52-106/2024

LØGMÁLARÁÐIÐ
M I N I S T R Y O F J U S T I C E
Gongin 7 • Postrúm 377 • FO-110 Tórshavn
 (+298) 35 80 80 •  lmr@lmr.fo • www.lmr.fo
Løgtingið
Tinghúsvegur 1-3Postboks 208
110 Tórshavn
Tórshavn, tann: 18. juni 2025
J. nr.: 25/14160-2
Viðgjørt: GMN
Svar upp á
skrivligan fyrispurning nr. 52-106/2024 eftir § 52 a í Tingskipanini til Bjarna K. Petersen,
landsstýrismann frá Magnusi Rasmussen, løgtingsmanni, um arbeiðs- og uppihaldsloyvi
Fyrispurningurin var soljóðandi:
1. Hvussu nógv nýggj arbeiðs- og uppihaldsloyvi eru givin higartil í 2025?
2. Hvussu nógv arbeiðs- og uppihaldsloyvi eru endurnýggjað í 2025?
3. Hvussu eru hesi tøl, sammett við trý tey seinastu árini?
4. Verða allar umsóknirnar viðgjørdar líka skjótt, sum áðrenn avgerðarmyndugleikin kom á
føroyskar hendur, t.e. sum eftir Fast–Track skipanini?
5. Um ikki, hvørjar eru so orsakirnar, og hvat ætlar landsstýrismaðurin at gera fyri at fáa
umsóknirnar viðgjørdar líka skjótt, sum áðrenn avgerðarmyndugleikin kom á føroyskar
hendur?
Svar
Til nr. 1
Tað eru givin 563 arbeiðs- og uppihaldsloyvi í ár fram til 16. juni (296 í 1. ársfjórðingi og 267 í 2.
ársfjórðingi til 16. juni). Tølini viðvíkja arbeiðsloyvum og ikki familjusameining. Tølini umfata
ikki afturferðaloyvi, góðkenningar av arbeiðsgevara eftir fast-track avtaluni ella undangóðkenning
til ES-skipanina.
Til nr. 2
Tað eru framlongd 42 arbeiðsloyvir í ár (24 í 1. ársfjórðingi og 18 í 2. ársfjóðringi til 16. juni).
Sum nevnt omanfyri viðvíkja tølini arbeiðsloyvum og ikki familjusameining.

-- 1 of 4 --

LØGMÁLARÁÐIÐ
M I N I S T R Y O F J U S T I C E
2/4
Til nr. 3
1. september 2024 yvirtók Útlendingastovan avgerðarmyndugleikan í flestum málum á
útlendingaøkinum. Umsóknir, sum vóru latnar inn áðrenn 1. september 2024, verða tó viðgjørdar
av SIRI – Styrelsen for International Rekruttering og Integration, meðan mál, sum verða latin inn
eftir 1. september 2024, verða viðgjørd av Útlendingastovuni.
Tølini eru tikin úr málsviðgerðarskipanini hjá Útlendingastovuni. Talan er sostatt ikki um ein
hagtalsbanka, men eina málsviðgerðarskipan, og tí má fyrivarni takast fyri, at tað kunnu koma
ávísir skeivleikar fyri.
Tølini viðvíkjandi arbeiðsloyvum seinastu trý árini eru hesi:
SIRI – Styrelsen for International Rekruttering og Integration
2022 Tils.
Upprunaloyvi 1653
Framleingjan 572
2225
2023 Tils.
Upprunaloyvi 1286
Framleingjan 766
2052
2024 Tils.
Upprunaloyvi 921
Framleingjan 772
1693
2025, pr. 7/4 Tils.
Upprunaloyvi 2
Framleingjan 14
16

-- 2 of 4 --

LØGMÁLARÁÐIÐ
M I N I S T R Y O F J U S T I C E
3/4
Útlendingastovan (yvirtók mál 1. september 2024)
2024 Tils.
Upprunaloyvi 200
Framleingjan 38
238
2025, pr. 16/6 Tils.
Upprunaloyvi 563
Framleingjan 39
602
Til nr. 4
Málsviðgerðartíð
Upprunaloyvir, miðal viðgerðartíð, fyri tíðarskeiðið 1. ársfj. 2025:
Mál eftir Fast Track-avtaluni: 47 dagar
Mál eftir ES-lógini: 31 dagar
Fyri mál eftir ítróttaravtaluni: 21 dagar
Væntaða málsviðgerðartíðin fyri mál eftir Fast Track-avtaluni, mál eftir ES-lógini og mál eftir
ítróttaravtaluni, er 30 dagar. Tølini vísa, at mál eftir Fast Track-avtaluni hava í miðal tikið 47 dagar
at avgreiða í 1. ársfjórðingi í 2025. Meðan tað eftir ES-lógini og ítróttaravtaluni er ávikavíst 31 og
21 dagar.
Sostatt er tað serliga mál eftir Fast Track-avtaluni, ið taka longri tíð enn upplýst frammanundan.
Ávísar grundir kunnu vera fyri hesum, eitt nú at upplýsingar mangla á júst hesum málinum.
Staðfestast má, at vanliga málsviðgerðin á arbeiðsøkinum tekur longri tíð enn ynskiligt, og at hetta
kann hava neiligar avleiðingar fyri borgarar og aðrar viðkomandi partar.
Til nr. 5
Orsøkin til longu viðgerðartíðina er samansett. Økið er nýtt og framvegis undir uppbygging – bæði
fakliga og skipanarliga. Hetta inniber, at tað er neyðugt hjá Útlendingastovuni at menna

