52-140/2023

1 / 1
Uttanríkis- og vinnumálaráðið
Løgtingið Tórshavn, 2. juli 2024
Journal nr.: 24/16103
Svar upp á fyrispurning frá Eyðdis Hartmann Niclassen, løgtingskvinnu, um
laksaroyndir í føroyskum sjóøki, Høgna Hoydal (at svara skrivliga eftir TS § 52 a), nr.
52-140/2023
Fyrispurningur
1. Hevur landsstýrismaðurin sett í verk royndir, saman við Havstovuni, at fáa til vega
upplýsingar og vitan um laksin í føroyskum sjóøki?
2. Nær væntar landsstýrismaðurin at kanningar fara í gongd?
3. Kann landsstýrismaðurin meta um, nær eitt úrslit verður tøkt?
Spurningarnir verða svaraðir undir einum
Í svari til Johan Dahl, SS-012/2023, varð m.a. sagt, at av tí at villur laksur ikki er ein felags
stovnur, men heldur er laksur, sum stavar úr ymisku áunum, sum renna út í
Norðuratlantshavið, so kann verða torført at gera eina stovnsmeting. Vísandi til SS-012/2023
eru ikki ítøkiligar ætlanir um at fara undir tílíkt royndarvirksemi.
Hinvegin kann nevnast, at landsstýrismaðurin hevur boðið umboðum frá Føroya
Sílaveiðifelag at koma á fund at greiða frá verkætlan, sum er í umbúna. Verkætlanin hevur til
endamáls at endurreisa villlaksin í Føroyum.
Føroya Sílaveiðifelag arbeiðir fyri at skapa trivnaðarvirksemi í føroysku náttúruni og at
varðveita og nøra um føroysku sílini og villlaksin.
Uttanríkis- og vinnumálaráðið, tann 2. juli 2024
Høgni Hoydal
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Eyðdis Hartmann Niclasen, løgtingskvinna
Svarari: Høgni Hoydal, landsstýrismaður í uttanríkis- og vinnumálum
Evni: Laksaroyndir í føroyskum sjóøki
Spurningar:
1. Hevur landsstýrismaðurin sett í verk royndir, saman við Havstovuni, at fáa til
vega upplýsingar og vitan um laksin í føroyskum sjóøki?
2. Nær væntar landsstýrismaðurin at kanningar fara í gongd?
3. Kann landsstýrismaðurin meta um, nær eitt úrslit verður tøkt?
Viðmerkingar:
Herfyri var júst evnið um at gera laksaroyndir í føroyskum sjóøki til umrøðu í
Løgtinginum, og man var samdur um at slík vitan um laksin er bæði neyðug og
áhugaverd og hevði gjørt okkum betri før fyri at lagt til rættis fiskarí og atknýtt
vinnuligt virksemi.
Tí er endamálið við hesum fyrispurninginum at útvega meira vitan um, í hvønn mun
laksur er á landgrunninum, hvussu stórar nøgdirnar eru, og hvar hann møguliga heldur
mest til o.a.
At dyrgja eftir laksi við bátum er ein væl umtókt upplivingarvinna, sum er sera
inntøkugevandi í øðrum londum, sum fáast við hesa vinnu. Tí verður mett, at henda
vinnan kann gerast ein spennandi vinna fyri okkum sjálvi og somuleiðis gerast eitt
eyka bein hjá føroysku ferðavinnuni.
Málbólkurin av ferðafólkum, sum ferðast runt eftir laksafiskiskapi, rindar fegin fyri
slíka uppliving, og vit í Føroyum fáa ein serligan málbólk afturat, sum vil leiga bátar,
umframt hevur brúk fyri vanligum uppihaldi og nýtir okkara matstovuvirksemi,
ferðaseðlar og mangt annað.
Tað er nógv, sum bendir á, at stórir vinnumøguleikar eru innan laksafiskarí í
føroyskum sjóøki, og í hesum sambandi eiga nakrir kappingarførir vinnukarmar at
verða skaptir av politisku skipanini, grundaðir á holla vitan um laksin.
Tí verður hesin fyrispurningur settur.
Á Løgtingi, 21. juni 2024
Eyðdis Hartmann Niclasen

-- 1 of 1 --