52-064/2024

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 15. januar 2025
J. nr.: 25/01126-2
Skrivligur fyrispurningur
eftir §52a í Tingskipanini
Svar frá Ruth Vang, landsstýriskvinnu, til §52 a – fyrispurning nr. 52-064/2024 frá Jørgini
Niclasen, løgtingsmanni, um talgilda tolling av frakt hjá privatpersónum
Spurningarnir vóru soljóðandi:
1. Ætlar landsstýriskvinnan at loyva privatfólki at tolla frakt sjálvi talgilt, eins og vinnulívið
kann?
2. Ætlar landsstýriskvinnan at loyva speditørum at tolla frakt talgilt fyri privatkundar, eins
og speditørar kunnu fyri vinnukundar?
3. Um ja, nær kann roknast við at slík skipan verður sett í verk?
Svar
Ætlanin er, við kunngerð, at loyva flutningsfeløgum og speditørum at tollavgreiða fyri
privatkundar á sama hátt, sum hesi tollavgreiða fyri vinnukundar.
Á TAKS eru tey um at verða liðug við at broyta KT-skipanina, so latið verður upp fyri, at
flutningsfeløg og speditørar kunnu tollavgreiða fyri privatkundar. Tað verður væntandi til várs,
um ikki okkurt óvæntað stingur seg upp.
At privatkundar kunnu tollavgreiða frakt talgilt sjálvi, er ikki ein partur av hesum.
Tinganes, 15. januar 2025
Ruth Vang
landsstýriskvinna í fíggjarmálum

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Jørgen Niclasen, løgtingsmaður
Svarari: Ruth Vang, landsstýriskvinna í fíggjarmálum
Evni: Um talgilda tolling av frakt hjá privatpersónum
Spurningar:
1. Ætlar landsstýriskvinnan at loyva privatfólki at tolla frakt sjálvi talgilt, eins og
vinnulívið kann?
2. Ætlar landsstýriskvinnan at loyva speditørum at tolla frakt talgilt fyri
privatkundar, eins og speditørar kunnu fyri vinnukundar?
3. Um ja, nær kann roknast við at slík skipan verður sett í verk?
Viðmerkingar:
Ofta hoyrist frá fólki, at tað tekur langa tíð at fáa tollað frakt til privatpersónar.
Vinnukundar kunnu í dag á Vinnuglugganum tolla sjálvi talgilt, og TAKS kann síðan
gera stakroyndir fyri at tryggja, at rætt er tollað. Ein einføld, bílig og væl virkandi
skipan.
Hetta kunnu privatpersónar ikki. Her skal TAKS gera alt arbeiðið og kundin má bíða.
Tí verður spurt, hví privatpersónar ikki sjálvir kunnu tolla talgilt.
Nógvir speditørar standa fyri innflutningi av frakt og pakkum fyri vinnukundar og
privatkundar. Fyri vinnukundar kunnu speditørar avgreiða tollin fyri teir, men tað
kunnu speditørar ikki fyri privatkundar; har skal TAKS gera alla tollingina.
Í tí tøkniverð vit liva í, kann hetta tykjast løgið, tungt og dýrt. Um landsstýrið/TAKS
ikki vil loyva privatpersónum at tolla sjálvi, so verður spurt, um landsstýrið/TAKS fer
at loyva speditørum at tolla talgilt fyri privatkundar, eins og tey gera fyri
vinnukundar.
Hesar somu spurningar setti undirritaði í Løgtinginum í mei mánaði 2024 (MS-
133/2023). Tá svaraði landsstýriskvinnan, at TAKS arbeiðir ítøkiliga við einari ætlan
um, at speditørar skulu sleppa at tolla talgilt fyri privatkundar. Eisini segði hon, at
TAKS metir, at tíðarætlan kann gerast til einaferð í heyst.
Nú er heystið liðugt, og enn hoyrist einki um nevndu tíðarætlan. Tí verða hesir
spurningar settir skrivliga.

-- 1 of 2 --

Á Løgtingi, 7. januar 2025
Jørgen Niclasen

-- 2 of 2 --