52-036/2025

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 5. november 2025
J. nr.: 25/28530
Viðgjørt: EC
Svar uppá fyrispurning nr. 52-036/2025 frá Beinir Johannesen, løgtingsmanni, settur Ruth
Vang, landsstýriskvinnu í fíggjarmálum, um ALS og AMEG á fíggjarlógini
Fyrispurningurin er soljóðandi:
1. Hvør er orsøkin til, at ALS og AMEG eru komnir á Løgtingsins fíggjarlóg?
2. Ætlar landsstýrið at broyta lógirnar viðvíkjandi ALS og AMEG, so tær loyva grunnunum
at vera á fíggjarlógini?
3. Um ikki, ætlar landsstýrið at grunnarnir skulu av aftur fíggjarlógini?
Svar til spurning nr. 1:
ALS og AMEG eru ikki við í fíggjarlógini. Virksemið hjá grunnunum er enn sum áður skipað í
sjálvstøðugum grunnum, eins og aðrir almennir grunnar.
Tó krevur § 41 í stýrisskipanini, at øll lógarkravd gjøld, skattir o.tíl. skulu takast við umvegis
fíggjarlógina. AMEG kom við í uppskot til fíggjarlóg fyri 2025. ALS (og Trygdargrunnur
Fiskivinnunnar) kom við í uppskot til eykajáttan í vár. Uppskotini vórðu viðgjørd og samtykt í
Løgtinginum. Uppskotið til fíggjarlóg fyri 2026 er framhald av játtanunum fyri 2025.
Talan er um sokallaðar netto null-játtanir, har upphæddin fer beinleiðis víðari til grunnin.
Játtanin snýr seg um fíggjarliga heimild at krevja lógarkravdu gjøldini inn og hevur ikki ávirkan
á grunnin sjálvan og virksemi hansara. Tað eru nógv dømi um tílíkar inntøkur undir § 20 í
fíggjarlógini, t.d. gjøld til Vinnusjúkugrunnin, kommunur, kirkjur, ALS, AMEG.
Løgtingsgrannskoðararnir hava í nógv ár funnist at, at landsroknskapurin ikki er fullfíggjaður.
Landsroknskapurin skal sambært § 1, stk. 2 í roknskaparlógini fylgja fíggjar- og
eykajáttanarlógum fyri árið. Lógarkravd gjøld skulu tí verða tikin við umvegis fíggjarlógina og í
landsroknskapin.
Svar til spurning nr. 2:
Tað er ikki neyðugt at broyta lógirnar, tí at ALS og AMEG eru og skulu ikki við í fíggjarlógina. Í
lógunum verður teksturin “inntøkur og útreiðslur grunsins verða ikki tiknar við í fíggjarlógina”
brúktur. Tað er vanligur tekstur um tílíkar grunnar, har grunnurin og virksemi hansara ikki skulu

-- 1 of 2 --

F Í G G J A R M Á L A RÁ Ð I Ð
Ministry of Finance
2/2
verða játtað í fíggjarlóg á hvørjum ári. Ein lóg er um grunnin, sum regluskipar virksemið neyvt í
mun til ásetta endamálið. Tað er materiell heimild til grunnin og virksemið.
Sum greitt frá til spurning 1, skulu lógarkravd gjøld sambært § 41 í stýrisskipanini altíð verða
tikin við umvegis fíggjarlógina.
Svar til spurning nr. 3:
Sum greitt frá, eru grunnarnir ikki við í fíggjarlógini, men lógarkravdu gjøldini skulu sambært §
41 í stýrisskipanini hava eina fíggjarliga heimild.
Tinganes, 05. november 2025
Ruth Vang
Landsstýriskvinna í fíggjarmálum

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Beinir Johannesen, løgtingsmaður
Svarari: Ruth Vang, landsstýriskvinna í fíggjarmálum
Evni: ALS og AMEG á fíggjarlógini
Spurningar:
1. Hvør er orsøkin til, at ALS og AMEG eru komnir á Løgtingsins fíggjarlóg?
2. Ætlar landsstýrið at broyta lógirnar viðvíkjandi ALS og AMEG, so tær loyva
grunnunum at vera á fíggjarlógini?
3. Um ikki, ætlar landsstýrið at grunnarnir skulu av aftur fíggjarlógini?
Viðmerkingar:
Í uppskotinum til løgtingsfíggjarlóg sæst, at bæði ALS og
Arbeiðsmarknaðareftirlønargrunnurin (AMEG) eru komnir á løgtingsfíggjarlógina.
Hetta hóast, at í lógargrundarlagnum fyri báðar grunnarnar er ásett, at inntøkur og
útreiðslur grunsins verða ikki tiknar við á løgtingsfíggjarlógina.
Tí er vert at vita, um landsstýrið ætlar at broyta lógargrundarlagið fyri grunnarnar, so
heimild er fyri at hava teir á fíggjarlógini.
Um ætlanin ikki er so, so er vert at vita, um landsstýrið ætlar, at grunnarnir skulu av
aftur fíggjarlógini.
Málið er eisini áhugavert á tann hátt, at siðvenja hevur verið, at broytingar viðvíkjandi
ALS verða framdar í samstarvi við stýrið, men í hesum førinum gongur mann beint
ímóti tí, ið stýrið sigur.
Fyri at fáa greiðu á hesum og hví grunnarnir eru komnir á fíggjarlógina, verður hesin
fyrispurningur settur.
Á Løgtingi, 24. oktober 2025
Beinir Johannesen

-- 1 of 1 --