52-071/2024

LØGMÁLARÁÐIÐ
M I N I S T R Y O F J U S T I C E
Gongin 7 • Postrúm 377 • FO-110 Tórshavn
 (+298) 35 80 80 •  lmr@lmr.fo • www.lmr.fo
Løgtingið
Tinghúsvegur 1-3
Postrúm 208
110 Tórshavn
Tórshavn, tann: 24. januar 2025
J. nr.: 25/01079-2
Svar
uppá
skrivligan fyrispurning nr. 52-071/2024 eftir § 52 a í tingskipanini um valevnislistar til
kommunuval.
Fyrispurningurin er soljóðandi:
1. Hvat er endamálið við at hava mark fyri, hvussu nógv valevni kunnu standa á sama lista til
kommunuval?
2. Ætlar landsstýrismaðurin at arbeiða fyri at broyta hetta?
3. Hvussu heldur landsstýrismaðurin, at kommunuvalið í 2024 gekk í síni heild?
Svar:
Til spurning nr. 1 og 2
Endamálið er helst at tryggja fólkaræðisligan dynamikk við at eggja til fleiri listar, men í
viðmerkingunum til kommunuvallógina verður ásetingin ikki neyvari viðgjørd. Atlitini hjá
spyrjaranum eru viðkomandi at taka við í viðgerðina, um farið verður undir at eftirhyggja
kommunuvallógina við tí fyri eyga at gera broytingar. Eingin ætlan er um hetta í løtuni.
Til spurning 3
Løgmálaráðið metir, at kommunuvalið 12. novembur 2024 sum heild gekk væl. Øll bý- og
bygdaráð vórðu mannað. Løgmálaráðið gjørdi eina kommunu varuga við, at valið ikki varð
farið rætt fram sambært kommunuvallógini, og løgreglan viðger eitt mál um møguligt
valsvik.
Bjarni K. Petersen
Landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Helgi Abrahamsen, løgtingsmaður
Svarari: Bjarni Kárason Petersen, landsstýrismaður í lógarmálum
Evni: Valevnislistar til kommunuval
Spurningar:
1. Hvat er endamálið við at hava mark fyri, hvussu nógv valevni kunnu standa á
sama lista til kommunuval?
2. Ætlar landsstýrismaðurin at arbeiða fyri at broyta hetta?
3. Hvussu heldur landsstýrismaðurin, at kommunuvalið í 2024 gekk í síni heild?
Viðmerkingar:
Sambært løgtingslóg um val til allar føroyskar kommunur kann ein valevnislisti til
kommunuval í mesta lagi hava 4 valevni fleiri enn samlaða talið av
bygdaráðslimum/býráðslimum, ið skulu veljast. Hetta hevur við sær, at um talið av
valevnum fer upp um hetta markið, so er neyðugt at gera fleiri listar. Men valevnini á
listunum hava í nógvum førum einki annað til felags enn bara tað, at tey standa á sama
lista. Tí sóu vit eftir seinasta kommunuval, at kommunustýri skipaðu seg ella vóru nær
við at skipa seg soleiðis, at onkur á einum lista var við í meiriluta saman við øðrum
listum, meðan onkur annar á sama lista var í minniluta. Hetta reisir spurningin um, hvat
endamálið er við at hava fleiri listar.
Eisini tað, at D’Hondt útrokningarhátturin verður brúktur, kann hava við sær, at hjá
onkrum lista skulu fleiri atkvøður til fyri hvørt valt umboð enn á øðrum listum. Hetta
talar eisini ímóti kravinum um at hava fleiri listar.
Síðani kommunuvalið í november hava søgur verið í fjølmiðlunum um, at á onkrum
valstaði manglaðu atkvøðuseðlar, onkrastaðni varð kært til Kommunala eftirlitið um, at
skipanarfundurin hjá nýggja býráðnum ikki varð hildin eftir røttum forskriftum, og
eisini var dømi um, at meldað varð til løgregluna um valsvik. Tað er orsøkin til seinasta
spurningin.
Á Løgtingi, tann 13. januar 2025
Helgi Abrahamsen

-- 1 of 1 --