52-042/2025

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 21. november 2025
J. nr.: 25/30331
Svar uppá fyrispurning nr. 52-042/2025 frá Anniku Olsen, løgtingskvinnu, settur Ruth
Vang, landsstýriskvinnu í fíggjarmálum, um rúsevnaeftirlit
Fyrispurningurin er soljóðandi:
1. Hvør hevur eftirlit við donsku sjóverjuni hvat viðvíkur smugling?
2. Hvussu ofta hevur danska sjóverjan lagt at kai í Føroyum seinasta árið?
3. Hvussu ofta hevur eftirlit verið umborð?
4. Eru rúsevni nakrantíð funnin umborð á donskum sjóverjuskipum?
Svar til spurning nr. 1-4:
Herskip hava órin. Hetta er millum annað ásett í havrættarsáttmálanum (UNCLOS), sum er settur
í gildi í Føroyum við bekendtgørelse nr. 17 af 21. juli 2005 af De Forenede Nationers
Havretskonvention af 10. december 1982 tillige med den dertil knyttede aftale af 28. juli 1994
om anvendelse af konventionens kapitel XI. Herskip eru viðgjørd í grein 29-32 í konventiónini.
Órin hjá krígsskipum sbrt. havrættarsáttmálanum er fyrst og fremst ætlað mótvegis
jurisdiktiónum hjá triðjalondum. Harafturat er viðkomandi at spyrja, hvørt Føroyar eru at rokna
sum triðjaland í mun til møguligt órin hjá einum donsku krígsskipi.
TAKS fer tó ikki vanliga umborð á herskip, heldur ikki donsk. Um TAKS skuldi farið umborð á
eitt herskip, vildi hetta verið eftir samráð við flaggstatin og skiparan og í samstarvi við
løgregluna.
TAKS hevur ikki hagtøl yvir, hvussu ofta danska sjóverjan hevur lagt at bryggju í Føroyum
seinasta árið.
Tinganes, 21. november 2025
Ruth Vang
Landsstýriskvinna í fíggjarmálum

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Annika Olsen, løgtingskvinna
Svarari: Ruth Vang, landsstýriskvinna í fíggjarmálum
Evni: Rúsevnaeftirlit
Spurningar:
1. Hvør hevur eftirlit við donsku sjóverjuni hvat viðvíkur smugling?
2. Hvussu ofta hevur danska sjóverjan lagt at kai í Føroyum seinasta árið?
3. Hvussu ofta hevur eftirlit verið umborð?
4. Eru rúsevni nakrantíð funnin umborð á donskum sjóverjuskipum?
Viðmerkingar:
Rúsevni gerast alsamt meiri vanlig í býarlívinum, sum viðføra vandastøður fyri tann
einstaka. Saman við mongdunum av rúsevnum í býarlívinum er úrslitið eisini ofta
harðskapur, eisini av tí grovara slagnum. Samstundis hoyra vit dagliga í miðlunum
um, at hald er lagt á so og so nógv gramm og kilo av hasji, amfetamini v.m. Fyri at
vita, hvussu vit kunnu hava fullkomið eftirlit við landamørkunum bæði sjóvegis og
loftvegis verða hesir spurningar settir.
Á Løgtingi, 4. november 2025
Annika Olsen

-- 1 of 1 --