52-138/2023

A L M A N N A – O G M E N T A M Á L A R Á Ð I Ð
M I N I S T R Y O F S O C I A L A F F A I R S A N D C U L T U R E
Løgtingið 27. juni 2024
Tinghúsvegur 1-3 Postboks 208 J.nr: 24/15875-5
110 Tórshavn Tygara skriv:
Viðgjørt: .
Nr. 52-138/2023
Svar upp á skrivligan fyrispurning nr. 52-138/2023 eftir tingskipanini § 52 a til Sirið
Stenberg, landsstýriskvinnu í almanna- og mentamálum, frá Elsebeth Mercedis
Gunnleygsdóttur, løgtingskvinnu, um Skálagarð
Fyrispurningurin er soljóðandi:
1. Hvørjar ætlanir hevur landstýriskvinnan við heiminum fyri seinheilaskadd,
Skálagarði, í Klaksvík?
2. Hvussu nógv búfólk eru á heiminum dags dato?
3. Hvussu nógv av hesum hava fingið fastan bústað á heiminum?
4. Hvussu nógv búgva har í eitt longri tíðarskeið?
5. Hvussu nógv koma á heimið til umlætting í eitt styttri tíðarskeið?
6. Er nakar bíðilisti at sleppa á heimið og í so fall, hvussu langur er bíðilistin?
Til nr. 1:
Ætlanirnar fyri Skálagarði, ið er heim fyri seinheilaskadd í Klaksvík eru tær somu, sum tá
Skálagarður lat upp fyri hálvum øðrum ári síðani, nevniliga at veita borgarum við
seinheilaskaða vardan bústað, fyribils bústað og umlætting.
Endamálið við vardum bústaði er at veita borgarum eitt heim, har viðkomandi kann liva eitt
sjálvstøðugt, innihaldsríkt og virkið lív. Í arbeiðinum verður m.a. dentur lagdur á
gerandisrehabilitering.
Endamálið við fyribils bústaði er m.a. við rehabilitering at menna persónligar og sosialar
førleikar hjá borgarum soleiðis, at borgarin kann megna at liva eitt so sjálvstøðugt lív sum
tilber.
Endamálið við umlætting er at veita heimabúgvandi borgarum og avvarðandi umlætting. Í
umlættingini er gerandisrehabilitering ein sjálvsagdur partur av tilboðnum.
Til nr. 2:
Í løtuni búgva 6 borgarar á Skálagarði
Eirargarður 2 • FO-100 Tórshavn
 (+298) 30 40 00 •  ammr@ammr.fo • www.ammr.fo

-- 1 of 2 --

A L M A N N A - O G M E N T A M Á L A R Á Ð I Ð
Til nr. 3:
Av teimum borgarum, sum búgva á Skálagarði, hava 4 borgarir fastan bústað.
Til nr. 4:
Fyribils bústaður kann veitast upp í hálvtannað ár. Og í løtuni hava tveir borgarar fyribils
búpláss á Skálagarði.
Til nr. 5:
Pláss er á Skálagarði at veita trimum borgarum umlætting. Í løtuni er eingin borgari í
umlætting, orsakað av manglandi starvsfólkaorku.
Til nr. 6:
Í løtuni eru tveir borgarar við seinheilaskaða á bíðilista til vardan bústað á Skálagarði,
harumframt er ein borgari á veg á bíðilista til avklárandi fyriskipan í fyribils bústaði.
Heimabúgvandi borgarar, ið tørva umlætting, eru ikki á bíðilistanum. Hesir borgarar koma til
umlætting eftir ávísari skipan, tó eisini eftir um starvsfólk eru at røkja uppgávuna.
Skálagarður hevur pláss fyri 15 borgarum. Áðrenn stovnurin lat upp, varð mett at hetta krevur
24 fulltíðarsett starvsfólk.
Tað er vanligt at nýggj tilboð verða sett í verk so líðandi, og er hetta eisini tongt at
møguleikanum at seta starvsfólk. Tað er eingin loyna, at tað er ein avbjóðing at útvega
nøktandi fakligheit – serliga á teimum økjum har kapping er um starvsfólk. Hetta sæst innan
flest allar geirar. At tað bert eru 6 fólk, sum fáa hjálp á Skálagarði, er sostatt tongt at
avbjóðingini at fáa skikkaði starvsfólk.
Tórshavn 27. juni 2024
Sirið Stenberg
landsstýriskvinna
Síða 2 av 2

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Elsebeth Mercedis Gunnleygsdóttur, løgtingskvinna
Svarari: Sirið Stenberg, landsstýriskvinna í almanna- og mentamálum
Evni: Skálagarður
Spurningar:
1. Hvørjar ætlanir hevur landstýriskvinnan við heiminum fyri seinheilaskadd,
Skálagarði, í Klaksvík?
2. Hvussu nógv búfólk eru á heiminum dags dato?
3. Hvussu nógv av hesum hava fingið fastan bústað á heiminum?
4. Hvussu nógv búgva har í eitt longri tíðarskeið?
5. Hvussu nógv koma á heimið til umlætting í eitt styttri tíðarskeið?
6. Er nakar bíðilisti at sleppa á heimið og í so fall, hvussu langur er bíðilistin?
Viðmerkingar:
Tað var ein stórur dagur, tá skjøtul bleiv settur á Skálagarð. Sjálv var eg
landsstýriskvinna tá, og var stjórin á almannaverkinum, Edvard Heen, ein eldsál fyri
at fáa Skálagarð til veruleika. Og enn størri dagur tá núverandi landsstýriskvinna,
Sirið Stenberg, opnaði heimið. Tí nú kundu fólk undir 67 ár við seinheilaskaða loksins
fáa tilboðið roknað júst til teirra tørv. Hetta sum tey so leingi høvdu bíðað eftir.
Vit minnast, áðrenn Skálagarður kom, hvussu mann dag og dagliga hoyrdi í
fjølmiðlunum, at tilboð til fólk við seinheilaskaða manglaði. Liðugt viðgjørdir
sjúklingar upptóku pláss á sjúkrahúsunum, tí tey høvdu ongastaðni at fara, tí onki
tilboð var til hesi. Ja, tørvurin var ovurhondsstórur.
Við Skálagarði lótu slóðbrótandi møguleikar seg upp, og lunnar vóru lagdir undir
depilin til fólk við seinheilaskaða. Men øll avbjóðingin kundi ikki loysast við
Skálagarði sæð í ljósinum av, at tað var brúk fyri enn fleiri bústøðum. Bíðilistin var so
ómetaliga langur, samstundis sum vit vita, at tað leggjast fleiri fólk afturat á hvørjum
ári, sum verða rakt av seinheilaskaða.
Tí er tað sera áhugavert at fáa at vita, hvussu gongur við Skálagarði, og um hann livir
upp til endamálið. Sum skilst standa enn fleiri íbúðir tómar. Tí síggi eg tað sum
alneyðugt og áhugavert at fáa at vita, hvussu støðan er við Skálagarði í dag, og um
ongin bíðilisti er meira.
Á Løgtingi, 20. juni 2024
Elsebeth Mercedis Gunnleygsdóttur

-- 1 of 1 --