52-034/2025

Dagf. 4. november 2025
HMR j. nr. 25/28540-4
Súsanna Bertholdsen
landsstýriskvinna
Svar
upp á
Fyrispurning nr. 52-034/2025 eftir § 52a í tingskipanini, um sjúklingatrygd og journalisering
av heilsudátum fyri viðgerðir í Danmark, frá Terja Beder, løgtingsmanni.
Spurningarnir vóru soljóðandi:
Spurningar:
1. Hví kunnu fólk, sum eru búsitandi í Føroyum, ikki brúka sítt egna p-tal ella cpr-tal, tá tey fáa
sjúkrahúsviðgerð í Danmark, men mugu í staðin noyðast við eitt fyribils cpr-tal?
2. Hvat merkir tað fyri sjúklingatrygdina hjá føroyskum sjúklingum, tá journaliseringin verður
løgd afturat einum fyribils persónstali?
3. Verður nakað gjørt fyri at tryggja, at journalin, sum er knýtt at fyribils talinum verður førd
inn í journalirnar hjá sjúklinginum, sum eru knýttar at p-talinum í Føroyum og cpr-talinum í
Danmark?
4. Verður nakað gjørt fyri at tryggja samanhang ímillum journalirnar í Danmark og í Føroyum?
Svar:
Til spurning 1
Um sjúklingurin hevur eitt danskt cpr, ella fær eitt sonevnt administrativt cpr-tal við umsókn frá
Uttanlandstænastuni ella frá Ríkisumboðnum, so verður tað, sambært Sjúkrahúsverkinum, brúkt í
donsku journalskipanini. Eitt administrativt cpr-tal kann samanberast við eitt vanligt danskt cpr-tal,
latið einum borgara, sum ikki hevur bústað í Danmark. Eitt administrativt cpr-tal er ikki eitt fyribils
cpr-tal, men er galdandi alt lívið. Um sjúklingurin aftur verður sendur til viðgerð í Danmark, verður
sama talið brúkt, ella um persónurin flytur til Danmarkar, so verður tað administrativa cpr-talið
broytt til eitt vanligt cpr-tal.

-- 1 of 3 --

Hevur sjúklingurin ikki eitt vanligt ella administrativt cpr-tal, kann viðgerðarstaðið upprættað eitt e-
cpr (erstatnings cpr) til føroyskar sjúklingar, sum er eitt fyribils cpr-tal.
Tí er tað ikki rætt, at tað altíð verða upprættaði sonevnd fyribils e-cpr (erstatnings cpr) til føroyskar
sjúklingar.
Tá talan er um borgara við bústaði í Føroyum, men sum ikki er danskur ríkisborgari, so kann hesin
borgarin í dag ikki fáa eitt administrativt ella vanligt danskt cpr-tal vegna galdandi lóggávu. Fyri at
hesin sjúklingurin skal fáa viðgerð uttanlands er neyðugt, at hann verður upprættaður við einum
sonevndum fyribils e-cpr. Hetta e-cpr kann nýtast av fleiri deildum, og tí er ikki neyðugt at gera nýtt
e-cpr til sama sjúkling, um viðgerðargongdin fevnir um fleiri deildir í Danmark.
Eitt fyribils e-cpr skal bert nýtast, um viðgerðarstaðið ikki er kunnað um danska cpr-talið, ella um
sjúklingurin ikki hevur eitt danskt cpr-tal. Tá verður eitt e-cpr brúkt, soleiðis at sjúklingurin ikki
skal bíða eftir ávísing, innkalling og viðgerð, bara tí at onki danskt cpr-tal er skrásett í skipanini.
P-tals skipanin og CPR-skipanin eru hvør sín skipan. Tí kann eitt p-tal ikki nýtast í einari danskari
journalskipan, og eitt cpr-tal kann ikki nýtast í føroysku journalskipanini.
Til spurning 2
Sjúkrahúsverkið samstarvar neyvt við donsku viðgerðarstøðini fyri at tryggja, at trygdin er í lagi. Í
hesum sambandi brúkar Sjúkrahúsverkið nógva orku fyri at tryggja, at journalupplýsingar ikki detta
niður í millum skipanirnar.
Í løtuni er ein verkætlan í gongd hjá Talgildu Føroyum, har m.a. heilsuverkið luttekur. Endamálið er
at knýta p-talið hjá borgarum í føroyska Landsfólkayvirlitinum, sum eisini hava eitt danskt cpr-tal,
beinleiðis saman. Á hendan hátt fær Sjúkrahúsverkið fatur á cpr-tølum, sum borgarar í føroysku
skránni hava. Hetta fer at bøta um sjúklingatrygdina fyri hesar borgarar og fyribyrgja, at sjúklingar
detta niður millum skipanirnar. Allir føroyingar kunnu søkja um cpr-tal.
Til spurning 3
Í Sjúkrahúsverkinum fylgja tey við, at viðkomandi dátur koma til læknarnar í Føroyum.
Tá Sjúkrahúsverkið (Uttanlandstænastan) fær upplýst eitt danskt cpr-tal frá sjúklinginum, ella søkir
eindina á Ríkissjúkrahúsinum um at upprætta eitt nýtt administrativt cpr-tal til ein sjúkling, verður
samstundis heitt á viðgerðarstaðið um at knýta øll møgulig e-cpr afturat tí danska CPR-talinum
soleiðis, at allar journalirnar eru knýttar at rætta cpr-talinum.
Í nýggju talgildu heilsuskipanini (THS), verður ætlandi talgilt samskifti millum donsku og føroysku
skráirnar. Í dag verða journalupplýsingar sendar manuelt millum Sjúkrahúsverkið og
viðgerðarstøðini uttanlands. Síðan verða hesar journalupplýsingar lagdar manuelt inn í ávikavist
føroysku journalina og journalina uttanlands.

