52-026/2025

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i a S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
15. oktober 2025
Mál: 25/26833-2
(at tilskila í svari)
Tygara skriv: 52-026/2025
Svar til skrivligan fyrispurning nr. 52-026/2025 frá Jacob Vestergaard,
løgtingsmanni, settur Jóhan Christiansen, landsstýrismanni í fiskivinnu- og
samferðslumálum, um ICES-tilmælið um makrel, norðhavssild og svartkjaft fyri
2026
Spurningar:
1. Nær varð Fiskimálaráðið kunnað um ásetingarnar í komandi ICES-tilmælinum
um makrel, norðhavssild og svartkjaft fyri 2026?
2. Kunnaði landsstýrismaðurin landsstýrið – Fíggjarmálaráðið – um tilmælið?
Svar:
Til spurning 1.
Tilmælið hjá ICES um makrel, norðhavssild og svartkjaft fyri 2026 varð
almannakunngjørt 30. september 2025. Hendan dagin sendi Havstovan Fiskivinnu- og
samferðslumálaráðnum tilmælið hjá ICES og eina stutta kunning, sum greiddi frá
tilmælinum.
ICES hevur eina mannagongd, sum sigur, at tá ábendingar eru um ógvusligan
niðurskurð, skulu londini, sum hava biðið um tilmæli, fáa eina ávaring, áðrenn tilmælið
verður alment. 19. september fekk Ráðið eitt skriv frá ICES, sum yvirskipað greiddi frá
støðuni við makreli og svartkjafti, og at stórur niðurskurður kundi væntast í tilmælinum
fyri báðar stovnarnar.
Tilmælið verður viðgjørt í trimum ymiskum arbeiðsbólkum í ICES. Broytingar kunnu
henda í tilmælunum ígjøgnum øll trý stigini. Tískil eru stovnsmetingarúrslitini og
arbeiðið við at orða tilmælið fevnd av tagnarskyldu, til tilmælið hjá ICES er alment.

-- 1 of 2 --

Fiskivinnu- og samferðslumálaráðið
2/2
Mannagongdin fyri stovnsmetingarnar og tilmæli fyri makrel, norðhavssild og svartkjafti
hevur verið tann sama í mong ár, og er hendan:
Stovnsmetingarnar fyri makrel, norðhavssild og svartkjaft verða gjørdar um
mánaðarskiftið august-september. Tá ICES-arbeiðsbólkafundurin byrjar, verður gjørt
greitt, at úrslitini eru í trúnaði, til ICES hevur almannakunngjørt tilmælini.
Umleið eina viku eftir hittist Advice-drafting-group (ADG), sum skrivar endaliga
tilmælið.
Síðan góðkennir ACOM (Advisory Committee) tilmælini uml. eina viku eftir ADG.
ICES almannakunnger tilmælið 30. september ella tann gerandisdagin, sum er tættast
við hesa dagfesting.
Til spurning 2.
Fiskivinnu- og samferðslumálaráðið kunnaði Fíggjarmálaráðið um tilmælið fyri makrel,
norðhavssild og svartkjaft sama dag, sum ICES almannakunngjørdi tilmælini t.v.s. 30.
september 2025.
Strandarlondini skulu nú taka støðu til ráðgevingina hjá ICES, og hvør mest loyvda
veiðan skal vera í 2026. Tá henda avgerð er tikin, hevur Fíggjarmálaráðið neyvari
upplýsingar til at gera eina nýggja inntøkumeting til fíggjarlógina fyri 2026.
Jóhan Christiansen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Jacob Vestergaard, løgtingsmaður
Svarari: Jóhan Christiansen, landsstýrismaður í fiskivinnu- og samferðslumálum
Evni: ICES-tilmælið um makrel, norðhavssild og svartkjaft fyri 2026
Spurningar:
1. Nær varð Fiskimálaráðið kunnað um ásetingarnar í komandi ICES-tilmælinum um makrel,
norðhavssild og svartkjaft fyri 2026?
2. Kunnaði landsstýrismaðurin landsstýrið – Fíggjarmálaráðið – um tilmælið?
Viðmerkingar
Undir 1. viðgerð av løgtingsfíggjarlógini tórsdagin 2. oktobur 2025 vísti undirritaði á, at nýggjastu
tilmælini frá ICES um makrel, norðhavssild og svartkjaft ikki vóru tikin við og tí ikki vóru ein
partur av lógaruppskotinum.
Støddin á kvotunum av makreli, norðhavssild og svartkjafti fyri 2026 hevur stóran týdning fyri
inntøkugrundarlagið hjá landskassanum, og tí undraði tað undirritaða, at hesar upplýsingar ikki vóru
tiknar við, nú ICES mælir til munandi skerjingar fyri makrel og svartkjaft.
Sagt varð, at Fiskimálaráðið/landsstýrið ikki visti um tilmælið, fyrrenn tað varð almannakunngjørt
30. septembur 2025.
Hettar samsvarar ikki við tær royndir, sum undirritaði hevur úr Fiskimálaráðnum, tá Fiskimálaráðið
varð kunnað um komandi tilmælið av føroyska umboðnum í arbeiðsbólkinum umleið ein mánað,
áðrenn tað varð almannakunngjørt.
Tað bar ikki til at fáa svar frá landsstýrismanninum í Løgtinginum tórsdagin 2. oktobur 2025, tí
hann tók ikki orðið. Tí verða hesir spurningar settir landsstýrismanninum.
Á Løgtingi 6. oktobur 2025
Jacob Vestergaard

-- 1 of 1 --