52-069/2024

Dagf. 21. januar 2025
HMR j. nr. 25/00669-7
Súsanna Bertholdsen
landsstýriskvinna
Svar
upp á
Fyrispurning nr. 52-069/2024 eftir § 52 a í tingskipanini effektiva nýtslu av MR-skannarum,
frá Eiriki í Jákupsstovu, løgtingsmanni
Spurningar:
1. Hvørjar eru royndirnar hjá sjúkrahúsverkinum at skipa og nýta MR-skannararnar, nú verkið
hevur ræði á tveimum slíkum skannarum, herundir eisini við atliti til at gera skanningar í
Føroyum, sum ikki hava verið gjørdar her áður?
2. Hvussu er ætlaða býtið millum nýtslu av teimum báðum MR-skannarunum hjá
sjúkrahúsverkinum?
3. Eru nøkur sløg av skanningum, sum betur kunnu gerast í eldra MR-skannaranum hjá
sjúkrahúsverkinum enn í nýggjara skannaranum?
4. Er tað fíggjarliga og heilsuliga skynsamt, um mann framhaldandi brúkar eldra skannaran út
á kvøldarnar, tá samlaði skannimøguleikin í øllum førum er tvífaldaður?
Svar:
Til spurning 1
Starvsfólk á Klaksvíkar sjúkrahúsi og Landssjúkrahúsinum eru í MR-toyminum, sum stendur
fyri at gera allar MR-skanningar í Sjúkrahúsverkinum. Áðrenn 3T MR-skannarin varð tikin í
nýtslu á Klaksvíkar sjúkrahúsi í mai 2024, varð farið undir eina tilgongd at førleikamenna
starvsfólkini í MR-toyminum til at brúka nýggja skannaran. Arbeiðið at skipa og íverkseta MR
skannararnar í Sjúkrahúsverkinum hevur gingið eftir ætlan, bæði viðvíkjandi upplæring av
starvsfólkum og verkseting av kanningum.
Í desember í fjør varð farið undir at skanna fyri prostata á Klaksvíkar sjúkrahúsi. MR
skanningar av prostata hava ikki verið gjørdar í Føroyum áður. Arbeiðið við at íverkseta MR
skanningar av prostata, hevur millum annað fevnt um broyting av avtalum millum
Sjúkrahúsverkið og Aalborg Universitetshospital; umfatandi samskipanararbeiði hjá teimum,
ið varða av urologiini í Sjúkrahúsverkinum; uppvenjing uttanlands av røntgenlæknum og
radiografum; umframt at tillaga arbeiðsuppgávur hjá øðrum eindum í Sjúkrahúsverkinum.

-- 1 of 2 --

Til spurning 2
Tað er ikki lagt nakað fast ítøkiligt býti millum MR-skannararnar á Landssjúkrahúsinum og
Klaksvíkar Sjúkrahúsi. Ávísingar verða visiteraðar av røntgenlækna. Í fyrstu syftu verður hetta
gjørt eftir eini kliniskari læknafakligari avgerð, og síðan eftir, hvar sjúklingurin hevur bústað,
so hann so vítt møguligt fær stytsta veg til MR-skanningina.
Til spurning 3
Flestu skanningar kunnu gerast í báðum skannarunum, meðan onkrir sjúklingar bert kunnu
skannast í øðrum MR-skannaranum, og aðrir bert í hinum MR-skannaranum. Hetta er bæði
tengt at kanningarslagnum og at MR-trygd, og í hvørjum einstøkum føri er tað ein læknafaklig
meting hjá røntgenlæknanum. Sum dømi kann nevnast, at skanning av prostata við kontrast
bert verður framd í MR-skannaranum í Klaksvík, meðan sjúklingar, sum hava metal í
kroppinum (t.d. stentar og protesur) verða skannaðir í MR-skannaranum á
Landssjúkrahúsinum.
Til spurning 4
Víkjandi skanning um kvøldarnar hevur tað verið ein politisk raðfesting, at Røntgendeildin á
Landssjúkrahúsinum ger MR-skanningar eftir vanliga arbeiðstíð, fyri at stytta um bíðitíðina til
MR-skanningar.
Tá ið virksemið við tveimum MR-skannarum í Sjúkrahúsverkinum er komið í fasta legu er
kapasiteturin so mikið stórur, at tað frameftir verður so at siga ongin bíðitíð at sleppa framat.
Tá verður heldur ikki neyðugt og skynsamt at gera MR-skanningar eftir vanliga arbeiðstíð, og
tí kemur tað ikki at halda áfram.
Heilsumálaráðið, 21. januar 2025
Súsanna Bertholdsen
landsstýriskvinna

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eirikur í Jákupsstovu, løgtingsmaður
Svarari: Súsanna Bertoldsen, landsstýriskvinna í heilsumálum
Evni: Effektiv nýtsla av MR-skannarum
Spurningar:
1. Hvørjar eru royndirnar hjá sjúkrahúsverkinum at skipa og nýta MR-
skannararnar, nú verkið hevur ræði á tveimum slíkum skannarum, herundir
eisini við atliti til at gera skanningar í Føroyum, sum ikki hava verið gjørdar
her áður?
2. Hvussu er ætlaða býtið millum nýtslu av teimum báðum MR-skannarunum hjá
sjúkrahúsverkinum?
3. Eru nøkur sløg av skanningum, sum betur kunnu gerast í eldra MR-
skannaranum hjá sjúkrahúsverkinum enn í nýggjara skannaranum?
4. Er tað fíggjarliga og heilsuliga skynsamt, um mann framhaldandi brúkar eldra
skannaran út á kvøldarnar, tá samlaði skannimøguleikin í øllum førum er
tvífaldaður?
Viðmerkingar:
Nú hevur sjúkrahúsverkið í eina tíð havt ræði á tveimum ymiskum MR-skannarum,
og tí hevði verið áhugavert at frætt, hvussu hetta hevur betrað um møguleikarnar hjá
okkara heilsuverki, og um ein ætlan er løgd um, hvussu mann áhaldandi hevur eina
skynsama nýtslu av tólum og arbeiðsmegi hjá sjúkrahúsverkinum.
Fyri nøkrum árum síðan var frammi, at tað varð skilagott og neyðugt at brúka tá
einasta MR-skannaran uttan fyri vanliga arbeiðstíð, eisini fyri at bíðirøðirnar ikki
skuldu gerast ov langar. At ein skannari er komin afturat kann hugsast at hava broytt
hesar fyritreytirnar nakað.
Á Løgtingi, 9. januar 2025
Eirikur í Jákupsstovu

-- 1 of 1 --