52-023/2024

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
25. september 2024
Mál: 24/20708-3
(at tilskila í svari)
Tygara skriv: 52-023/2024
Svar til skrivligan fyrispurning nr. 52-023/2024 frá Erling Eidesgaard,
løgtingsmanni, settur landsstýrismanninum í fiskivinnu- og samferðslumálum,
Dennis Holm, um tunnilstoymið
Fyrispurningurin er soljóðandi:
1. Hvat hevur Dalstunnilin, ið tunnilstoymið hevur staðið fyri at bora, samlað, t.e.
íroknað eitt nú verkætlanarleiðslu, amboðs- og fíggjarkostnað, kostnað fyri
hvønn metur, áðrenn veg og installatiónir? T.e. fyri tað ráa holið,
arbeiðstryggjað við boltum og sproytubetongi?
2. Hvat hava, til samanberingar, tunlarnir Norður um Fjall, ið vórðu útbodnir í fríari
arbeiðstøku, og eru boraðir í umleið sama tíðarskeiði, samlað kostað fyri hvønn
metur av ráum holi, arbeiðstryggjað við boltum og sproytubetongi?
3. Um endamálið við tunnilstoyminum er at strekkja arbeiðið og harvið
útreiðslurnar av smærri tunlum yvir fleiri fíggjarlógir, ætlar landsstýrismaðurin so
at kanna, um tað ber til at bjóða arbeiðið út, har slíkur fíggingarleistur er ein
fortreyt í útboðnum?
Svar til spurning 1
Tunnilsliðið hjá Landsverki fór í november 2020 undir at gera eina nýggja farleið til
Dals, og tunnilin varð skotin ígjøgnum 9. november 2023. Sjálvt arbeiðið at bora
Dalstunnilin byrjaði tíðliga í 2021. Tunnilin er 2165 metrar langur, og tilhoyrandi
vegagerð er 300 metrar.
Samlaðu útreiðslurnar frá januar 2021 til september 2024 eru sambært Landsverki
umleið 88 mió. kr. Nakað er eftir at tryggja í tunlinum, ið er mett at kosta millum 1 og 2
mió. kr. Hinvegin eru útreiðslur við í teimum 88 mió. kr., ið ikki hoyra til sjálvt
tunnilsarbeiðið. Tað er vegarbeiðið á Skálavíkarvegnum og vegabreiðkan í Húsavík og
Dali uppá umleið 2,5 kilometrar. Tað er trupult at meta neyvt um kostnaðin av hesum,
tí fólk og maskinur hava verið brúkt bæði til tunnilsgerð og vegagerð, men mett verður,
at hetta hevur kostað í øllum førum 6 mió. kr.

