52-013/2025

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
23. september 2025
Mál: 25/24210-3
(at tilskila í svari)
Tygara skriv: 52-013/2025
Svar til skrivligan fyrispurning nr. 52-013/2025 frá Jenis av Rana, løgtingsmanni,
settur landsstýrismanninum í fiskivinnu- og samferðslumálum, Jóhan
Christiansen, um bíleggingar- og eftirlitsskipanina á suðuroyarleiðini
Fyrispurningurin er soljóðandi:
1. Hvussu nógv hevur nýggja bíleggingar- og eftirlitsskipanin á suðuroyarleiðini
kostað tí almenna og Strandferðsluni higartil?
2. Hvussu nógv verður rindað fyri bíleggingar- og eftirlitsskipanina um mánaðin?
3. Hvussu mong starvsfólk eru dagliga knýtt at nýggju skipanini?
4. Eru útlit til, at kostnaðurin minkar, sum tíðin líður?
5. Er vissa fingin um, at ikki aðrar skilabetri, vitanargrundaðar, minni órógvandi og
bíligari skipanir eru (eitt hugsað dømi er t.d. mynda- og videoskipanirnar, sum
verða brúktar í gjaldstunlunum)?
Svar til spurning 1
Bíleggingarskipanin:
Kostnaðurin fyri menning av bíleggingarskipanini til suðuroyarleiðina og hinar
oyggjaleiðirnar, sum Strandferðslan eigur og rekur, hevur verið hesin:
• 2024: 519.950 kr.
• 2025 (higartil): 333.000 kr.
Samlaði kostnaðurin fyri menning av bíleggingarskipanini hevur sostatt verið 852.950
kr.
Ferðslustýring (eftirlitsskipanin):
Kostnaðurin fyri ferðslustýringina hevur higartil verið:
• 2024 kr. 597.583 kr.
• 2025 kr. 1.273.572 kr.

-- 1 of 3 --

Fiskivinnu- og samferðslumálaráðið
2/3
Bíleggingarskipanin hevur gjørt tað lættari hjá ferðafólki at ferðast við oyggjaleiðum.
Nú slepst undan at standa í bíðirøðum í tímavís áðrenn fráferð, uttan at vita, um pláss
er umborð, og hetta eru ferðafólk fegin um. Eisini eru ábendingar um, at fleiri útlendsk
ferðafólk velja at ferðast við oyggjaleiðum, tí tey nú kunnu bíleggja sær pláss
frammanundan.
Harumframt hevur bíleggingarskipanin eisini gjørt tað munandi lættari hjá
starvsfólkunum umborð á strandfaraskipunum at leggja arbeiðið til rættis, tí tey nú vita
frammanundan, hvussu nógv akfør, ferðafólk og farmur er við á hvørjum túri. Við at
kunna skipa farmin betri, er tað ikki longur tørvur á at leiga eykaskip sum Herjólf til
farmaflutning um Suðuroyarfjørð. Hetta hevur í sjálvum sær givið eina munandi
sparing fyri landskassan.
Svar til spurning 2
Bíleggingarskipanin:
Strandferðslan eigur bíleggingarskipanina, og servarar og dátabasi liggja á
hýsingarumhvørvinum hjá Landsneti. Tí er kostnaðurin lutfalsliga lágur í mun til aðrar
skipanir.
• Umsiting og support: 7.000 kr. um mánaðin u/mvg.
• Servari: Servaragjald hjá Landsneti er umleið 350 kr. um mánaðin u/mvg.
• Dátabasi: Dátabasuhotell gjaldið hjá Landsneti er 795 kr. u/mvg og umfatar
umsiting av dátubasuni til bíleggingarskipanina.
• Samanlagt: Íalt er fasta gjaldið av bíleggingarskipanini 8.145 kr. u/mvg um
mánaðin.
Eftirlitsskipanin:
Miðal kostnaður fyri vaktarhald á bæði Krambatanga og í Tórshavn hevur higartil í
2025 tilsamans verið 41.082 kr. pr. viku ella 181.938 kr. um mánaðin. Síðani 1. august
hevur Strandferðslan yvirtikið eftirlitsarbeiðið við landgongdina á Smyrli. Orsakað av
hesum og øðrum tillagingum, fer útreiðslan til eftirlit og ferðslustýring at lækka
komandi tíðina.
Svar til spurning 3
Eingi nýggj starvsfólk eru sett hjá Strandferðsluni í sambandi við nýggju
bíleggingarskipanina og eftirlitsskipanina. Tey starvsfólk, sum áður tóku sær av sølu
av ferðaseðlum kring landið, nýta nú nýggju skipanina sum ein natúrligan part av
sínum vanligu arbeiðsuppgávum, so sum at skanna bíleggingar, selja ferðaseðlar og
vegleiða ferðandi.
Á suðuroyarleiðini er tó tann serliga støðan, at ein uttanhýsis veitari er knýttur at
uppgávuni at stýra bilrøðunum. Talan er um 1-2 starvsfólk á farstøðini í Tórshavn, alt
eftir hvønn túr talan er um, og 1-2 starvsfólk á Krambatanga, alt eftir hvønn túr talan er
um.
Svar til spurning 4
Kostnaðurin av eftirlitsskipanini er lækkaður, síðani skipanin varð sett í verk.

