52-089/2024

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
7. mars 2025
Mál: 25/05767-2
(at tilskila í svari)
Tygara skriv: 52-089/2024
Svar upp á skrivligan fyrispurning nr. 52-089/2024 frá Jóhannis Joensen,
løgtingsmanni, settur Dennisi Holm, landsstýrismanni, um trolfiskiskap eftir
svartkalva
Fyrispurningurin er soljóðandi:
1. Hava Føroyar størstu trolmeskavídd í Norðuratlantshavi, tá tað snýr seg um
fiskiskap eftir svartkalva?
2. Hví hava Føroyar valt hesa trolmeskavídd til henda fiskiskap?
3. Hví brúka tey ymsu londini ymiska meskavídd til henda fiskiskap?
4. Ætlar landsstýrismaðurin at taka hetta upp við Havstovuna, soleiðis at
føroyingar hava betri treytir at fiska svartkalva, serliga har fiskað verður av
sama svartkalvastovni, báðumegin markið?
Svar:
Til spurning 1
Eftir grein 4 í kunngerð nr. 193 frá 29. desember 2017 um fiskiskapin í føroyskum
sjógvi við fiskiførum, sum eru skrásett í Føroyum, kann einki fiskifar nýta trol, sum
hevur smærri meskar enn 145 mm. Í greinunum 14-17 í kunngerðini eru tó undantøk,
sum loyva trolarum at brúka minni mesk enn 145 mm í beinleiðis veiði eftir ávísum
fiskasløgum. Svartkalvi er ikki undantikin.
Eftir hesum, og sambært mínum upplýsingum, eru tað Føroyar og Kanada – sum í
sínum regluverki hava størstu trolmeskavídd (145 mm), tá tað snýr seg um fiskiskap
eftir svartkalva.
Tá samanborið verður við onnur lond, er tó vert at hava í huga, at ásetingarnar um
trolmeskar aðrastaðni kunnu vera øðrvísi settar saman enn tær føroysku. Til dømis
siga grønlendsku reglurnar, at í veiði eftir svartkalva við troli er minstamátið fyri

-- 1 of 2 --

Fiskivinnu- og samferðslumálaráðið
2/2
meskavídd 100 mm í undirveingjunum, meðan meskavíddin í restini av trolinum skal
minst vera 140 mm. Føroysku reglurnar galda fyri alt trolið.
Til spurning 2
Tað hevur ikki eydnast at fáa til vega upplýsingar, fyri á nøktandi hátt at kunna svara
hesum spurninginum um, hví Føroyar hava valt hesa trolmeskavídd fyri svartkalva.
Reglan um, at tað ikki er loyvt at brúka smærri meskar enn 145 mm, hevur verið
galdandi síðani fyrst í 1990-unum. Áðrenn tað var loyvt at brúka smærri meskar. Sum
skilst, var broytingin til størri meskar ein liður í teimum nýskipanum, sum landsstýrið
fyrst í 1990-unum setti í verk fyri at bøta um stovnsrøktina í fiskiskapinum eftir botnfiski
undir Føroyum. Endamálið við minst loyvdari meskavídd í troli er vanliga, at fiskur
undir ávíst minstamát skal kunna verða sílaður frá, meðan tóvað verður, og at ein á
henda hátt stuðlar undir, at veiðan av smáum fiski verður sum minst.
Til spurning 3
Tað hevur ikki borið til at útvega upplýsingar, greiningar ella annað, sum kann vera
grundarlag undir at svara hesum spurninginum um, hví londini í Norðuratlantshavi
brúka ymiska minst loyvdu meskavídd í fiskiskapinum eftir svartkalva við troli.
Eg kann bert staðfesta, at lond brúka ymiskar reglur um trolmeskavídd, og at reglurnar
í Føroyum (145 mm) ikki eru tær somu sum í t.d. Noreg (130 mm), Bretlandi og Íslandi
(135 mm), Grønlandi (100/140 mm) ella í altjóða sjógvi í NAFO-økinum (130 mm).
Svartkalvin á leiðunum við Føroyar, Ísland, Eysturgrønland og vestan fyri Skotland
verður roknaður sum ein og sami stovnur, sum er í sjóøkjunum hjá fleiri londum.
Ongar felags ásetingar eru tó um fiskiskapin, undir hesum tekniskar reglur um
reiðskap o.a.
Til spurning 4
Í løtuni eru ongar ítøkiligar ætlanir um at broyta reglurnar um meskastødd í
fiskiskapinum við troli í føroyskum sjógvi. Samskift verður regluliga við Havstovuna í
sambandi við at skipa fiskiskapin eftir botnfiski undir Føroyum, og spurningurin um
meskavídd í troli fer at verða tikin upp.
Sirið Stenberg
landsstýrisfólk

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Jóhannis Joensen, løgtingsmaður
Svarari: Dennis Holm, landsstýrismaður í fiskivinnu- og samferðslumálum
Evni: Trolfiskiskapur eftir svartkalva
Spurningar:
1. Hava Føroyar størstu trolmeskavídd í Norðuratlantshavi, tá tað snýr seg um
fiskiskap eftir svartkalva?
2. Hví hava Føroyar valt hesa trolmeskavídd til henda fiskiskap?
3. Hví brúka tey ymsu londini ymiska meskavídd til henda fiskiskap?
4. Ætlar landstýrismaðurin at taka hetta upp við Havstovuna, soleiðis at
føroyingar hava betri treytir at fiska svartkalva, serliga har fiskað verður av
sama svartkalvastovni, báðumegin markið?
Viðmerkingar:
Tað eru fáar felagstreytir um meskavídd innan trolfiskiskap í Norðuratlanshavi. Hetta
hóast londini ofta fiska av sama fiskastovni. Sum skilst, skipa londini sín egna
fiskiskap við egnari trolmeskavídd. Tað ger, at fortreytirnar eru ymiskar fyri ymisku
skipini.
Tað hevur verið víst á, at Føroyar hava størstu meskavídd (145 mm), tá fiskað verður
eftir svartkalva. Grundgevingarnar eru helst fleiri. Hinvegin nýta bretar 135 mm,
norðmenn 135 mm og grønlendingar 140 mm, tá fiskað verður eftir svartkalva.
Nú eru fleiri lond, sum gera royndir við skiljirist, soleiðis at hjáveiða verður skild frá.
Hetta ger fiskiskapin burðardyggari.
Støðan í dag er tann, sambært skiparum, sum troyta henda fiskiskap, at svartkalvin,
við 145 mm meskavídd, sleppur gjøgnum posan, men tíverri fær nógvur fiskur skaða
og doyr, hóast hann sleppur ígjøgnum meskarnar. Tá er onki vunnið. Varð
meskavíddin minkað, fiskaðu skipini eisini tann fiskin, sum í dag doyr uttanfyri trolið.
Tað kann eisini tykjast undarligt, at føroysku skipini fiska við størri meskavídd eftir
sama fiskastovni, har bretar fiska við smærri meskum nakrar fáar metrar hinumegin
markið.
Fyri at vita, hvat landstýrismaðurin kann gera við hetta málið, og hvør støða hansara
er í hesum máli, verður hesin fyrispurningur settur landstýrismanninum.
Á Løgtingi, 25. februar 2025
Jóhannis Joensen

-- 1 of 1 --