52-028/2024

B A R N A - O G Ú T B Ú G V I N G A R M Á L A R Á Ð I Ð
J. H. Schrøtersgøta 7 • FO-100 Tórshavn • Tel: +298 306500 • bumr@bumr.fo
Løgtingið 25. september 2024
Tinghúsvegur 1-3 Mál: 22/22133-88
100 Tórshavn Viðgjørt: TB
Svar
upp á
skrivligan fyrispurning nr. 52-028/2024 frá Anniku Olsen, løgtingskvinnu, eftir § 52a í
Tingskipanini, settur Djóna Nolsøe Joensen, landsstýrismanni í barna- og
útbúgvingarmálum, um Meritútbúgving innan námsfrøði í Føroyum.
Fyrispurningurin er soljóðandi:
1. Verður arbeitt við at skipa eina meritútbúgving fyri námsfrøðingar (professiónsbachelor) í
Føroyum?
2. Um ja, nær og hvussu er ætlanin at skipa hetta?
Svar
Til 1 og 2: Í stuttum kann sigast, at Barna- og útbúgvingarmálaráðið ikki arbeiðir við at skipa eina
meritútbúgving fyri námsfrøðingar í Føroyum. Hetta er nakað, sum kommunurnar sjálvar hava tikið
stig til, og sum ikki hevur verið partur av arbeiðinum í Barna- og útbúgvingarmálaráðnum.
Barna- og útbúgvingarmálaráðið hevur tó arbeitt við námsfrøðiliga økinum í aðrar mátar, t.d. við
dupultu upptøkuni á námsfrøðiútbúgvingini, sum játtan varð latin til í fjør, tá tveir flokkar fyri fyrstu
ferð vóru tiknir inn.
Umsøkjaratalið hevur tó verið nakað lægri enn væntað, hóast grundarlag var mett fyri dupultu
upptøkuni, og harafturat er fráfallið á útbúgvingini eisini økt. Hetta gevur orsøk at halda, at tørvur er
á at eftirmeta leistin, og møguliga at endurskoða dupultu upptøkuna, og her verður eisini hugt at
ymiskum møguleikum.
Á Námsvísindadeildini á Fróðskaparsetri Føroya verður arbeitt við einum uppskoti um, hvussu
núverandi útbúgving kann styttast, sum eitt eyka útbúgvingartilboð afturat tí vanligu
bachelorútbúgvingini í námsfrøði. Hetta er eftir einum diplom-leisti, sum tryggjar, at tann stytta
útbúgvingin er fult í samsvari við vanligu námsfrøðiútbúgvingina, og at diplomútbúgvingin kann
góðskrivast inn á bachelorútbúgvingina í sínum fulla líki. Diplomútbúgvingin er tá á bachelorstøði,
tó at hon ikki gevur færri ECTS.
Hetta krevur tó nærri viðgerð og fyrireiking, áðrenn endalig støða verður tikin, tí við einum slíkum
leisti fylgja fleiri spurningar. Eitt nú er vert at kanna, um útbúgvingin skal hava somu breidd sum

-- 1 of 2 --

B A R N A - O G Ú T B Ú G V I N G A R M Á L A R Á Ð I Ð
J. H. Schrøtersgøta 7 • FO-100 Tórshavn • Tel: +298 306500 • bumr@bumr.fo
2/2
vanliga námsfrøðiútbúgvingin, ella um ein slík útbúgving heldur skal leggja sín dent á eitt ávíst og
meiri avmarkað námsfrøðiligt øki.
Leisturin er tó ikki ókendur, tí hann er royndur áður við verkfrøðiútbúgvingini í KT, sum í 2022 varð
skipað í styttri og meira praktiskari útgávu, nevniliga diplomútbúgvingini í web-menning.
Eisini er vert at nevna, at tað verður arbeitt við at skapa yvirgongd frá Heilsuskúla Føroya til
Fróðskaparsetur Føroya, soleiðis at tey, sum t.d. lesa til námsfrøðihjálpara, kunnu fáa atgongd til
námsfrøðiútbúgvingina á Setrinum. Væntandi verður hetta eisini viðvirkandi fyri einari øktari
tilgongd til námsfrøðiliga økið.
Vinarliga
Djóni Nolsøe Joensen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Annika Olsen, løgtingskvinna
Svarari: Djóni Nolsøe Joensen, landsstýrismaður í barna- og útbúgvingarmálum
Evni: Meritútbúgving innan námsfrøði í Føroyum
Spurningar:
1. Verður arbeitt við at skipa eina meritútbúgving fyri námsfrøðingar
(professiónsbachelor) í Føroyum?
2. Um ja, nær og hvussu er ætlanin at skipa hetta ?
Viðmerkingar:
Sambært Búskaparráðnum, so fara tað at mangla 700 starvfók innan heilsu- og
umsorganarøkið og dagstovnaøkið tey komandi 10 árini. Tí eiga vit at skipa okkara
útbúgvaringarskipan soleiðis, at vit megna at lofta komandi avbjóðingum.
Dagstovnalógin sigur, at tað skulu vera 2/3 námsfrøðingar, sum skulu arbeiða á
dagstovnaøkinum, men støðan er tann, at vit sum samfelag langt frá halda hesa
lógaráseting, og hóast fleiri flokkar eru raðfestir á námsfrøðiligu útbúgvingini á
Fróðskaparsetrinum, so røkka vit framvegis ikki málinum.
Ásannandi hesa avbjóðing fór Tórshavnar kommuna tískil undir eina meritútbúgving
í Danmark í februar í ár, har starvfólk innan dagstovnaøkið kunnu fara til Danmarkar
at fáa eina meritútbúgving, sum er, at tær royndir, tú hevði gjørt tær á
dagstovnaøkinum, kundu teljast við í tína útbúgving. Talan er um eina sokallaða
professiónsbachelor, ið telur 160 ECTS stig og tekur 3,5 ár, ella 7 semestur. Ímeðan tú
lesur skalt tú 2 ferðir í starvsvenjing hvørt semestur og fært løn, meðan tú tekur
útbúgvingina, tó ikki meðan tú ert í skúla. Tú kanst taka útbúgvingina á netinum, og
skalt bert til Danmarkar í eina viku í byrjanini og í endanum av einum semestri.
Tað vóru 21 persónar, sum byrjaðu at taka hesa útbúgving í februar í ár, og væntandi
verða tað 25 persónar, ið verða tiknir upp komandi ár. Sum samfelag eiga vit tó at
skipa okkara útbúgvingar soleiðis, at vit í størsta mun kunnu taka hesar útbúgvingar í
Føroyum, heldur enn at verða noydd at senda fólk av landinum. Hesa
meritútbúgving/profesissiónsbachelor hevði verið upplagt, at vit kundu skipa í
Føroyum og tí verða hesir spurningar settir landsstýrismanninum.
Á Løgtingi, 13. september 2024
Annika Olsen

-- 1 of 2 --



-- 2 of 2 --