52-035/2024

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
14. oktober 2024
Mál: 24/23010-2
(at tilskila í svari)
Tygara skriv: 52-035/2024
Svar til skrivligan fyrispurning nr. 52-035/2024 frá Bjarna Hammer, løgtingsmanni,
settur landsstýrismanninum í fiskivinnu- og samferðslumálum, Dennis Holm, um
Landsverk og frágreiðingina frá SWECO um trygdina í Suðuroyartunlinum
Fyrispurningurin er soljóðandi:
1. Hevur landsstýrismaðurin givið Landsverki boð um ella loyvi til at bíleggja
frágreiðingina frá SWECO?
2. Visti landsstýrismaðurin av, at Landsverk var farið aktivt inn á annað málsøki?
3. Nær bleiv frágreiðingin bíløgd?
4. Nær fingu løgmaður og P/F Suðuroyartunnilin avrit av frágreiðingini?
5. Hvat kostaði frágreiðingin frá SWECO, og hvør hevur góðkent rokningina?
Svar:
Tað er sera umráðandi at fyrireika og lýsa málið um ein Suðuroyartunnil neyvt, áðrenn farið
verður undir eina so stóra verkætlan, harímillum at trygdin er í lagi bæði í byggitíðarskeiðinum
og í endaliga tunlinum.
Landsverk hevur arbeitt við forkanningum og fyrireikingum til Suðuroyartunnilin í 2020, 2021
og 2022, og hevur í hesum sambandi fingið til vega frágreiðingar, ið lýsa nýggju
Suðuroyarleiðina. Til dømis um linjuføringar og jarðfrøði, og Landsverk hevur gjørt eina størri
frágreiðing við denti á fíggjarliga,- búskaparliga, - og umhvørvisliga partin.
Sum part av fyrireikingunum og sum vegamyndugleiki bað Landsverk ráðgevarafyritøkuna
SWECO gera tvær trygdarkanningar av Suðuroyartunlinum. Eina váðakanning í samband við
møguligan eld í Suðuroyartunlinum og eina kanning um møguligan bruna í byggitíðini.
Frágreiðingarnar vóru lidnar ávikavist í apríl og mai 2022. Allar frágreiðingar og kanningar hjá
Landsverki eru almennar og liggja á heimasíðu stovnsins.

