52-012/2025

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
22. september 2025
Mál: 25/24132-3
(at tilskila í svari)
Tygara skriv: 52-012/2025
Svar til skrivligan fyrispurning nr. 52-012/2025 frá Karlot Hergeirsson,
løgtingsmanni, settur landsstýrismanninum í fiskivinnu- og samferðslumálum,
Jóhan Christiansen, um Teistan og kalsoyarleiðina og nýggju
bíleggingarskipanina hjá SSL
Fyrispurningurin er soljóðandi:
1. Eru kalsoyingar tiknir uppá ráð í sambandi við ætlanirnar á kalsoyarleiðini?
2. Eru nólsoyingar tiknir uppá ráð í sambandi við ætlanirnar á kalsoyarleiðini?
3. Er støða tikin til, um Teistin fer norður á kalsoyarleiðina?
4. Um nei, nær verður støða so tikin?
5. Nær kunnu pendlarar vænta sær eina loysn í nýggju bíleggingarskipanini?
Svar til spurning 1
Tá Sandoyartunnilin lat upp, og avgjørt varð, at Teistin ikki skuldi seljast, var hetta ein
góður møguleiki at seta Teistan inn fyri 50 ára gamla Sam, sum hevur tænt fyri seg
sum ferðafólkaskip á kalsoyarleiðini. Ístaðin fer Sam nú at virka sum eykaskip,
avloysaraskip og farmaskip.
Skipaflotin hjá Strandferðsluni skal dagførast. Tí er at fegnast um, at landsstýrið hevur
gjørt av, at eitt nýtt skip til Kalsoynna skal prosjekterast, og sum nú er klárt at bjóða út.
Ímeðan kalsoyarskipið er teknað, hava fundir verið við ein fylgibólk, har umboð fyri
Kalsoynna hava luttikið, umframt umboð fyri manningarnar hjá Strandferðsluni, ið hava
siglt á kaloysarleiðini í mong ár.
Ein týðandi spurningur hevur verið, um nýggja skipið skal taka 20 bilar ella 12-13 bilar,
sum Sam tekur í dag. Í samskiftinum í fylgibólkinum hava umboð fyri bæði oynna og
verandi skip váttað, at tey taka undir við, at skipið tekur 20 bilar, tí tað er ov stuttskygt
at byggja eitt skip, sum ikki tekur fleiri bilar enn Sam tekur í dag.
Á eftirmetingarfundi við kalsoyingar eru staðbundnu nevndirnar kunnaðar um
ætlanirnar og tekningarnar av skipinum. Strandferðslan hevur kunnað oyggjafólkið um,