-- 2 of 3 --

Til spurning 4
Fyri at tryggja ein samanhang ímillum journalirnar í Danmark og Føroyum er eitt tætt samstarv
millum Sjúkrahúsverkið og viðgerðarstøðini uttanlands, við bæði manuellum og talgildum
mannagongdum. Eisini verður nógv orka nýtt í Sjúkrahúsverkinum fyri at tryggja, at
journalupplýsingar ikki detta niður í millum, tá talan er um sjúklingagongdir tvørturum landamørk.
Heilsumálaráðið, 4. november 2025
Súsanna Bertholdsen
landsstýriskvinna

-- 3 of 3 --

Skrivligur fyrispurningur
§ 52a eftir Tingskipanini
Spyrjari: Terji Beder, løgtingsmaður
Svarari: Súsanna Bertholdsen, landsstýriskvinna í heilsumálum
Evni: Sjúklingatrygd og journalisering av heilsudátum fyri viðgerðir í Danmark
Spurningar:
1. Hví kunnu fólk, sum eru búsitandi í Føroyum, ikki brúka sítt egna p-tal ella cpr-tal, tá tey fáa
sjúkrahúsviðgerð í Danmark, men mugu í staðin noyðast við eitt fyribils cpr-tal?
2. Hvat merkir tað fyri sjúklingatrygdina hjá føroyskum sjúklingum, tá journaliseringin verður
løgd afturat einum fyribilspersónstali?
3. Verður nakað gjørt fyri at tryggja, at journalin, sum er knýtt at fyribilstalinum verður førd
inn í journalirnar hjá sjúklinginum, sum eru knýttar at p-talinum í Føroyum og cpr-talinum í
Danmark?
4. Verður nakað gjørt fyri at tryggja samanhang ímillum journalirnar í Danmark og í Føroyum?
Viðmerkingar:
Tá føroyingar, sum eru búsitandi í Føroyum, fáa sjúkrahúsviðgerð í tí danska heilsuverkinum, fáa
teir eitt fyribils cpr-tal, óansæð um teir hava eitt danskt cpr ella ikki. Hetta ger, at journalin, sum
verður førd fyri viðgerðina, ikki verður knýtt at tí vanliga cpr-talinum, og tí ikki verður løgd afturat
tí journalini, sum annars er knýtt at cpr-talinum hjá sjúklinginum.
Hetta merkir, at týðandi upplýsingar um sjúku og sjúkragongd enda uttanfyri ta vanligu
skrásetingina, sum føroyskir sjúklingar annars hava knýtta at sínum persónstali.
At týðandi upplýsingar um sjúku verða hektaðar av journalini hjá fólki tykist mær sera álvarsligt, tí
støður kunnu eyðsæð koma fyri, har upplýsingar frá hesum viðgerðum kunnu fáa týdning í øðrum
viðgerðum. At hesar upplýsingar ikki verða skrásettar eftir teirri vanligu journalini ger eisini, at ein
óneyðuga stór ábyrgd verður løgd á tann einstaka sjúklingin, sum tá bæði skal minnast og skilja ta
sjúkugongd, viðkomandi hevur verið ígjøgnum.
Á Løgtingi, 23. oktober 2025
Terji Beder

-- 1 of 1 --