52-131/2023

UMHVØRVISMÁLARÁÐIÐ
Gongin 7 • FO-100 Tórshavn
Tel. (+298) 35 87 00 • umhvorvi@umhvorvi.fo • www.umhvorvi.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann 21. juni 2024
J. nr.: 24/15068-2
Viðgjørt: HI
Tygara skriv: 52-131/2023
Svar upp á fyrispurning nr. 52-131/2023 eftir § 52a í tingskipanini til Ingilín D. Strøm,
landsstýriskvinnu, frá Helga Abrahamsen, løgtingsmanni, um kunngerð um burturkast
Spurningarnir vóru soljóðandi:
1. Nær verður nýggja kunngerðin um burturkast lýst?
2. Hví hevur arbeiðið tikið so langa tíð?
Svar:
Til. nr. 1
Væntandi verður kunngerðin lýst fyrst í oktobur 2024.
Til nr. 2
Ein høvuðstáttur í nýggju kunngerðini er, at land og kommunur saman skulu gera eina
landsætlan fyri burturkasti, og henni á baki eina kommunala ætlan fyri burturkasti. Ætlanirnar
skulu galda í 10 ár.
Sum upplýst í svarinum til tygara § 52a fyrispurning frá 29. novembur 2023, skuldi
kunngerðaruppskotið gjøgnumgangast og tillagast saman við IRF og KB, tá ið landsætlanin fyri
burturkast var gjørd liðug, og miðað varð eftir at fáa hetta arbeiðið gjørt liðugt í januar 2024.
Tað tók væl longri tíð enn væntað at fáa arbeiðið við landsætlanini so langt ávegis, at farast
kundi undir at dagføra kunngerðina soleiðis, at hon styðjar málunum um øktan ringbúskap í
landsætlanini.
Í arbeiðinum at dagføra kunngerðina varð m.a. avgjørt: at herða krøvini til móttøkustøðir við at
krevja, at tær skulu hava umstøður til at taka ímóti, goyma og á annan hátt handfara væl fleiri

-- 1 of 2 --

UMHVØRVISMÁLARÁÐIÐ
2/2
burturkastsbólkar enn ætlanin var upprunaliga, at áseta nýggj krøv um kunning um, hvussu
kommunurnar fíggja burturkastsøkið, at herða krøvini til handfaring av byggiburturkasti og at
herða krøvini til skráseting av burturkasti hjá bæði vinnu og kommunum.
Orsakað av at talan var um týðandi broytingar í kunngerðini var mett, at rættast var at senda hana
út í nýggja hoyring.
Kunngerðaruppskotið verður væntandi sent í hoyring í næstu viku, og ummælisfreistin verður
30. august 2024.
Orsøkin til ta longu ummælisfreistina er, at IRF hevur sent Umhvørvismálaráðnum umbøn um,
um tey kunnu viðgera kunngerðaruppskotið eftir summarferiuna.
Ingilín D. Strøm
landsstýriskvinna

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Helgi Abrahamsen, løgtingsmaður
Svarari: Ingilín D. Strøm, landsstýriskvinna í umhvørvismálum
Evni: Kunngerðin um burturkast
Spurningar:
1. Nær verður nýggja kunngerðin um burturkast lýst?
2. Hví hevur arbeiðið tikið so langa tíð?
Viðmerkingar:
Verandi kunngerð um burturkast er frá 1995, og ongar broytingar eru gjørdar í henni
síðani 2007. Hugburðurin viðvíkjandi burturkasti er nógv broyttur, síðani galdandi
kunngerð varð lýst.
Í februar 2020 bað undirritaði, sum tá var landsstýrismaður á økinum,
Umhvørvisstovuna um at gera eina nýggja kunngerð um burturkast. Tey fingu freist
til 1. juni sama ár, tá arbeiðið skuldi vera liðugt.
Arbeiðið dró út, men fyri skjótt trimum árum síðani skrivaði Dimmalætting, at
arbeiðið var um at vera liðugt, og at og bara nakrir tekniskir smálutir vóru eftir at
gera, áðrenn uppskotið kundi latast landsstýrismanninum.
Í svari uppá fyrispurning frá undirritaða í desember 2023 segði landsstýriskvinnan, at
hon miðaði eftir, at arbeiðið við kunngerðini bleiv liðugt í januar 2024, og hon
væntaði, at kunngerðin bleiv lýst í februar 2024.
Men framvegis er kunngerðin ikki lýst. Tí verður hesum fyrispurningurin settur.
Á Løgtingi, 11. juni 2024
Helgi Abrahamsen
løgtingsmaður

-- 1 of 1 --