52-096/2024

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
14. apríl 2025
Mál: 25/08995
Tygara skriv: 52-096/2024
Svar til skrivligan fyrispurning nr. 52-096/2024 frá Eyðgun Samuelsen, løgtingskvinnu,
settur landsstýrismanninum í fiskivinnu- og samferðslumálum, Jóhan Christiansen, um
snarbussin millum Klaksvík og Tórshavn
Fyrispurningurin er soljóðandi:
1. Nær kann væntast at túratalið hjá leið 401 úr Klaksvík til Havnar verður økt, so koyrt
verður oftari gjøgnum Eysturoyartunnilin?
2. Kann væntast, at leið 400 verður endurskoðað?
Svar til spurning 1 og 2
Tað verður arbeitt við at tillaga leið 401, og nakrar broytingar verða eftir ætlan gjørdar á rutuni
millum Norðoyggjar og Suðurstreymoy, tá ið skúlarnir byrja aftur eftir summarfrítíðina.
Sum Strandferðslan áður hevur upplýst, hava sáttmálabundnar útreiðslur og hægri tunnilsgjøld
í Eysturoyartunlinum við sær, at broytingar við øktum túratali fara at krevja meirfígging, um
tænastan á øðrum leiðum ikki skal skerjast.
Tað er ein avbjóðing fyri Strandferðsluna, at almenna felagsferðslan hjá Bygdaleiðum, sum fer
gjøgnum gjaldstunlarnar, skal gjalda fult gjald fyri hvønn buss. Hetta avmarkar smidleikan fyri
at nýta eitt nú Eysturoyartunnilin til at betra tænastuna og koyritíðina millum samanbundnu
økini. Samskifti er við tunnilsfelagið um hendan trupulleikan. Landsstýrismaðurin vónar, at
úrslitið verður ein lægri prísur fyri bussar, sum síðani kann geva betri umstøður at økja um
túratalið.
Leið 400 hevur í nógv ár verið mest nýtta farleiðin, og 15 ymiskar bygdaleiðir eru bundnar
saman við koyringini á hesu leið. Tí er tað ein trupul uppgáva at gera broytingar á leiðini.
Ein fyritreyt fyri at gera størri broytingar á Bygdaleiðum er tí, at Strandferðslan fær sett nýggja
planleggingarskipan í verk. Eftir ætlan skuldi Strandferðslan komið á mál við hesum nú til
várs, men orsakað av øðrum átrokandi arbeiðsuppgávum, er hetta tíverri nakað seinkað.
Arbeiðið verður tikið uppaftur eftir páskafrítíðina, og tá ið skipanin er sett í gildið, verður tað
munandi lættari at tillaga og broyta verandi ferðaætlanir, og at fáa betri rakstur á Bygdaleiðum.

-- 1 of 2 --

Fiskivinnu- og samferðslumálaráðið
2/2
Hetta, umframt onnur sølufremjandi átøk, fer uttan iva at betra tænastuna og at eggja ferðandi
til at brúka almennu flutningstænastuna á Bygdaleiðum.
Jóhan Christiansen
Landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eyðgunn Samuelsen, løgtingskvinna
Svarari: Jóhan Christiansen, landsstýrismaður í fiskivinnu- og samferðslumálum
Evni: Snarbussurin millum Klaksvík og Tórshavn
Spurningar:
1) Nær kann væntast at túratalið hjá leið 401 úr Klaksvík til Havnar verður økt,
so koyrt verður oftari gjøgnum Eysturoyartunnilin?
2) Kann væntast, at leið 400 verður endurskoðað?
Viðmerkingar:
Tað er ein stórur bági fyri fólk í Norðoyggjum og Eysturoy, ið ynskja at nýta
bussleiðina til Havnar, at so fáir túrar eru millum Tórshavn og Klaksvík gjøgnum
Eysturoyartunnilin. Gamla rutan, sum verður røkt av leið 400, tekur alt ov langa tíð,
um fólk skulu til arbeiðis ella í skúla.
Í sendingini Breddin í vikuni um fráfall á Setrinum kom fram, at helmingurin av
teimum lesandi eru av bygd, og 70 % brúka bil í samband við at koma til Setrið.
Grundgevingin var, at busssambandið er so ósmidligt, at tað ber illa til at brúka
bussin. Hetta er ein stórur fíggjarligur bági fyri tey lesandi, tí tað er munandi dýrari at
hava bil heldur enn at gera brúk av bussleiðini. Fíggjarliga byrðan av býli og
mangulin á lestrarbýli ger, at nógv lesandi búgva úti um landið, og hjá teimum er
dýrur flutningur steinur omaná byrðu.
Landstýrismaðurin hevur áður upplýst, at nýggja planleggingarskipanin, ið fer at gera
tað munandi lættari at tillaga og broyta ferðaætlanir, verður klár at taka í nýtslu tíðliga
í 2025. Eisini hevur landsstýrismaðurin upplýst, at tað eru ítøkiligar ætlanir um at gera
tillagingar á leið 401 millum Tórshavn og Klaksvík umvegis Eysturoyartunnilin.
Um og tá hesar tillagingar við leið 401 verða gjørdar, kann væntast, at hesar eisini
føra við sær broytingar á leið 400. Leið 400 hevur í nógv ár verið mest nýtta farleiðin,
og fyri at hon framhaldandi skal verða tað, er neyðugt at umskipa og dagføra hesa
leið.
Fyri at fáa greiði á, nær tænastan verður umløgd og betrað, verða hesir spurningar
settir.
Á Løgtingi, 31. mars 2025
Eyðgunn Samuelsen

-- 1 of 1 --