-- 1 of 2 --

Fiskivinnu- og samferðslumálaráðið
2/2
at skuldi tað hent, at tað verða ov nógvir bilar, og at tað kemur at órógva virksemið í
oynni, so ber til hjá Strandferðsluni at lækka talið av bilum í bíleggingarskipanini. Tað
sama er í dag galdandi fyri Teistan.
Svar til spurning 2.
Tað er fyrst og fremst Strandferðslan, ið ger av, hvar skipini sigla. Hóast
Strandferðslan sjálvandi í so stóran mun sum gjørligt leggur seg eftir at lurta eftir
oyggjafólki og øðrum brúkarum, so eru nólsoyingar ikki tiknir upp á ráð í sambandi við
ætlanirnar á kalsoyarleiðini.
At tað er Teistin, og ikki Ternan, sum skal sigla á kalsoyarleiðini inntil nýggja skipið er
bygt, er serliga tí Teistin hevur betri manøvrueginleikar enn Ternan. Hesum er tað
munandi meira brúk fyri á Syðradali enn tað er í Nólsoy. Ternan hevur onkuntíð verið
roynd á kalsoyarleiðini, og tað er greitt, at hon hóskar seg ikki serliga væl á hesi
farleið. Harumframt er ferðafólkatalið á kalsoyarleiðini nýliga farið upp um
ferðafólkatalið á nólsoyarleiðini. Í dag verða nærum tvífalt so nógv akfør flutt um
Kalsoyarfjørð enn um Nólsoyarfjørð.
Svar til spurning 3 og 4.
Ja, avgerð er tikin um, at Teistin fer norður á kalsoyarleiðina. Hetta er eisini ein
avgerð, sum Strandferðslan hevur kunnað um alment seinastu tvey árini. Ferjulegan á
Syðradali er nýliga liðugt umbygd, so hon kann hýsa Teistanum og nýggja
kalsoyarskipinum. Avtalað er við Klaksvíkar kommunu, at Teistin kann brúka
Stóru/Longu kei vestanfyri, ímeðan umbyggingarnar av verandi hydraulisku rampuni
verða gjørdar. Arbeiðið verður fyrireikað nú, soleiðis at Teistin kann fara norður á
kalsoyarleiðina.
Svar til spurning 5.
Bíleggingarskipanin fyri ferðafólk var sett í verk 8. apríl í ár. Eitt av endamálunum er at
kunna skilja ímillum fólk, sum eru búsitandi í Føroyum og fólk, sum ikki eru búsitandi í
Føroyum.
Hesa tíðina eru týðandi royndir gjørdar við bíleggingarskipanini, og tí ber nú til hjá
Strandferðsluni at seta skipanir í verk, sum m.a. skulu gera tað lættari at ferðast hjá
pendlarum, pensjónistum, bólkum og børnum.
Loysnin fyri pendlarar er ment og verður í løtuni roynd innanhýsis á Strandferðsluni.
Fyrst í oktober verður skipanin latin upp fyri útvaldum brúkarum at royna fyri at tryggja,
at hon virkar til fulnar. Síðani verður væntandi latið upp fyri almenninginum í
november.
Jóhan Christiansen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Karlot Hergeirsson, løgtingsmaður
Svarari: Jóhan Christiansen, landsstýrismaður í fiskivinnu- og samferðslumálum
Evni: Teistin og kalsoyarleiðin og nýggja bíleggingarskipanin hjá SSL
Spurningar:
1. Eru kalsoyingar tiknir uppá ráð í sambandi við ætlanirnar á kalsoyarleiðini?
2. Eru nólsoyingar tiknir uppá ráð í sambandi við ætlanirnar á kalsoyarleiðini?
3. Er støða tikin til, um Teistin fer norður á kalsoyarleiðina?
4. Um nei, nær verður støða so tikin?
5. Nær kunnu pendlarar vænta sær eina loysn í nýggju bíleggingarskipanini?
Viðmerkingar:
Sum skilst so er eitt stórt ynski hjá leiðsluni í Strandfaraskipum Landsins at hava Sam
tøkan til farmasigling allar 24 tímarnar, allar 365 dagar í árinum, og tí vil leiðslan í
SSL seta Teistan inn á kalsoyarleiðina, so at Sam er altíð tøkur. Ígjøgnum miðlarnar
frættist, at kalsoyingar ikki eru so glaðir fyri hetta, tí tað fer at skapa ferðsluruðuleika
í Kalsoynni, og nólsoyingar eru aldeilis ikki glaðir fyri hetta, tí tað hevur stóra ávirkan
á trivnaðin, rættvísi og rímiligheit hjá nólsoyingum. Um SSL flytur Teistan norður, so
gerast fólk misnøgd. Eingin vinnari, bara taparar. Hinvegin, um SSL bíðar við at flyta
runt uppá skipini, til tann nýggja ferjan er smíðað, so eru tey allarflestu nøgd.
Nýggja bíleggingarskipanin hjá SSL er ikki serliga brúkaravinarlig hjá pendlarum. Nú
er skjótt eitt hálvt ár síðani nýggja skipanin kom, og tá varð sagt, at arbeitt varð við
eini loysn til pendlarar, soleiðis at tað var nemmari hjá teimum at brúka skipanina.
Fyri at fáa greiðu á hesum viðurskiftum verða hesir fyrispurningar settir.
Á Løgtingi, 9. september 2025
Karlot Hergeirsson

-- 1 of 1 --