-- 1 of 2 --

Fiskivinnu- og samferðslumálaráðið
2/2
SWECO er millum tær størstu ráðgevarafyritøkurnar í Evropa. Eins og Norconsult, sum hevur
gjørt trygdarkanningina hjá Tunnilsfelagnum, hevur SWECO drúgvar royndir innan tunnilsgerð.
SWECO hevur verið partur av fleiri tunnilsverkætlanum í Føroyum, og hevur til dømis gjørt
uppgávur fyri P/F Norðoyartunnilin og P/F Vágatunnilin, og fyri Landsverk, eitt nú prosjekterað
Hovstunnilin.
Síðan málsøkið undirsjóvartunlar varð flutt Løgmansskrivstovuni, hevur Landsverk í ávísan
mun verið við í arbeiðinum at fyrireika ein Suðuroyartunnil. Landsverk hevur luttikið í
arbeiðsbólkum saman við Tunnilsfelagnum um linjuføringar, tunnilsgrót og trygd í tunlum.
Landsverk hevur eisini eftir áheitan frá Løgmansskrivstovuni eftirkannað ymiskt tilfar frá P/F
Suðuroyartunlinum, sum verður brúkt til at fyrireika verkætlanina.
Landsverk og Tunnilsfelagið hava havt tveir fundir í arbeiðsbólkinum um trygd í
Suðuroyartunlinum. Á fyrra fundinum vísti Landsverk til frágreiðingina hjá SWECO. Á seinna
fundinum, sum var síðst í 2023, fekk Landsverk frágreiðingina frá Norconsult, sum
Tunnilsfelagið hevði bílagt.
Frágreiðingarnar vóru rættiliga ólíkar. Landsverk metti, at frágreiðingin hjá Norconsult ikki í
nóg stóran mun tók hædd fyri, at Suðuroyartunnilin verður so langur. Um ársskiftið bað
Landsverk tí SWECO um at meta um frágreiðingina hjá Norconsult. Landsverk fekk
frágreiðingina frá SWECO í mars 2024.
Ætlanin hjá Landsverki var, at frágreiðingin frá SWECO skuldi vera eitt stig á leiðini til at
fyrireika stovnin til myndugleikauppgávuna við trygd í tunlinum.
Landsverk hevur goldið trygdarfrágreiðingina frá SWECO. Frágreiðingin kostaði 165 tús. kr.
Frágreiðingin frá SWECO varð handað Løgmansskrivstovuni 30. august í 2024 eftir umbøn frá
Løgmansskrivstovuni. Landsverk hevur greitt frá, at á fundum við Løgmansskrivstovuna, har
Tunnilsfelagið eisini var við, hevur stovnurin kunnað um frágreiðingina.
Í løgtingslógunum um verandi undirsjóvartunlar stendur, at:
“Landsverk skal undir ábyrgd mótvegis landsstýrismanninum góðkenna tunnilsverkætlanirnar,
herundir vegagerð og tunnilsgerð, áðrenn tunnilsarbeiðini verða sett í verk, og skipar í hesum
sambandi fyri eftirliti við, at verkætlanirnar verða framdar samsvarandi góðkendu ætlanunum.”.
Landsstýrismaðurin heldur tað vera ein natúrligan part av fyrireikingunum at fáa til vega
trygdarkanningina, tá Landsverk skal góðkenna tunnilsverkætlanir og vegagerðir, áðrenn
arbeiðið fer í gongd.
Landsstýrismaðurin fegnast um, at tað tykist vera breið politiskt undirtøka fyri at fara undir ein
Suðuroyartunnil. Tá Suðuroyartunnilin er gjørdur, verða 99,2% av Føroya fólki knýtt saman í
einum vegakervi.
Dennis Holm
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Bjarni Hammer, løgtingsmaður
Svarari: Dennis Holm, landsstýrismaður í fiskivinnu- og samferðslumálum
Evni: Landsdverk og frágreiðingin frá SWECO um trygdina í Suðuroyartunlinum
Spurningar:
1. Hevur landsstýrismaðurin givið Landsverki boð um ella loyvi til at bíleggja
frágreiðingina frá SWECO?
2. Visti landsstýrismaðurin av, at Landsverk var farið aktivt inn á annað málsøki?
3. Nær bleiv frágreiðingin bíløgd?
4. Nær fingu løgmaður og P/F Suðuroyartunnilin avrit av frágreiðingini?
5. Hvat kostaði frágreiðingin frá SWECO, og hvør hevur góðkent rokningina?
Viðmerkingar:
Síðst í september kom fram, at ráðgevarafyritøkan SWECO hevur skrivað eina
frágreiðing um trygdina í Suðuroyartunlinum.
Løgmaður hevur frá byrjan havt ábyrgdina av Suðuroyartunlinum. Ikki Fiskivinnu- og
samferðslumálaráðið og tískil ei heldur Landsverk. Tað bleiv sligið fast, tá hendan
samgongan tók við.
Allíkavæl hevur Landsverk blandað seg í viðgerðina av málinum við at sáa iva um tað
arbeiðið, sum verður gjørt av øðrum myndugleika. Landsverk hevur hesa ferð sett seg
í samband við ráðgevarafyritøku, sum ikki hevur royndir við tunlum í Føroyum, ella
teimum størru tunlunum í Noregi, og sum er beinleiðis kappingarneyti hjá norsku
ráðgevarafyritøkuni Norconsult, sum hevur gjørt arbeiði fyri P/F Suðuroyartunnilin.
Frágreiðingin sigst vera bíløgd fyri góðum ári síðan, men fyrst nú sær hon dagsins
ljós.
Tað hevur almennan áhuga, hvat avvarðandi landsstýrismaður av Landsverki visti og
heldur um, at Landsverk er farið inn á annað málsøki, og harvið brúkt almennan
pening til eina frágreiðing, sum tað er ivasamt, um stovnurin hevur heimild til.
Á Løgtingi, 2. oktober 2024
Bjarni Hammer

-- 1 of 1 --