52-040/2025

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
17. november 2025
Mál: 25/29109-3
(at tilskila í svari)
Tygara skriv: 52-040/2025
Svar til skrivligan fyrispurning nr. 52-040/2025 frá Karlot Hergeirsson,
løgtingsmanni, settur landsstýrismanninum í fiskivinnu- og samferðslumálum,
Jóhan Christiansen, um ferjulegur og atløguviðurskiftini á Syðradali og í
Klaksvík
Fyrispurningurin er soljóðandi:
1. Er arbeiðið uppá ferjuleguna á Syðradali liðugt?
2. Um ja, hvat hevur arbeiðið kostað?
3. Um nei, hvat væntar landsstýrismaðurin, at tann endaligi kostnaðurin er at
tillaga ferjuleguna og atløguumstøðurnar á Syðradali?
4. Hvat væntar landsstýrismaðurin, at tann endaligi kostnaðurin er at tillaga
ferjuleguna og atløguumstøðurnar á Syðradali og í Klaksvík?
Svar til spurning 1, 2 og 3
Sambært Landsverki er arbeiðið upp á ferjuleguna á Syðradali liðugt og varð
avhendað hálvan august 2025.
Verkætlanin er framd í samstarvi millum Landsverk og Strandferðsluna. Sambært
Landsverki er havnin tillagað eftir teimum ynskjum og avtalum, ið eru gjørdar við
Strandferðsluna, so havnin kann brúkast til Teistan og síðani til nýggju
Kalsoyarferjuna, ið skal byggjast í næstum. Hetta arbeiðið kostaði 6,8 mió. kr.
Síðani Teistin fór at royndarsigla millum Stóru Kai og Syðradal, eru smærri tillagingar
gjørdar. Ein gelendari er broyttur, móttakarin til fjarstýringina til rampuna hevur fingið
betri antennu, og møguleiki er gjørdur fyri at geva ferjuleguni streym frá skipinum, um
streymveitingin í oynni svíkur. Hetta kostar umleið 100 tús. kr.
Royndarsiglingin við Teistanum hevur tó eisini staðfest, at tað kann gerast neyðugt at
leingja atløgusíðuna við norðara grótkastið á Syðradali fyri at fyribyrgja ov nógvar
avlýsingar vegna veður. Hetta verður framvegis kannað og síðani tikið upp við

-- 1 of 2 --

Fiskivinnu- og samferðslumálaráðið
2/2
Landsverk um møguligar loysnir og kostnað. Neyðugt er eisini at fáa staðfest, hvussu
væl Stóra Kai roynist, og um hetta kann gerast ein varandi loysn sum alternativ til
atløguna á Stongum.
Tá ið royndarsiglingin við Teistanum er liðug, verður endalig niðurstøða gjørd
viðvíkjandi verandi viðurskiftum á Syðradali og í Klaksvík, og nær Teistin kann fara
undir regluliga sigling á Kalsoyarleiðini.
Svar til spurning 4
Arbeiðið á Syðradali kostaði 6,8 mió. kr. Grundað á útboð hjá Landsverki, verður
arbeiðið á verandi atløgu á Stongunum í Klaksvík mett til at kosta millum 2,5 mió. kr.
og 3,0 mió. kr.
Samanlagt metir Landsverk, at hesar verkætlanir á Syðradali og í Klaksvík fara at
kosta millum 9,3 til 9,8 mió. kr. Verður niðurstøðan eftir royndarsiglingina, at fleiri
tillagingar skulu gerast, má ein nýggj kostnaðarmeting gerast.
Jóhan Christiansen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Karlot Hergeirsson, løgtingsmaður
Svarari: Jóhan Christiansen, landsstýrismaður í fiskivinnu- og samferðslumálum
Evni: Ferjulegur og atløguviðurskiftini á Syðradali og í Klaksvík
Spurningar:
1. Er arbeiðið uppá ferjuleguna á Syðradali liðugt?
2. Um ja, hvat hevur arbeiðið kostað?
3. Um nei, hvat væntar landsstýrismaðurin, at tann endaligi kostnaðurin er at
tillaga ferjuleguna og atløguumstøðurnar á Syðradali?
4. Hvat væntar landsstýrismaðurin, at tann endaligi kostnaðurin er at tillaga
ferjuleguna og atløguumstøðurnar á Syðradali og í Klaksvík?
Viðmerkingar:
Vísandi til § 52a spurning (52-023/2025) frá Beinir Johannesen, løgtingsmanni, svarar
landsstýrismaðurin at arbeiði var liðugt og avhendað miðan aug. 2025. Eisini stendur
í fíggjarlógaruppskotinum fyri 2026, at Arbeiðið við ferjuleguni á Syðradali er liðugt.
Hetta fæst illa at passa við tað, undirritaði bæði hoyrir og skilir, eins og at tað eisini
kemur fram í einum tíðindastubba hjá KVF tann 29. okt. 2025, sum endurgevur eini
sms-boð frá stjóranum á SSL, at enn verða tillagingar gjørdar, og eftirmetingar verða
gjørdar áhaldandi, og tá komið er út á várið, verður tikið saman um royndarsiglingina
hjá Teistanum.
Í omanfyri nevnda spurningi varð eisini spurt um kostnaðin, og verður svarað, at
brúktar er 6,7 mió uppá Syðradal, sum tá er avhendað og liðug, og verandi atløgu á
Stongunum mett til at kosta millum 2,5 til 3,0 mió. kr.
Um ferjulegan ikki er liðug og klár til Teistan, sum annars kemur fram í svarinum
uppá 52-023/2025, hvør verður so samlaði kostnaðurin uppá allar tillagingar á
Syðradali? Í samlaða kostnaðinum eigur at verða tikið við, at Teistin liggur við
manning í Klaksvík og ger onkra royndarsigling av og á. Eisini skal takast við “rima-
verkið”, sum kaiin á Syðradali má leingjast við.
Undir orðaskiftinum um eykajáttan á heysti 2024 (LM-008/2024), har pengar vórðu
játtaðir til hesar tillagingar, vóru tað fleiri løgtingsfólk, sum settu spurningar, um nú
kostnaðarmetingin fór at halda. Tá var ætlanin at flyta rampuna úr Skopun til
Syðradals, men í álitinum verður hetta víst aftur. Har stendur: Til hetta endamál
verður biðið um 7,7 mió. kr. Nevndin hevur fingið upplýst, at hetta er dagførda
kostnaðarmetingin at flyta rampuna og til arbeiðið í Syðradali, og mett verður, at hon
fer at halda. Neyðugt verður møguliga at gera nakrar smærri tillagingar á
ferjuleguna í Klaksvík; hetta verður kannað í løtuni. Hetta arbeiðið verður mett at
kunna verða gjørt innanfyri verandi játtan.

-- 1 of 2 --

Á Løgtingi, 31. oktober 2025
Karlot Hergeirsson

-- 2 of 2 --