52-024/2025

B A R N A - O G Ú T B Ú G V I N G A R M Á L A R Á Ð I Ð
J. H. Schrøtersgøta 7 • FO-100 Tórshavn • Tel: +298 306500 • bumr@bumr.fo
Løgtingið 	10. oktober 2025
Tinghúsvegur 1-3 	Mál: 22/22133-143
100 Tórshavn 	Viðgjørt: JáR
Svar
upp á
skrivligan fyrispurning nr. 52-024/2025 eftir § 52a í Tingskipanini frá Liljan Weihe,
løgtingskvinnu, settur Djóna Nolsøe Joensen, landsstýrismanni í barna- og
útbúgvingarmálum
Evni: Útbúgvin á Heilsuskúlanum
Spurningurin er soljóðandi:
1. Hvussu nógv heilsustarvsfólk eru útbúgvin á Heilsuskúlanum síðani 2006?
2. Hvussu stórt hevur fráfalsprosentið verið síðani 2006?
3. Hvussu nógv eru upptikin á Heilsuskúlanum síðani 2006 í mun til tøk upptøkupláss hesi
árini?
Svar
Til 1: Heilsurøktaraútbúgvingin byrjaði í 2006, so tey fyrstu próvtølini eru frá 2008. Tøl frá
Heilsuskúlanum vísa, at í alt hava 299 heilsurøktarar fingið prógv í tíðarskeiðinum 2008 til 2025.
Fyri Heilsuhjálparaútbúgvingina eru tøl aftur til 2006. Í alt hava 525 heilsuhjáparar fingið prógv árini
2006-2025.
Verður hugt nærri eftir tølunum, hava í miðal 30 heilsuhjálparar fingið prógv um árið árini 2006-
2020. Síðan 2021 er talið tó fallið, og í miðal hava um 15 heilsuhjálparanæmingar fingið prógv um
árið síðan 2021.
Tøl fyri heilsurøktaranæmingar árini 2008-2025 vísa, at í miðal hava umleið 17 heilsurøktarar fingið
prógv um árið.
Til. 2: Fyri báðar útbúgvingar er galdandi, at fráfalsprosentið sveiggjar nakað.
Í miðal hevur fráfallið verið um 20% fyri tíðarskeiðið 2008-2025 fyri heilsurøktaranæmingarnar. Í
miðal hevur fráfallið verið um 18 % fyri heilsuhjálparanæmingarnar árini 2006-2025. Fyri báðar
útbúgvingarnar er galdandi, at nøkur ár er fráfallið væl minni, og nøkur ár væl meira, sum ávirkar
samlaða miðaltalið.
Til 3: Heilsuhjálparaflokkarnir hava havt 48 tøk pláss um árið fyri tíðarskeiðið 2006 til 2025. Fram
til 2019 vóru umleið 75-100% av tøku plássunum brúkt. Frá 2020 lækkaði talið tó niður á 30-55% av
tøku plássunum, sum vóru brúkt.

-- 1 of 2 --

B A R N A - O G Ú T B Ú G V I N G A R M Á L A R Á Ð I Ð
J. H. Schrøtersgøta 7 • FO-100 Tórshavn • Tel: +298 306500 • bumr@bumr.fo
2/2
Fyri heilsurøktarar hevur ein flokkur verið boðin út frá 2006 til 2014 við 25 plássum hvørt árið. Í
2014 lækkaði floksstøddin niður í 21 vegna avmarkað tal av starvsvenjingarplássum. Síðan 2024 hava
tvær upptøkur verið um árið og 17 starvsvenjingarpláss fyri hvørja upptøku, í alt 34 pláss um árið.
Árini 2006-2022 var talan um rættiliga fullsettar flokkar. Men síðan 2023 hava umleið helvtina av
tøku plássinum verið brúkt – serliga aftaná, at tvær upptøkur hava verið um árið og 34 tøk pláss.
Vinarliga
Djóni Nolsøe Joensen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Liljan Weihe, løgtingskvinna
Svarari: Djóni Nolsøe Joensen, landsstýrismaður í barna- og útbúgvingarmálum
Evni: Útbúgvin á Heilsuskúlanum
Spurningar:
1. Hvussu nógv heilsustarvsfólk eru útbúgvin á Heilsuskúlanum síðani 2006?
2. Hvussu stórt hevur fráfalsprosentið verið síðani 2006?
3. Hvussu nógv eru upptikin á Heilsuskúlanum síðani 2006 í mun til tøk
upptøkupláss hesi árini?
Viðmerkingar:
Vit útbúgva alt ov fá starvsfólk til eldraøkið – samstundis sum tørvurin á
røktarstarvsfólkum veksur við rúkandi ferð.
Framskrivingarnar hjá Búskaparráðnum vísa, at vit hava tørv á 450 fleiri
røktarársverkum í 2035, um tey, sum verða 80+ ára gomul í 2035 hava sama tørv og
somu umstøður sum í 2024. Hetta er bara orsakað av demografisku broytingunum í
samfelagnum, sum hava við sær, at vit gerast alsamt fleiri eldri.
Harafturat hevur verandi starvsfólkahópur rættiliga høgan miðalaldur, og roknast kann
við, at uml. 300 av teimum núverandi 950 ársverkunum á eldraøkinum eru givin á
arbeiðsmarknaðinum um 10 ár.
Tí er framtíðartørvurin á starvsfólkum upp ímóti 750 ársverk, um ikki munandi
broytingar verða framdar á økinum. Og nógv arbeiða niðursetta tíð, so tørvurin á
starvsfólkum verður munandi.
Frágreiðingin hjá Búskaparráðnum, Kommunubúskapurin og eldraøkið, vísir á, at
staðsetingin av Heilsuskúlanum er ein avbjóðing. Tað sama hava kommunur og
fakfeløg gjørt vart við.
Vit mugu tí útbúgva fleiri starvsfólk til eldraøkið, samstundis sum onnur átøk eisini
mugu fremjast. Fyri at kunna kjakast um hetta á upplýstum grundarlagi, verða hesir
spurningar settir.
Á Løgtingi, 1. oktober 2025
Liljan Weihe

-- 1 of 1 --