52-020/2025

B A R N A - O G Ú T B Ú G V I N G A R M Á L A R Á Ð I Ð
J. H. Schrøtersgøta 7 • FO-100 Tórshavn • Tel: +298 306500 • bumr@bumr.fo
Løgtingið 26. september 2025
Tinghúsvegur 1-3 Mál: 22/22133-140
110 Tórshavn Viðgjørt: EØ
Svar
upp á
§ 52a fyrispurning nr. 52-020/2025 frá Liljan Weihe, løgtingskvinnu, settur Djóna Nolsøe
Joensen, landsstýrismanni í barna- og útbúgvingarmálum, um kanning um børn og ung, sum
eru send av landinum.
Fyrispurningurin er soljóðandi:
1. Hvussu nógv børn og ung eru send av landinum síðani apríl 1975, tá umsitingin av
barnaforsorgini bleiv flutt til Føroya?
2. Hvussu nógv børn eru send av landinum, síðani Føroyar fingu egna lóggávu á
barnaverndarøkinum í 2006?
3. Vil landsstýrismaðurin seta eina kanning í verk um handfaringina av hesum persónum, sum
seinastu 50 árini eru send av landinum?
Svar
Til 1 og 2: Innskriving á stovni uttanlands verður einans tikin, um avgerð somuleiðis er tikin um
umsorganaryvirtøku av barninum sambært § 19 í barnaverndarlógini, og heldur ein
umsorgarnaryvirtøka uppat, tá barnið gerst 18 ár, hetta sambært § 24 g í somu lóg.
Um eitt barn, sum er umsorganaryvirtikið, longu er innskrivað á stovni uttanlands, tá barnið gerst 18
ár, so kann Kærustovnurin taka avgerð um longda fyriskipan, men kann avgerð um longda fyriskipan
sambært § 15 b stk. 2, bert setast í verk, um tann ungi samtykkir, og kann í mesta lagi leingjast til
tann ungi fyllir 21 ár.
Sambært gomlu barnaforsorgarlógini, sum var galdandi fram til 31. desember 2005, var økið umsitið
av kommunalum barnaverndum, og hevði landið tá ein løgfrøðiligan ráðgeva at ráðgeva lokalu
barnaverndunum.
Í 2006 kom ein nýggj barnaverndalóg, og kom Høvuðsbarnaverndina tá at liggja hjá
Almannaverkinum.
Tann 1. juli 2023 varð Høvuðsbarnaverndin hjá Almannaverkinum tikin av, og virkisøkið flutt til
Føroya Kærustovn, har tað liggur í dag.

