52-035/2025

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
5. november 2025
Mál: 25/28448
Tygara skriv: 52-035/2025
Svar til skrivligan fyrispurning nr. 52-035/2025 frá Grími Sundstein, løgtingsmanni, settur
landsstýrismanninum í fiskivinnu- og samferðslumálum, Jóhan Christiansen, um tunnil til
Vestmanna
Fyrispurningurin er soljóðandi:
1. Nær verður væntandi farið undir at bora tunnil til Vestmanna ?
2. Hevur landsstýrismaðurin saman við landsstýrinum gjørt nakra endaliga raðfesting av,
hvørjir tunlar skulu gerast næst ?
3. Fer arbeiðið at fyrireika og prosjektera tunnil til Vestmanna at halda fram komandi árini,
hóast ongir pengar eru játtaðir á fíggjarlógini til Vestmannatunnilin fyri 2026 og frameftir ?
Svar til spurning 1 og 2
Tað er umráðandi, at tað er trygt og skjótt at ferðast um alt landið.
Farleiðin til Vestmanna er sum heild góð, men á vetri kann tað vera trupult at koyra fyri hálku og
vindi einstakar dagar, serliga á Høgareyni. Umstøðurnar eru tó ikki øðrvísi enn á øðrum
fjallavegum kring landið.
Í høvuðsheitum hevur verið arbeitt við tveimum ymiskum tunnilsloysnum. Onnur loysnin er ein
tunnil úr Kvívík til Vestmanna, sum er 4,2 kilometrar langur, og hin loysnin er ein tunnil úr
Leynum til Vestmanna, sum er 6,2 kilometrar langur.
Ein tunnil millum Kvívík og Vestamanna verður, sambært Landsverki, mettur til at kosta umleið
600 mió. kr. við 40% váðaískoyti, og ein tunnil millum Leynar og Vestmanna verður mettur til at
kosta umleið 900 mió. kr., við einum váðaískoyti uppá 40%. Talan er um 2024 prísir.
Peningur, sum higartil hevur verið játtaður til nýggju farleiðina til Vestmanna, hevur verið brúktur
til at kanna, hvørjar loysnir kunnu gerast, og jarðfrøðiligar kanningar eru gjørdar av báðum
verkætlanum.
Ein Vestmannatunnil er sera kostnaðarmikil, og tað er ein spurningur um játtan og raðfesting, nær
hann verður bygdur. Sum tilskilað í fíggjarlógini fyri 2025, hevur ætlanin higartil verið at fara undir
Vestmannatunnilin, tá Tjørnuvíkartunnilin er liðugur, men til ber ikki at siga nú, nær tað verður.
Íløgukarmur landsins verður 570 mió. kr. í 2026 (við løgukendum játtanum), og íløgukarmurin
verður síðani eini 600 mió. kr. árliga næstu árini. Nógv byggiarbeiði eru í gongd, ella fara í gongd
næsta ár, sum hevur við sær stórar fíggjarligar bindingar næstu árini.

-- 1 of 2 --

Fiskivinnu- og samferðslumálaráðið
2/2
Íløguætlanin verður dagførd javnan, og landsstýrið fer í næstum at gera eina íløguætlan, sum
vónandi kann fáa breiða politiska undirtøku.
Landsverk arbeiðir við at dagføra samferðsluætlanina. Sum partur av hesum arbeiðir Landsverk í
løtuni við at gera kostnað-nyttu greiningar av verkætlanum innan infrakervið. Endamálið er at lýsa
samfelagsbúskaparligu avleiðingarnar, sum standast av verkætlanum. Tað er eitt gott grundarlag
fyri at leggja eina íløguætlan fyri landið.
Svar til spurning 3
Jarðfrøðiligu kanningarnar eru gjørdar, og arbeiðið at prosjektera tunnil til Vestmanna verður gjørt,
tá játtan verður tøk til endamálið.
Jóhan Christiansen
Landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Grímur Sundstein, løgtingsmaður
Svarari: Jóhan Christiansen, landsstýrismaður í fiskivinnu-og samferðslumálum
Evni: Tunnil til Vestmanna
Spurningar:
1. Nær verður væntandi farið undir at bora tunnil til Vestmanna?
2. Hevur landsstýrismaðurin saman við landsstýrinum gjørt nakra endaliga
raðfesting av, hvørjir tunlar skulu gerast næst?
3. Fer arbeiðið at fyrireika og projektera tunnil til Vestmanna at halda fram
komandi árini, hóast ongir pengar eru játtaðir á fíggjarlógini til
Vestmannatunnilin fyri 2026 og frameftir?
Viðmerkingar:
Í uppskoti til fíggjarlóg fyri 2025, stóð m.a. at ‘Vestmannatunnilin verður fyrireikaður
og projekteraður. Tá Tjørnuvíkartunnilin er liðugur, verður eftir ætlan farið undir
Vestmannatunnilin.’
Í fíggjarlógaruppskotinum fyri 2026, er hendan orðingin tikin burtur.
Harafturat eru ongin játtan sett av til tunnil til Vestmanna í 2026 ella komandi árini. Til
samanberingar hevði undanfarna samgonga í sínum seinasta fíggjarlógaruppskoti játtað
75 mió. kr. til Vestmannatunnil í 2025.
Nú arbeiðið at gera tunnil til Tjørnuvíkar er farið í gongd kann væntast, at ferð eisini
kemur á fyrireikingarnar til Vestmannatunnilin. Men hóast greiða setningin um, at ‘Tá
Tjørnuvíkartunnilin er liðugur, verður eftir ætlan farið undir Vestmannatunnilin.’, kann
tað tykjast sum ein andsøgn, at ongir pengar eru játtaðir á fíggjarlógini til hendan
tunnilin komandi árini.
Í svari uppá fyrispurning um til tunnil til Vestmanna [52-050/2024] svaraði táverandi
landstýrissmaður í samferðslumálum at ’Sum tilskilað í fíggjarlógaruppskotinum fyri
2025 er skotið upp at fara undir at gera Vestmannatunnilin, tá Tjørnuvíkartunnilin er
liðugur. Tá eigur Vestmannatunnilin at vera liðugt fyrireikaður og prosjekteraður.’
Nú setningurin eisini er tikin úr fíggjarlógaruppskotinum fyri 2026 er ivasamt, hvør
raðfestingin av tunlinum til Vestmanna og aðrar tunlar er.
Farleiðin til Vestmanna er góð, tá veðrið er gott, men tíverri er ov ofta ikki koyrandi í
vetrarhálvuni fyri vindi og kava.

-- 1 of 2 --

Umframt vestmenningar og avbygdarfólk, koyra eisini bussar við skúlanæmingum,
tangabilar í sambandi við aling, lastbilar við farmi og framleiðslu, umframt umleið
40.000 ferðafólk, ið ferðast um Høgareyn í summarhálvuni.
Fyri at fáa greiðu á støðuni viðvíkjandi Vestmannatunlinum verður hesin fyrispurningur
settur.
Brot úr fíggjarlógini 2026 – s.125
Virksemisyvirlit: 10 Nýgerð av landsvegum
2023 2024 2025 2026 2027 2028
R R J F Æ Æ
30. Tunnil til Vestmanna 642 823 - - - -
Á Løgtingi, 23. oktober 2025
Grímur Sundstein

-- 2 of 2 --