52-027/2024

U T T A N R Í K I S - O G V I N N U M Á L A R Á Ð I Ð
TINGANES • FO-100 TÓRSHAVN •
TELEFON 30 66 00 • E-MAIL: UVMR@UVMR.FO
Føroya Løgting
Tinghúsvegur 1-3
Tórshavn Tórshavn, 23. september 2024
J.nr.: 24/21440
Svar frá Høgna Hoydal, landsstýrismanni, upp á § 52a-fyrispurning nr. 52-027/2024 frá
Sólvit E. Nolsø, løgtingsmanni, um almennar uppboðssølur á húsamarknaðinum
Spurningarnir vóru soljóðandi:
1. Hvør lóg skipar uppboðssølu av húsum í Føroyum?
2. Hvørjum reglum skulu húsasølufólk fylgja, og er nakað, sum sigur, at øll boð, sum
koma á ognir, skulu gerast almenn?
3. Ætlar landsstýrismaðurin at gera tað so, at afturlatnar uppboðssølur av ognum eisini
verður ein møguleiki?
Svarað verður undir einum:
Keyp og søla av fastogn er skipað við løgtingslóg nr. 136 frá 6. oktober 2011 um keyp og sølu
av fastogn o.a. Løgtingslógin er galdandi fyri vinnuligt útboð og sølu av fastogn, fyri vinnuliga
mekling í sambandi við keyp og sølu av fastogn og fyri aðra vinnuliga ráðgeving og tænastu í
sambandi við keyp og sølu av fastogn.
Løgtingslógin ásetur greitt, at einans ognarmeklarar, sum eru skrásettir sbrt. lógini, og
advokatar, sum hava rætt til at útinna advokatvirksemi eftir rættargangslógini, hava rætt til
vinnuliga at miðla fastogn. Hetta er ásett til tess at tryggja, at bæði keyparar og seljarar hava
hóskandi rættartrygd, tá talan er um at keypa og selja so stór virði – aloftast størsta íløgan, sum
privatfólk yvirhøvur gera.
Løgtingslóg um keyp og sølu av fastogn hevur nú verið í gildi í 13 ár, og hesa tíðina eru bæði
búskapur og bústaðarmarknaður broytt heilt nógv. Samstundis hava vit bæði ta avbjóðing, at
fólk tykjast setast aftur at seta búgv í Føroyum, og at tað er tungt at útvega sær egnan bústað, tí
kostnaðurin er vaksin so nógv.
Landsstýrið metir bústaðartrupulleikarnar sum eitt tað týdningarmesta málið at loysa og fer at
leggja fram uppskot til loysnir. Í hesum sambandi er tað viðkomandi at kanna, um løgtingslóg
um keyp og sølu av fastogn er partur av hesum trupulleika. Eg fari tí at taka stig til at eftirmeta
lóggávuna á økinum.
Verður komið eftir, at lógin er ein trupulleiki, fari eg at taka stig til at broyta hana.
Uttanríkis- og vinnumálaráðið, 23. september 2024
Høgni Hoydal
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Sólvit E. Nolsø, løgtingsmaður
Svarari: Høgni Hoydal, landsstýrismaður í uttanríkis- og vinnumálum
Evni: Uppboðssøla av húsum
Spurningar:
1. Hvør lóg skipar uppboðssølu av húsum í Føroyum?
2. Hvørjum reglum skulu húsasølufólk fylgja, og er nakað, sum sigur, at øll boð,
sum koma á ognir, skulu gerast almenn?
3. Ætlar landsstýrismaðurin at gera tað so, at afturlatnar uppboðssølur av ognum
eisini verður ein møguleiki?
Viðmerkingar:
Tað gerst alsamt torførari hjá fólki at útvega sær bústað í Føroyum. Fleiri hava víst á
tað sum eina høvuðsorsøk til, at fleiri nú aftur leita sær av landinum.
Trupulleikarnir á bústaðarmarknaðinum eru sjálvandi samansettir, og tað er eingin
einføld ella einsíðug loysn.
Eitt, ið vit áttu at hugt nærri at, eru almennu uppboðssølurnar á
bústaðarmarknaðinum.
Almennar uppboðssølur hava tað við sær, at fólk eru útsett fyri at spenna boðan meira
enn gott er, tí tey fleiri ferðir skulu taka støðu til nýggj boð, sum koma uppá húsini,
tey eru áhugað í. Almenn boð kunnu eisini hava við sær, at fólk, sum bjóða uppá eini
sethús, skulu í eina almenna kapping við fólk, sum hava nóg mikið av tiltakspeningi at
keypa frítíðarhús fyri.
Almennar uppboðssølur gera eisini, at hús, sum frammanundan eru dýr, ofta dýrka
meir enn helst gott er, tí eitt prískríggj stendst av støðuni.
Samanumtikið kann sigast, at húsamarknaðurin í Føroyum er fyrst og fremst til
fyrimunar fyri seljarar. Talan skal sjálvandi ikki verða um at avtaka marknaðin, men
heldur skumpa hann eitt sindur longri móti miðuni, so bæði keyparar og seljarar
kunnu kenna sæl væl til rættis á honum.
Á Løgtingi, 13. september 2024
Sólvit E. Nolsø

-- 1 of 1 --