-- 1 of 2 --

B A R N A - O G Ú T B Ú G V I N G A R M Á L A R Á Ð I Ð
J. H. Schrøtersgøta 7 • FO-100 Tórshavn • Tel: +298 306500 • bumr@bumr.fo
2/2
Virkisøkið er sostatt flutt gjøgnum árini, og hevur hetta eisini viðvirkað til, at tað er torført at finna
tey neyvu tølini langt aftur í tíðina, og er skrásetingin av børnum, sum eru sett á stovn uttanlands,
eisini ymisk, sjá niðanfyri.
Fyri tíðarskeiðið 2015 og fram til í dag hevur Føroya Kærustovnur upplýst, at avgerð er tikin um at
innskriva tilsamans 13 ymisk børn á stovn uttanlands - øll í Danmark. Harumframt er eitt barn, har
avgerð bleiv tikin um innskriving á stovni uttanlands, men har barnið ikki flutti á stovn hóast alt.
Aldurin á børnum, sum vóru innskrivað á stovni hetta tíðarskeið, er : 3 børn í aldrinum 11-14 ár, og
10 børn í aldrinum 15-17 ár.
Í tíðarskeiðinum 2006 fram til í dag, hevur Almannaverkið upplýst, at tey bert kunnu upplýsa tøl fyri
tíðarskeiðið 2009-2015, og eru hesi tøl talið av fyriskipanum pr. ár., har talan kann vera um børn,
sum eru í fyriskipanum yvirum ár, og tí telja við í meira enn tí eina árinum, t.v.s. at eitt og sama barnið
gongur aftur yvirum ár.
Tølini eru hesi: í 2009 vóru tað 10 børn, í 2010 vóru tað 7 børn, í 2011 vóru tað 6 børn, í 2012 vóru
tað 7 børn, í 2013 vóru tað 3 børn, í 2014 vóru tað 2 børn og í 2015 vóru tað 2 børn. Viðmerkjast skal,
at hesi tøl eru tikin frá fíggjarlógaruppskotunum fyri m.a. 2010, 2013, 2015 og 2017 í sambandi við
virksemisyvirlitið, ið m.a. fevnir um tal av børnum pr. ár undir lógarbundnari játtan, sum er
stovnspláss uttanlands.
Almannaverkið hevur upplýst, at vegna tekniska avbjóðingar, hevur tað ikki eydnast teimum at finna
tølini fyri 2006-2008.
Almannaverkið hevur harnæst upplýst, at sambært ráðgevarunum hjá landinum, sum virkaðu í
1990´unum meðan økið varð umsitið av kommunalum barnaverndum, varð einki barn sett á
barnaverndarstovn uttanlands, av tí orsøk at tey ikki kundu rúmast á Føroya Barnaheimi ella hjá
fosturforeldrum.
Til 3: Eingin ítøkilig ætlan finst í løtuni at seta eina slíka kanning í verk um handfaringina av børnum,
sum eru send av landinum í sambandi við barnavernd. Spurningurin hevur tó verið frammi í sambandi
við eina meiri umfatandi kanning av teimum, sum eru send av landinum í sambandi við viðgerð og
uppihald í Danmark. Sum tað framgongur av svarinum til undanfarnu spurningar, so finst ikki nakað
samlað yvirlit fyri alt tíðarskeiðið. Umhugsað verður í landsstýrinum at fara undir eina slíka kanning,
sum fer at krevja bæði játtan og tíð fyri at verða framd.
Vinarliga
Djóni Nolsøe Joensen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Liljan Weihe, løgtingskvinna
Svarari: Djóni Nolsøe Joensen, landsstýrismaður í barna- og útbúgvingarmálum
Evni: Kanning um børn og ung, sum eru send av landinum
Spurningar:
1. Hvussu nógv børn og ung eru send av landinum síðani apríl 1975, tá
umsitingin av barnaforsorgini bleiv flutt til Føroya?
2. Hvussu nógv børn eru send av landinum, síðani Føroyar fingu egna lóggávu á
barnaverndarøkinum í 2006?
3. Vil landsstýrismaðurin seta eina kanning í verk um handfaringina av hesum
persónum, sum seinastu 50 árini eru send av landinum?
Viðmerkingar:
Í 50 ár hava vit havt ábyrgd av barnaverndarøkinum. Umsitingin av barnaforsorgini
kom á føroyskar hendur í 1975, og í 2006 varð málsøkið yvirtikið, og vit fingu
føroyska lóggávu á økinum.
Áðrenn føroyska barnaverndarlógin kom, var økið umsitið eftir danskari lóg um
barnaforsorg, sum var sett í gildi í Føroyum í 1960. Lógin hevði sín uppruna í donsku
forsorgarlógini frá 1933.
Hóast umsiting og lógarverk hevur verið á føroyskum hondum eina hálva øld, so
senda vit framvegis børn og ung av landinum, tí vit siga okkum ikki megna at taka
okkum av teimum.
Tað er trupult at fáa neyvt innlit í barnaverndarøkið í Føroyum. Bæði tí økið er sárt og
privat, men eisini tí umsitingin er býtt millum land og kommunur. Ein frágreiðing er
skrivað um barnaforsorgina í 2000, men tað er sera ringt at fáa innlit í, hvussu nógv
børn og ung eru send av landinum av føroyskum myndugleikum seinastu hálvu
øldina, tí vit ikki hava raðfest at hava nøktandi tilboð til tey í Føroyum.
Ein kanning av barnaverndarøkinum seinastu 50 árini kann geva okkum innlit í
fortíðina og virðismikla vitan um, hvussu økið kann skipast frameftir.
Á Løgtingi, 16. september 2025
Liljan Weihe

-- 1 of 1 --