52-003/2024

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
15. august 2024
Mál: 24/18176-2
Tygara skriv: 52-003/2024
Svar til skrivligan fyrispurning nr. 52-003/2024 frá Honnu Jensen, løgtingskvinnu,
settur landsstýrismanninum í fiskivinnu- og samferðslumálum, Dennis Holm, um
sølu av almennum bygningum
Fyrispurningurin er soljóðandi:
1. Hvussu gongur við arbeiðinum at fyrireika sølu av almennum bygningum?
2. Verður arbeitt við at skipa sølu av almennum bygningum á øðrvísi hátt og samskipa
átakið?
3. Hvussu nógvir bygningar, og hvussu nógvir fermetrar verða ætlandi seldir í 2024?
Svar til spurning 1
Landsverk varðar av landsins bygningum, sum eru umleið 200 í tali, og sum samanlagt
fevna um eini 260 túsund fermetrar. Fermetratalið økist støðugt, so hvørt nýggir bygningar
verða bygdir, til dømis til Sjúkrahúsverkið, til bústovnar innan almannamál og til
skúlaverkið. Eisini økist talið av leigumálum.
Landsverk metir um, hvørjar ognir kunnu seljast, og samskiftir javnan við stjórnarráð um
sølu av bygningum.
Nakrir fáir bygningar eru seldir, sum Landsverk varðar av. Tað eru vanliga bygningar, har
alment virksemi verður flutt úr gomlum bygningum og í nýggjar bygningar, og bygningar
og høli eru í ringum standi ella hava verið ónýtt í drúgva tíð. Tá verður mett rættast at selja.
Játtanin til at selja landsins bygningar er ein fíggjarlig heimild til at kunna selja, men ein
møgulig søla verður bert framd í semju millum Landsverk og avvarðandi landsstýrisfólk.
Ofta er ikki undirtøka fyri at selja, tá tað kemur til stykkis, tí hugskot eru frammi um at
brúka hølini til onnur endamál.
Havandi í huga, hvussu nógvar bygningar landið leigar, kundu bygningarnir verið brúktir til
annað virksemi hjá landinum heldur enn at selja, men tá er vanliga neyðugt at dagføra og

-- 1 of 2 --

Fiskivinnu- og samferðslumálaráðið
2/2
umbyggja slíkar bygningar, fyri at kunna hýsa nýggjum virksemi. Ov lítið verður játtað til at
viðlíkahalda og til at umvæla landsins bygningar, og eftirsleipið økist støðugt. Harafturat
hevur søla av almennum ognum við sær, at ongar útreiðslur vera av at røkja og viðlíkahalda
longur, og onnur kunnu fáa gagn av bygningunum.
Svar til spurning 2
Tað verður ikki arbeitt beinleiðis við at skipa sølu av almennum bygningum á øðrvísi hátt
enn nú.
Viðmerkjast skal, at Landsverk og Fiskivinnu- og samferðslumálaráðið samskifta um,
hvussu leigumál og bygningar kunnu fyrisitast skynsamari.
Svar til spurning 3
Tveir bygningar eru seldir í 2024. Hesir eru Oman Reyðhús nr. 4 og 6 í Klaksvík við eini
bruttogólvvídd á 168 fermetrar hvør.
Roknað verður ikki við, at fleiri bygningar verða seldir í ár.
Dennis Holm
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Hanna Jensen, løgtingskvinna
Svarari: Dennis Holm, landsstýrismaður í fiskivinnu- og samferðslumálum
Evni: Søla av almennum bygningum
Spurningar:
1. Hvussu gongur við arbeiðinum at fyrireika sølu av almennum bygningum?
2. Verður arbeitt við at skipa sølu av almennum bygningum á øðrvísi hátt og
samskipa átakið?
3. Hvussu nógvir bygningar, og hvussu nógvir fermetrar verða ætlandi seldir í
2024?
Viðmerkingar:
Landið eigur nógvar bygningar kring landið við nógvum týdningarmiklum virksemi.
Landið leigar seg eisini í fleiri førum inn í bygningar kring landið, og tað kunnu vera
góðar orsøkir til tess.
Undir fíggjarlógarviðgerðum kemur javnan fram, at fleiri av landsins bygningum tó
heilt víst kundu verið seldir. Tó er ein avbjóðing kanska, at hvørt landsstýrisfólk sær
ræður yvir bygningunum á sínum øki, og tað ger tað helst ikki lættari at hava eina
samskipaða kós fyri landsins bygningar. Hetta kann vera ein orsøk til, at tað virkar,
sum bygningar treyðugt verða seldir, hóast teir kanska falla í órøkt og ikki hýsa
virksemi av týdningi.
Tað er óivað tørvur á javnan at gera upp, um allir bygningar, sum landið eigur,
framvegis skulu vera landsins ogn. Vit vita, at viðlíkahald av almennum bygningum
er ein stór avbjóðing, har tørvur er á munandi játtan fyri at koma runt fyri at tryggja,
at landsins ognir eru í nøktandi standi.
Eisini er neyðugt at gera upp, í hvønn mun summir bygningar eiga at verða seldir, tí
privatpersónar, vinnan, feløg ella kommunur hava størri tørv á teimum til bústað ella
til sítt virksemi, og teir harvið kunnu gera størri gagn, samstundis sum fermetratalið,
sum landið skal halda viðlíka, minkar.
Hetta evni er lítið frammi, hóast týdningarmikið, og til fíggjarlógarviðgerðina í
desember 2023 skrivaði Fíggjarnevndin í sínum áliti: «Inntøkujáttanin verður hækkað
við 6 mió. kr. til at selja bygningar fyri, sum ikki er neyðugt at eiga.»
Av hesum orsøkum verða spurningarnir settir.
Á Løgtingi, 2. august 2024
Hanna Jensen

-- 1 of 1 --