52-102/2024

Løgtingið Tórshavn, 16. mai 2025
Tinghúsvegur 1-3 Journalnr.: 25/11536
100 Tórshavn
Svar frá Sirið Stenberg, landsstýriskvinnu, upp á § 52a fyrispurning nr. 52-102/2024 frá
Hannu Jensen, løgtingskvinnu, um løggilding av handverksmeistarum í byggivinnuni
Spurningurin var soljóðandi:
1. Hvussu gongur við at fyrireika lógaruppskot um løggilding av handverksmeistarum í
byggivinnuni?
2. Nær kann ein slík løggilding fáast at virka á føroyska byggimarknaðinum?
3. Eru allar aðrar fortreytir, eitt nú neyðuga meistaraútbúgvingin, loknar til ta tíð, ein slík
løggilding ætlandi skal setast í verk?
Til nr. 1
Ætlandi skuldi uppskot til løgtingslóg um løggilding av handverksmeistarum verða lagt fyri
Løgtingið í vár. Hetta eydnaðist ikki, men málið er framvegis, um undirtøka fæst fyri hesum millum
samgonguflokkarnar, at koma á mál við arbeiðinum at gera lóggávu um løggilding av
handverksmeistarum. Er politisk undirtøka fyri málinum, verður lógaruppskot lagt fram seint í
komandi tingsetu.
Løggilding av handverksmeistarum viðvíkur málsøkjum hjá fleiri landsstýrisfólkum, og mugu
Barna- og útbúgvingarmálaráðið og Umhvørvismálaráðið vera partur í arbeiðinum at fyrireika
lóggávuna.
Til nr. 2
Tað er ikki greitt, nær møgulig løggilding kann fáast at virka á føroyska byggimarknaðinum. Eisini
tað fer eitt møguligt lógaruppskot at taka støðu til.
Til nr. 3
Hóast ávísar fyrireikingar eru gjørdar, er tað ikki greitt, nær ein meistaraútbúgving kann fáast at
virka. Útbúgvingin skal fyrireikast, og tá eitt nýtt útbúgvingartilboð verður sett á stovn, skal ein
leistur finnast fyri at fíggja nýggju útbúgvingina. Hetta er eitt mál, sum fer at verða viðgjørt saman
við Barna- og útbúgvingarmálaráðnum.
Uttanríkis- og vinnumálaráðið, 16. mai 2025
Sirið Stenberg
landsstýriskvinna

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Hanna Jensen, løgtingskvinna
Svarari: Sirið Stenberg, landsstýriskvinna í uttanríkis- og vinnumálum
Evni: Løggilding av handverksmeistarum í byggivinnuni
Spurningar:
1. Hvussu gongur við at fyrireika lógaruppskot um løggilding av
handverksmeistarum í byggivinnuni?
2. Nær kann ein slík løggilding fáast at virka á føroyska byggimarknaðinum?
3. Eru allar aðrar fortreytir, eitt nú neyðuga meistaraútbúgvingin, loknar til ta
tíð, ein slík løggilding ætlandi skal setast í verk?
Viðmerkingar:
Nógv byggivirksemi er í Føroyum og hevur verið tað leingi. Ikki minst verður av
øllum alvi roynt at byggja bústaðir til tann stóra tørvin, og bústaðarbygging er eitt av
týdningarmestu málunum í okkara samfelagi.
Tá so er, kemur til sjóndar, hvussu stórur tørvur er á eitt nú meistaraútbúgving og
løggilding innan byggivinnuna, bæði fyri at tryggja góðsku og trygd í arbeiðinum hjá
handverksmeistarum, eins og eina neyðuga trygd fyri kundar.
Ætlanin við slíkari løggilding er sambært vinnuni, at bert handverksmeistarar við
neyðugu útbúgving og royndum kunnu útinna arbeiði, sum krevur serkunnleika og
ábyrgd. Hetta hevur týdning fyri alt slag av bygging, men ikki minst tá familjur seta
seg í skuld fyri at fáa bygt eitt heim. Tí allir partar koma sera illa fyri, um illa vil til
við bygging.
Á ólavsøku í fjør varð á løglistanum fráboðað, at eitt uppskot til løgtingslóg um
løggilding av handverksmeistarum í byggivinnuni var ávegis og skuldi leggjast fram í
tingárinum. Ætlanin var at gera eina skipan, soleiðis at handverksmeistarar, sum bjóða
seg fram at byggja fyri onnur, skuldu vera løggildir og hava staðið ta útbúgving, sum
verður kravd fyri at gerast løggildur handverksmeistari.
Nú er tingárið farið at halla, men væntandi er, at tørvurin á slíkari løggilding og
meistarutbúgving enn er sera átrokandi.
Tí verða hesir spurningar settir.
Á Løgtingi, 5.mai, 2025
Hanna Jensen, løgtingskvinna

-- 1 of 1 --