52-053/2025

LØGMÁLARÁÐIÐ
M I N I S T R Y O F J U S T I C E
Gongin 7 • Postrúm 377 • FO-110 Tórshavn
 (+298) 35 80 80 •  lmr@lmr.fo • www.lmr.fo
Løgtingið
Tinghúsvegur 1-3
Postrúm 208
110 Tórshavn
Tórshavn, tann: 25. november
2025
J. nr.: 25/31240-2
Svar
upp á
fyrispurning nr. 52-053/2025 eftir § 52 a í Tingskipanini um at dagføra útlendingalógina, frá
Hannu Jensen, løgtingskvinnu
Spurningarnir vóru soljóðandi:
1. Hvussu gongur við tvørpolitiska arbeiðinum at dagføra útlendingalógina ella gera nýggja
útlendingalóg?
2. Nær væntast, at komið verður á mál og eitt nýtt ella dagført uppskot verður lagt fyri
Løgtingið?
3. Hvørjar vóru høvuðsorsakirnar til, at landsstýrismaðurin valdi at seta gongd á arbeiðið at
dagføra útlendingalógina fyri Føroyar?
4. Eru ávís evni, har tvørpolitiska arbeiðið hevur víst, at serliga týðiligur tørvur er á at dagføra
galdandi rætt í Føroyum á útlendingaøkinum
Svar:
Til spurning 1
Ein politiskur fylgibólkur, við einum umboði úr hvørjum flokki á Løgtingi, er settur í sambandi
við arbeiðið at dagføra útlendingalógina fyri Føroyar. Fundur er við politiska fylgibólkin umleið
annan hvønn mánað. Eg meti, at fundirnir í politiska fylgibólkinum ganga væl.

-- 1 of 2 --

LØGMÁLARÁÐIÐ
M I N I S T R Y O F J U S T I C E
2/2
Til spurning 2
Eftir ætlan verður liðugt at gjøgnumganga núverandi útlendingalóg á sumri 2026. Síðani skal
Udlændinge- og Integrationsministeriet gera uppskot til nýggja útlendingalóg fyri Føroyar, sum
verður sent til ummælis. Ilt er siga nær uppskotið til nýggja útlendingalóg fyri Føroyar verður lagt
fyri Løgtingið. Um arbeiðið gongur væl og landsstýrisfólkið, sum tá umsitur hetta málsøkið, ynskir
tað, verður tað væntandi í fyrsta lagi á vári 2027.
Til spurning 3
Høvuðsorsøkin til, at eg valdi at seta gongd á arbeiðið at dagføra útlendingalógina fyri Føroyar
var, at útlendingalógin, sum er frá 2001, á fleiri økjum ikki hóskar seg til ta støðu á
útlendingaøkinum, sum vit hava í Føroyum í dag.
Til spurning 4
Útlendingalógin hevur tørv á at verða dagførd sum heild, men tvørpolitiska arbeiðið hevur víst, at
tørvur serliga er á at dagføra ásetingarnar í sambandi við arbeiðs- og uppihaldsloyvir og
ásetingarnar í sambandi við familjusameining, soleiðis at hesar verða meira í samsvari við
samfelagsligu støðuna í Føroyum í dag.
Løgmálaráðið, tann 25. november 2025
Bjarni K. Petersen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Hanna Jensen, løgtingskvinna
Svarari: Bjarni K. Petersen, landsstýrismaður í lógarmálum
Evni: Dagføra útlendingalógina
Spurningar:
1. Hvussu gongur við tvørpolitiska arbeiðinum at dagføra útlendingalógina ella
gera nýggja útlendingalóg?
2. Nær væntast, at komið verður á mál og eitt nýtt ella dagført uppskot verður
lagt fyri Løgtingið?
3. Hvørjar vóru høvuðsorsakirnar til, at landsstýrismaðurin valdi at seta gongd á
arbeiðið at dagføra útlendingalógina fyri Føroyar?
4. Eru ávís evni, har tvørpolitiska arbeiðið hevur víst, at serliga týðiligur tørvur
er á at dagføra galdandi rætt í Føroyum á útlendingaøkinum ?
Viðmerkingar:
Seinnu árini eru fleiri og fleiri útlendingar komnir til Føroya enn frammanundan, og
útlendingaøkið fyllir tí natúrliga meira í Føroyum, eisini politiskt.
Núgaldandi útlendingalóg fyri Føroyar kom í gildi 25. mars í 2001, og hon er broytt
seks ferðir síðani tá. Til samanberingar er danska lógin broytt grundleggjandi mangar
ferðir síðani.
Landsstýrismaðurin hevur sett eitt arbeiði í gongd at gera eina nýggja útlendingalóg
og sett ein politiskan fylgibólk við fólki úr øllum flokkum í Løgtinginum. Og tað er
rós vert og heilt víst neyðugt. Men útlendingaøkið er breitt, og sumt er óivað meira
viðkomandi fyri Føroyar enn annað, í øllum førum. Ein slík prosess sýnir ofta, hvar
tørvurin er størstur á broytingum.
Tí verða hesir spurningar settir.
Á Løgtingi, 21. november 2025
Hanna Jensen

-- 1 of 1 --