-- 3 of 4 --

LØGMÁLARÁÐIÐ
M I N I S T R Y O F J U S T I C E
4/4
mannagongdir, málsviðgerðarskipanir og fakligar førleikar, samstundis sum sjálv málsviðgerðin
fer fram. Hetta ger arbeiðsgongdina meira tíðarkrevjandi í byrjanini.
Stovnurin er harumframt lítil og hevur ikki møguleika at gagnnýta teir fyrimunir, ið størri eindir
hava – so sum journaleindir, móttøkueindir, uppbýtta málsviðgerð og automatiseraðar skipanir,
sum eru tøkar í størri fyrisitingum, t.d. hjá SIRI og Udlændingestyrelsen.
Tað ber heldur ikki til at samanbera málsviðgerðartíðirnar beinleiðis, tí málini hjá
Útlendingastovuni hava vanliga eina longri og meira samansetta málsgongd enn málini hjá teimum
donsku myndugleikunum.
Áðrenn yvirtøkuna var uppgávan hjá Útlendingastovuni at upplýsa og lata eitt tilmæli ella frámæli
í málinum, meðan endaliga avgerðin varð tikin aðrastaðni. Eftir at málsviðgerðin varð flutt heim,
liggur alt viðgerðararbeiðið nú hjá stovninum. Hetta merkir í praksis, at Útlendingastovan í
hvørjum einstøkum máli skal útinna alla málsviðgerðina, og samstundis – tvær ferðir í hvørjum
máli – senda eitt bindandi tilmæli til antin SIRI ella Udlændingestyrelsen, áðrenn ein endalig
avgerð kann verða latin viðkomandi pørtum. Hetta ger málsviðgerðina meira drúgva.
Útlendingastovan arbeiðir miðvíst við at styrkja innanhýsis skipanir, tryggja betri yvirlit yvir
málsbyrðu og málsstøðu, og at menna fakligu førleikarnar á økinum. Hóast royndir at effektivisera
arbeiðið, er tað vorðið meira greitt, at ein meira varandi og haldfør loysn má til.
Landsstýrismaðurin arbeiðir tí við at finna út av, hvørjar ítøkiligar loysnir skulu til, fyri at økið
framhaldandi verður ment, og viðgerðartíðir styttar.

-- 4 of 4 --

Skrivligur fyrispurningur
eftir § 52a í Tingskipanini
Spyrjari: Magnus Rasmussen, løgtingsmaður
Svarari: Bjarni Kárason Petersen, landsstýrismaður í lógarmálum
Evni: Arbeiðs- og uppihaldsloyvi
Spurningar:
1. Hvussu nógv nýggj arbeiðs- og uppihaldsloyvi eru givin higartil í 2025?
2. Hvussu nógv arbeiðs- og uppihaldsloyvi eru endurnýggjað í 2025?
3. Hvussu eru hesi tøl, sammett við trý tey seinastu árini?
4. Verða allar umsóknirnar viðgjørdar líka skjótt, sum áðrenn
avgerðarmyndugleikin kom á føroyskar hendur, t.e. sum eftir Fast–Track
skipanini?
5. Um ikki, hvørjar eru so orsakirnar, og hvat ætlar landsstýrismaðurin at gera
fyri at fáa umsóknirnar viðgjørdar líka skjótt, sum áðrenn
avgerðarmyndugleikin kom á føroyskar hendur?
Viðmerkingar:
Tann 1. september í 2024 komu flestu mál innan útlendingaøkið undir føroyskan
avgerðarmyndugleika.
Sambært heimasíðuni hjá Løgmálaráðnum merkir broytingin, at allar umsóknir um
fyribils uppihalds- og arbeiðsloyvi viðvíkjandi familjusameining, arbeiði (eisini eftir
ítróttaravtaluni, Fast-Track-avtaluni og ES-lógini), sjálvstøðugt vinnurekandi, lesandi,
starvsnæmingar, granskarar, trúboðarar, umframt samfylgjandi familja teirra og au-
pair, verða viðgjørdar av Útlendingastovuni.
Nú gott og væl hálvt ár er liðið síðani hesa broyting, so er áhugavert at vita, hvørt
viðgerð og avgreiðsla av arbeiðs- og uppihaldsloyvum verður líka skjótt avgreidd,
sum eftir at Fast-Track avtalan varð gjørd á heysti 2021.
Á Løgtingi, 6. juni 2025
Magnus Rasmussen

-- 1 of 1 --