-- 1 of 2 --

Fiskivinnu- og samferðslumálaráðið
2/2
Kostnaðurin fyri tunnilin er tí eini 84 mió. kr. (88 + 2 – 6 mió. kr.). Longdin á tunlinum
er 2.165 metrar, og tískil er kostnaðurin 84 mió. kr./2165 m = 38.800 kr. fyri meturin.
Í prísinum er eisini leigukostnaður fyri maskinur, sum svarar á leið til avskrivingar hjá
privatum fyritøkum.
Her skal leggjast afturat, at tað eru rættiliga nógvir privatir arbeiðstakarar, ið eru
undirveitarar á tunnilsarbeiðinum. Umleið ¾ av teimum 88 mió. kr. eru útgoldnar til
privatar veitarar av ymsum slag, til dømis til keyp av spreingievni, fyri koyring av gróti
og so framvegis.
Svar til spurning 2
Tunlarnir Norður um Fjall eru 4089 metrar samanlagt. Harumframt er vegagerð umleið
1,9 kilometrar.
Boriarbeiðið við tunlunum Norður um Fjall er liðugt, men uppgerðin um endaliga
kostnaðin millum Landsverk og arbeiðstakaran er ikki liðug. Tó hevur Landsverk gjørt
eina kostnaðarmeting av tunlinum, sum er umleið 205 mió. kr.
Við í hesum kostnaði er spreinging og tryggjan av tunlinum, byggipláss, fakeftirlit,
byggileiðsla og annað, umframt prísvøkstur í byggitíðini.
Kostnaðurin er tískil 205 mió. kr./4089 metrar = 50.136 kr. fyri hvønn metur.
Her skal tó leggjast afturat, at tunlarnir Norður um Fjall eru 1 metur breiðari enn
Dalstunnilin. Rúmdin á sprongda tunlinum er tí umleið 65 m3 fyri hvønn metur í
tunlunum Norður um Fjall í mun til umleið 61 m3 í Dalstunlinum.
Kostnaðarmetingarnar skulu takast við fyrivarni. Viðvíkjandi Dalstunlinum er ikki
beinleiðis skynað millum tunnilsgerð og vegagerð uttan fyri tunnilin. Viðvíkjandi
tunlunum Norður um Fjall er endaligi kostnaðurin ikki gjørdur upp.
Svar til spurning 3
Tá tunlar skulu byggjast verður verklagslóg gjørd, sum ásetur samlaða kostnaðin fyri
verkætlanina. Endamálið við verklagslógum er, at landsstýrismaðurin (Landsverk)
kann gera fíggjarliga bindandi avtalur yvir ár fyri alla verkætlanina.
Íløguætlan landsins ásetur árligu játtanina til tunnilsarbeiðið, sum arbeiðstakarin eisini
bindur seg til at halda í sáttmálum. Í prinsippinum skal tunnilsarbeiðið steðga, tá árliga
játtanin er brúkt, men eykajáttan verður at kalla altíð veitt, soleiðis at arbeiðið kann
halda fram uttan steðg. Játtanin verður framskundað.
Tað er bíligari fyri landskassan, verkætlanin verður skjótari liðug, og samfelagið fær
skjótari gagn av íløguni.
Dennis Holm
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Erling Eidesgaard, løgtingsmaður
Svarari: Dennis Holm, landsstýrismaður í fiskivinnu- og samferðslumálum
Evni: Tunnilstoymið
Spurningar:
1. Hvat hevur Dalstunnilin, ið tunnilstoymið hevur staðið fyri at bora, samlað, t.e. íroknað
eitt nú verkætlanarleiðslu, amboðs- og fíggjarkostnað, kostað fyri hvønn metur, áðrenn
veg og installatiónir? T.e. fyri tað ráa holið, arbeiðstryggjað við boltum og
sproytubetongi?
2. Hvat hava, til samanberingar, tunlarnir Norður um Fjall, ið vórðu útbodnir í fríari
arbeiðstøku, og eru boraðir í umleið sama tíðarskeiði, samlað kostað fyri hvønn metur av
ráum holi, arbeiðstryggjað við boltum og sproytubetongi?
3. Um endamálið við tunnilstoyminum er at strekkja arbeiðið og harvið útreiðslurnar av
smærri tunlum yvir fleiri fíggjarlógir, ætlar landsstýrismaðurin so at kanna, um tað ber til
at bjóða arbeiðið út, har slíkur fíggingarleistur er ein fortreyt í útboðnum?
Viðmerkingar:
Í tíðindaskrivi um ársskiftið rør Vinnuhúsið fram undir, at tunnilstoymið borar dýrari tunlar, enn
um tunlarnir verða bodnir út í fríari arbeiðstøku.
Er tað veruliga so, sum Vinnuhúsið heldur uppá, so høvdu vit sostatt kunnað borað hesar smærru
tunlar fyri lægri kostnað. Vit høvdu altso fingið fleiri metrar fyri somu pengar.
Ætlanin er, at tunnilstoymið í næstum skal fara undir at bora Tjørnuvíkartunnilin. Tí er
umráðandi at vita, um hetta veruliga er tann fíggjarliga skilabesti leisturin.
Tí verður spurt.
Á Løgtingi, 10. september 2024
Erling Eidesgaard

-- 1 of 1 --