52-104/2024

L Ø G M A N S S K R I V S T O V A N
P r i m e M i n i s t e r ´ s O f f i c e
Tinganes - Fo-100 Tórshavn – Faroes
Tel: (+298)306000 – e-mail: info@tinganes.fo - www.lms.fo
Løgtingið
Svar
uppá
skrivligan fyrispurning nr. 124/2024 eftir tingskipanini § 52a til Aksel V. Johannesen, løgmann,
frá Anniku Olsen, løgtingskvinnu, um ríkisrættarligu støðu Føroya
Fyrispurningurin var soljóðandi:
1. Hvussu gongur við arbeiðinum viðvíkjandi ríkisrættarligu støðu Føroya?
2. Væntar løgmaður, at ein niðurstøða fæst áðrenn ríkisfundin, sum verður í summar?
Svar:
Til spurning 1 og 2
Tíðliga í ár hevði eg tveir fundir við floksforfólkini í øllum flokkum á tingi um ríkisrættarligu støðuna.
Yvirskipað er tað mín greiða fatan eftir hesar fundir, at allir flokkar eru samdir um, at verandi støða ikki
kann halda fram óbroytt, og at stóra avbjóðingin er, at Føroyar tørva størri uttanríkispolitiskar
heimildir.
Hesum arbeiði eg víðari við. Tað er somuleiðis mín fatan, at flestu flokkar ynskja eina skipan, sum
gevur Føroyum uttanríkispolitiskar heimildir, og sum byggir á samstarv millum javnbjóðis lond í einum
felagsskapi.
Á ríkisfundinum, sum verður í Føroyum í næstu viku, verður greitt yvirskipað frá støðuni hjá Føroyum,
men ætlanin er ikki at leggja nakað ítøkiligt uppskot fram. Eg haldi, tað er rætt at hava virðing fyri at
Danmark og Grønland nærum hava verið í uttanríkispolitiskari undantaksstøðu seinasta hálva árið. Tað,
sum hevur týdning, er, at arbeiðið verður gjørt rætt og væl, og í so breiðari semju sum møguligt. Bæði
innanhýsis í Føroyum, og millum Føroyar og Danmark.
Í Tinganesi, 10. juni 2025
Aksel V. Johannesen
løgmaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Annika Olsen, løgtingskvinna
Svarari: Aksel V. Johannesen, løgmaður
Evni: Ríkisrættarliga støða Føroya
Spurningar:
1. Hvussu gongur við arbeiðinum viðvíkjandi ríkisrættarligu støðu Føroya?
2. Væntar løgmaður, at ein niðurstøða fæst áðrenn ríkisfundin, sum verður í
summar?
Viðmerkingar
Tað vóru góð tíðindi, tá løgmaður kallaði allar flokkar inn til fundar at viðgera
ríkisrættarligu støðu Føroya fyrr í ár. Forfólk í teimum føroysku flokkunum vóru
alment frammi um, at nú mátti okkurt gerast, tí støðan serliga á uttanríkispolitiska
økinum als ikki var nøktandi. Eykasending var í Kringvarpi Føroya um málið, og
stevið og viljin til at finna eina semju um at víðka heimildirnar hjá Føroyum og at
skipa Føroyar sum eitt sjálvstøðugt land, tóktust ongantíð at vera nærri enn tað sama.
Tað skuldi arbeiðast hart og skjótt, tí ætlanin var at leggja eina niðurstøðu fram á
ríkisfundinum, sum verður í summar. Men síðan hevur ikki nógv verið at frætta
alment um hetta málið, og tí verða hesir spurningar settir løgmanni.
Á Løgtingi, 27. mai 2025
Annika Olsen

-- 1 of 1 --