52-045/2024

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
8. november 2024
Mál: 24/24867-2
(at tilskila í svari)
Tygara skriv: 52-045/2024
Svar til skrivligan fyrispurning nr. 52-045/2024 frá Eyðdis Hartmann Niclasen,
løgtingskvinnu, settur landsstýrismanninum í fiskivinnu- og samferðslumálum,
Dennis Holm, um ferðsluviðurskifti gjøgnum Vága kommunu og rundkoyring á
Giljanesi
Fyrispurningurin er soljóðandi:
1. Eru ætlanirnar um at betra um ferðslutrygdina gjøgnum Vága kommunu útsettar
ella sleptar?
2. Kann landsstýrismaðurin greiða frá støðuni viðvíkjandi rundkoyringini á
Giljanesi, og nær kann arbeiðið at gera rundkoyringina byrja?
Svar til spurning 1
Landsverk arbeiðir miðvíst við at betra um trygdina á landsvegakervinum. Vegakervið
er ein heild, og Landsverk samstarvar við kommunur, ferðslumyndugleikar og serfrøði
um trygd og tílíkt.
Landsverk hevur samskift við kommunurnar í Vágum um vegatekniskar loysnir fyri at
betra um ferðslutrygdina í kommununum. Millum annað hevur verið samskift við Vága
kommunu um ferðsluviðurskiftini við skúlan á Giljanesi og um møguleikan fyri at fáa
eina rundkoyring (sí svar til spurning 2).
Ferðsluviðurskifti broytast, serliga har nógv fólk ferðast, eitt nú við skúlar, og tí mugu
størri atlit takast til ábæra ferðslu, sum er fólk til gongu ella á súkklu. Sum partur av
arbeiðinum at dagføra samferðsluætlanina, hevur Landsverk útgivið eitt temablað um
ábæra ferðslu, og hvat er best at gera.
Ein av avbjóðingunum við ferðslutrygd og ferðsluviðurskiftum annars er, at tað er nógv
ferðsla í bygdum øki á landsvegnum gjøgnum Vága kommunu. Umleið 4.200 akfør
koyra í miðal á hesum strekkinum gerandisdagar, sum millum annað stavar frá
flogrutuni.

-- 1 of 2 --

Fiskivinnu- og samferðslumálaráðið
2/2
Sum liður í at betra um ferðslutrygdina á hesi farleið, hevur Landsverk seinastu árini
framt ymiskar ábøtur. Árini 2018-2020 vórðu 1,8 mió. kr. brúktar til ferðslutrygd fram
við vegnum til og frá skúlanum á Giljanesi.
Í 2021-2023 vórðu 9,9 mió. kr. brúktar til at asfaltera ymiskar vegir í Vágum.
Í ár er ætlanin at gera ábøtur á einari ferðsluoyggj miðskeiðis við landsvegin í
Sandavági. Arbeiðið er boðið út, og ætlanin er at gera arbeiðið liðugt í ár. Endamálið
er at betra um ferðslutrygdina í bygdini.
Svar til spurning 2
Landsverk hevur arbeitt saman við Vága kommunu við einari loysn at binda saman
ferðsluna til og frá skúlanum, landsvegnum, kommunalum vegum og vinnuøkinum á
Giljanesi við eini rundkoyring og vegagerðum. Enn er tó bert talan um fyribils skitsur
og leysligar kostnaðarmetingar.
Báðir partar meta hetta verða eina góða loysn, sum betrar ferðsluviðurskiftini og
framkomuleikan í Vága kommunu.
Hetta er ein rættiliga stór og dýr verkætlan, sum kann fremjast heilt ella partvíst, og
sum kann verða gjørd í stigum. Ætlanin er, at rundkoyringin skal vera á landsvegnum
beint vestan fyri skúlan og skal hava 5 íbindingar. Vegagerðin verður umleið 1,8 km.
Um verkætlanin skal fremjast, skal ein heilt greið avtala gerast millum Landsverk og
Vága kommunu um, hvør fíggjar og ábyrgdast fyri hvørjum parti. Ein loysn kundi verið,
at landið ger rundkoyringina og íbindingarnar í verandi landsveg, sum so verður partur
av landsvegakervinum, meðan kommunan ger allar vegirnar. Sum tað fyrsta má ein
nýggjur vegur gerast frá rundkoyringini til skúlan á Giljanesi.
Sum tilskilað er verkætlanin ongan veg komin enn, og eingin peningur er játtaður til
endamálið. Neyðugt er at játta pening til at prosjektera verkætlanina. Síðani skal støða
takast til, um verkætlanin heilt ella partvíst skal fremjast.
Dennis Holm
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eyðdis Hartmann Niclasen, løgtingskvinna
Svarari: Dennis Holm, landsstýrismaður í fiskivinnu- og samferðslumálum
Evni: Ferðsluviðurskiftini gjøgnum Vága kommunu og rundkoyringin á Giljanesi
Spurningar:
1. Eru ætlanirnar um at betra um ferðslutrygdina gjøgnum Vága kommunu útsettar ella
sleptar?
2. Kann landsstýrismaðurin greiða frá støðuni viðvíkjandi rundkoyringini á Giljanesi, og
nær kann arbeiðið at gera rundkoyringina byrja?
Viðmerkingar:
Útbyggingin av skúlanum á Giljanesi varð liðug nú í vár og eftir summarfrítíðina byrjaðu øll
skúlabørnini í kommununi í skúlanum. Tað merkir, at nú eru fleiri enn 300 børn, sum ferðast
til og frá skúlanum, og ferðslan er økt nógv - og tí eru ferðsluvandarnir eisini vorðnir størri.
Tað eru fleiri ár síðani, at mann í kommununi gjørdi ætlanir saman við Landsverki um at gera
eina rundkoyring, og nú skúlin stendur liðugur, er hetta meiri átrokandi enn nakrantíð. Sum
nú er, er bara inn- og útkoyring beinleiðis úr høvuðsæðrini, har útsýnið er sera avmarkað, og
tí er vandi á ferð hvønn dag - so at siga.
Har er ongin skilagóð og trygg loysn, sum kommunan kann gera sjálv. Vegakervið má vera
nútíðarhóskandi til øktu ferðsluna gjøgnum økið.
Flogvøllurin verður útbygdur, og ferðavinnan stendur í støðugum vøkstri, so tað er alneyðugt
við einari loysn nú. Tað er brúk fyri, at mann tekur avbjóðingarnar í Vága kommunu í álvara
og skipar ferðsluna á landsvegnum væl og trygt. Tí verður hesin fyrispurningur settur.
Á Løgtingi, 25. oktober 2024
Eyðdis Hartmann Niclasen

-- 1 of 1 --