52-078/2024

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
14. februar 2025
Mál: 25/03191-3
(at tilskila í svari)
Tygara skriv: 52-078/2024
Svar til skrivligan fyrispurning nr. 52-078/2024 frá Sólvit E. Nolsø,
løgtingsmanni, settur landsstýrismanninum í fiskivinnu- og samferðslumálum,
Dennis Holm, um Dalstunnilin
Fyrispurningurin er soljóðandi:
1. Nær í 2025 verður koyrandi í Dalstunlinum?
2. Verða tilhoyrandi arbeiðir sum installatiónir, ljós, asfaltering v.m. eisini liðug í
2025?
Svar:
Dalstunnilin er 2,2 kilometrar langur, og tilhoyrandi vegagerð er 300 metrar.
Harumframt er ein stórur partur av verandi vegum í Húsavík og í Dali breiðkaðir. Grót
frá tunlinum er eisini brúkt til at umleggja eitt stórt sving á Skálavíkarvegnum.
Í 2024 var arbeitt við vegagerð í tunlinum, portalum, liðugt tryggjan og vatn tryggjan av
tunlinum og annað. Í 2025 er ætlanin, at arbeiðini verða gjørd liðug, umframt at arbeitt
verður við at leggja inn tekniskar installatiónir, trygdarútgerð og ljós, at asfaltera vegin
í tunlinum og annað.
Í løtuni verður arbeitt við at gera eina vegagrøv til dren og til kaðalar. Talan er um
kaðalar til samskifti, ravmagn (Sev) og til rakstur av tunlinum.
Arbeitt verður eisini við at tryggja tunnilin lidnan, harímillum vatntryggja, og verða 700
metrar av betongi sproytað í tunnilsloftið. Hetta verður ætlandi gjørt í apríl-mai í ár.
Farið er undir at gera portalin Dalsmegin, og síðan verður portalurin gjørdur
Húsavíkarmegin. Væntandi verður arbeiðið liðugt í summar.

-- 1 of 2 --

Fiskivinnu- og samferðslumálaráðið
2/2
Viðvíkjandi vegagerðini í tunlinum, verður styrkilag lagt á vegbreytina, og síðan verður
vegbreytin asfalterað.
Í mars verður el- og trygdarútgerðarverkætlanin boðin út, og eftir ætlan kann tað
arbeiðið byrja í mai 2025. Arbeiðið tekur væntandi 4-5 mánaðir.
Eftir eini dagførdari kostnaðarmeting fer verkætlanin samanlagt at kosta eini 168 mió.
kr. Øll verkætlanin kann gerast liðug á heysti 2025, men tað er treytað av, at írestandi
játtanin fæst til vega við eykajáttan, nóg tíðliga í ár.
Tað eru brúktar 110 mió. kr. til farleiðina til Dals fram til ársskiftið 2024. Tøka játtanin
til verkætlanina er 35 mió. kr. í 2025, og sostatt er tørvur á eini játtan upp á 23 mió. kr.
til at gera verkætlanina lidna.
Landsstýrismaðurin vónar, at øll verkætlanin verður liðug í ár.
Dennis Holm
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Sólvit E. Nolsø, løgtingsmaður
Svarari: Dennis Holm, landsstýrismaður í fiskivinnu- og samferðslumálum
Evni: Dalstunnilin
Spurningar:
1. Nær í 2025 verður koyrandi í Dalstunlinum?
2. Verða tilhoyrandi arbeiðir sum installatiónir, ljós, asfaltering v.m. eisini liðug í
2025?
Viðmerkingar:
Í fíggjarlógaruppskotinum 2025 stendur, at í ár (2025) skal arbeiðið í Dalstunlinum
gerast liðugt.
Tað stendur eisini, at í 2025 verður arbeitt við tekniskum installatiónum,
trygdarútgerð, ljósi, asfaltering og at rigga byggipláss, tyrvingarpláss og annað av.
Hátíðarhald var í Dali í november 2023, tá tunnilin var skotin ígjøgnum.
Arbeiðið at gera tunnilin kláran til gjøgnumkoyring gongur, sum skilst, væl. Enn er tó
einki fráboðað frá Landsverki ella ráðnum um eina endaliga dagfesting fyri almennari
upplating.
Eisini hevði verið áhugavert at frætt um, hvussu gongur við tilhoyrandi uppgávum
sum trygd, ljósi og niðurlegging av byggiplássi.
Á Løgtingi, 31. januar 2025
Sólvit E. Nolsø

-- 1 of 1 --