-- 2 of 3 --

Fiskivinnu- og samferðslumálaráðið
3/3
Tá ið bíleggingarskipanin fyri ferðandi til gongu varð sett í verk í vár, vórðu uttanhýsis
starvsfólk nýtt til at stýra bilrøðunum og til at hava eftirlit við landgongdini. Tað vísti
seg tó, at manningin umborð á Smyrli kundi yvirtaka uppgávuna við landgongdina sum
ein part av sínum vanligu arbeiðsuppgávum. Tørvurin á uttanhýsis starvsfólkum til
hesa uppgávu fall tí burtur, og hesin kostnaður er sostatt spardur burtur.
Strandferðslan arbeiðir miðvíst við framhaldandi at finna tekniskar loysnir, sum kunnu
minka um tørvin á starvsfólki til ferðslustýringina, uttan at hesar loysnir gerast ov
kostnaðarmiklar.
Svar til spurning 5
Verandi skipan verður mett at vera tann besta skipanin, tá hædd verður tikin fyri
samlaða tørvinum hjá Strandferðsluni. Ein sjálvvirkin skipan kann ikki loysa
uppgávuna hjá Strandferðsluni av hesum orsøkum:
1. Skráseting av ferðafólki: Í tunlum verður bert akfarið skrásett. Prísskipanin hjá
Strandferðsluni er grundað á akfar við førara og gjald fyri hvørt eyka ferðafólk í
akfarinum.
2. Avmarkað pláss og ferðslustýring: Plássið á havnarløgunum er minni enn
kapasiteturin umborð, og tí er neyðugt við virknari ferðslustýring fyri at skipa
bilrøðirnar. Hesa fysisku avbjóðing hevði ein sjálvvirkin skipan ikki kunnað loyst,
og tí er manning á økinum framhaldandi neyðug til ávísar túrar. Tað er eisini
vanligt, at manning og/ella onnur fólk hjálpa til á økinum.
3. Samskipan av farmi: Ein avgerandi partur av virkseminum á suðuroyarleiðini
er farmaflutningur. Bíleggingarskipanin tryggjar, at plássið umborð verður nýtt á
best møguligan hátt til bæði akfør og farm. Ein einføld videoskipan hevur ongar
møguleikar at handfara hesa kompleksu uppgávu.
Strandferðslan hevur kannað kostnaðin av sjálvvirknum check-in skipanum. Ein
partvís sjálvvirkin loysn, sum kortini krevur manning, er mett at kosta áleið 3-4 milliónir
krónur. Afturat hesum koma ókendir, men hægri kostnaðir fyri at samkoyra eina slíka
skipan við verandi bíleggingarskipan hjá Strandferðsluni.
Strandferðslan hyggur eftir møguleikum fyri eini partvíst sjálvvirknari skipan, sum
møguliga kann lækka manningartørvin. Verandi skipan verður tó fyribils mett at vera
ein munandi bíligari og meira smidlig loysn.
Jóhan Christiansen
landsstýrismaður

-- 3 of 3 --

Skrivligur fyrispurningur
eftir § 52a í Tingskipanini
Spyrjari: Jenis av Rana, løgtingsmaður
Svarari: Jóhan Christiansen, landsstýrismaður í fiskivinnu- og samferðslumálum
Evni: Bíleggingar- og eftirlitsskipanin á suðuroyarleiðini
Spurningar:
1. Hvussu nógv hevur nýggja bíleggingar- og eftirlitsskipanin á suðuroyarleiðini
kostað tí almenna og Strandferðsluni higartil?
2. Hvussu nógv verður rindað fyri bíleggingar- og eftirlitsskipanina um
mánaðin?
3. Hvussu mong starvsfólk eru dagliga knýtt at nýggju skipanini?
4. Eru útlit til, at kostnaðurin minkar, sum tíðin líður?
5. Er vissa fingin um, at ikki aðrar skilabetri, vitanargrundaðar, minni órógvandi
og bíligari skipanir eru (eitt hugsað dømi er t.d. mynda- og videoskipanirnar,
sum verða brúktar í gjaldstunlunum)?
Viðmerkingar.
Í júst hesum døgum, har orð (s)um sparingar, nýskipanir (reformar), haldføri,
effektiviseringar, nýskipanarnevnd v.m. flúgva um oyru okkara, hevði verið
áhugavert at frætt, um samband er millum teori og praksis á økinum. Er t.d. skil í tí
“kontrollsystemi”, sum er sett í verk á suðuroyarleiðini, ella er talan um, sum mong
vilja verða við, tað bera oyðsl.
Á Løgtingi, 10. september 2025
Jenis av Rana

-- 1 of 1 --