tilfeingis- og vinnumálaráðið
Løgtingið Tórshavn, 4. desember 2025
Tinghúsvegur 1-3
100 Tórshavn
Journal nr.: 25/31465
Svar frá Eiriki í Jákupsstovu, landsstýrismanni, upp á § 52a-fyrispurning nr. 052-
055/2025 frá Magnusi Rasmussen, løgtingsmanni, um flutning av seyði millum oyggjar
Spurningarnir vóru soljóðandi:
1. Nær og hví er avgerð tikin um at seta forboð - uttan undantaksloyvi – at flyta livandi
seyð av Streymoynni, Eysturoynni og Fugloynni ?
2. Hvussu er støðan við ridluskriða á Streymoynni, Eysturoynni og Fugloynni í dag?
3. Er tað bert livandi seyður, sum ber ridluskriðasmittuna og ikki t.d. avroð ella annað av
seyði?
4. Er loyvi at flyta og spreiða seyðatøð av Streymoynni, Eysturoynni og Fugloynni yvir
á aðrar oyggjum í Føroyum?
5. Hvat skal til og nær kann væntast, at undantaksloyvi aftur kann verða givið at flyta
livandi seyð av Streymoynni, Eysturoynni og Fugloynni – livandi seyð, sum skal
slaktast?
Svarað verður undir einum:
Forboð fyri at flyta seyð millum oyggjar er ásett í kunngerð nr. 3/2003 um forboð ímóti
flutningi av livandi kleyvdýrum. Áðrenn kunngerðin varð sett í gildi, metti landsdjóralæknin
um og setti forboð fyri flutningi, um illgruni var um ridluskriða. Møguleiki hevur verið at
søkja um undantaksloyvi til at flyta seyð millum oyggjar.
Undantaksloyvi er ikki latið at flyta livandi seyð úr Fugloy síðani í 1980-unum, úr
Streymoynni síðan 2013 og úr Eysturoynni síðan 2015. Avgerðirnar um ikki at geva
undantaksloyvi at flyta seyð av hesum oyggjum eru allar grundaðar á, at ridluskriði er
staðfestur á hesum oyggjum.
Sannlíkt er ridluskriðasmittan framvegis í hesum trimum oyggjum, hóast ongar fráboðanir
hava verið um seyð við sjúkueyðkennum í fleiri ár. Smittaður seyður vísir sjáldan
sjúkueyðkenni fyrr enn fleiri ár eftir, at seyðurin hevur fingið smittuna. Smittan kann tí vera í
einum øki í fleiri ættarlið, uttan at nakað sjónligt tekin er um hesa smittu. Prionir (t.e.
smittuevni) kunnu vera í einum umhvørvi í áratíggju og framvegis vera smittandi. Alt á seyði
kann bera smittuna, eisini skarn o.a. Av hesi orsøk er tað eisini bannað at flyta seyðatøð

-- 1 of 2 --

2 / 2
millum oyggjar. Skal eitt øki eftir altjóða leisti metast sum ridluskriðafrítt, skal allur seyður,
eldri enn 18 mánaðir, kannast og vísa negativ úrslit fyri ridluskriða í sjey ár á rað.
Skal tað bera til at flyta seyð millum allar oyggjar, er neyðugt at hava eftirlit við øllum seyði.
Prionkanningar skulu gerast av øllum seyði, og øll kanningarúrslitini skulu vera negativ minst
sjey ár á rað, áðrenn støða kann takast til, um tað er ráðiligt at loyva flutningi millum oyggjar.
Eitt tílíkt eftirlit er sera kostnaðarmikið, og tað eru í løtuni ikki ætlanir um at fara í gongd við
hetta.
Viðmerkjast skal at enda, at hóast tað í síni heild er bannað at flyta seyð av hesum trimum
oyggjunum, ber til at flyta livandi seyð til sláturs á løggildum sláturvirkjum, tí at løggild
sláturvirki lúka krøvini um handfaring av sláturburturkasti, eins og aðrar ásetingar um
smittufyribyrging og reinføri.
Tilfeingis- og vinnumálaráðið, 4. desember 2025
Eirikur í Jákupsstovu
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Magnus Rasmussen, løgtingsmaður
Svarari: Sirið Stenberg, landsstýriskvinna í uttanríkis- og vinnumálum
Evni : Flutningur av seyði millum oyggjar
Spurningar:
1. Nær og hví er avgerð tikin um at seta forboð - uttan undantaksloyvi – at flyta livandi seyð av
Streymoynni, Eysturoynni og Fugloynni ?
2. Hvussu er støðan við ridluskriða á Streymoynni, Eysturoynni og Fugloynni í dag?
3. Er tað bert livandi seyður, sum ber ridluskriðasmittuna og ikki t.d. avroð ella annað av
seyði?
4. Er loyvi at flyta og spreiða seyðatøð av Streymoynni, Eysturoynni og Fugloynni yvir á aðrar
oyggjum í Føroyum?
5. Hvat skal til og nær kann væntast, at undantaksloyvi aftur kann verða givið at flyta livandi
seyð av Streymoynni, Eysturoynni og Fugloynni – livandi seyð, sum skal slaktast?
Viðmerkingar:
Sambært kunngerð nr. 3 frá 14. januar 2003 um forboð móti flutningi av livandi kleyvdýrum
oyggjanna millum v.m.
er tað ikki loyvt at flyta livandi seyð ímillum oyggjarnar í Føroyum. Tó kann Heilsufrøðiliga
starvsstovan geva undantaksloyvi, um flutningurin ikki førir við sær munandi vanda fyri
sjúkuspjaðing. Tá skal umsókn sendast fyrst til Heilsufrøðiligu starvsstovuna.
Tað er ikki loyvt at flyta seyð, sum hevur sjúkutekin, ella at flyta hann frá djórahaldi við smittandi
sjúku. Heldur ikki er loyvt at flyta seyð úr hagaparti, har ridluskriði (scrapie) er staðfestur.
Heilsufrøðiliga starvsstovan kann tó geva undantaksloyvi til hetta.
Heilsufrøðiliga starvsstovan hevur tikið avgerð um, at flutningsloyvi ikki verður givið til flutning av
livandi seyði av Streymoynni, Eysturoynni og Fugloynni. Hetta fyri at fyribyrgja, at ridluskriði
spjaðist til fleiri oyggjar í Føroyum. Heldur ikki verður flutningsloyvi latið úr ridluskriða-
oyggjunum, til seyð, ið skal slaktast.
Nú hesi forboð hava verið galdandi í nógv ár, so er áhugavert at fáa at vita, hvussu støðan er á
økinum í dag, og hvussu vánirnar eru fyri, at hesi forboð verða avtikin.
Á Løgtingi 24. november 2025
Magnus Rasmussen

-- 1 of 1 --