52-116/2023

1 / 1
Uttanríkis- og vinnumálaráðið
Løgtingið Tórshavn, 2. mai 2024
Journal nr.: 24/10232
Svar upp á fyrispurning frá Bjarna Hammer, løgtingsmanni, um bót til alifyritøku,
settur landsstýrismanninum í uttanríkis- og vinnumálum, Høgna Hoydal (at svara
skrivliga eftir TS § 52 a), nr. 52-116/2023
Fyrispurningur
1. Nær kann væntast at frætta um bótina til alifyritøkuna Bakkafrost?
2. Hví er málið ikki avgreitt?
3. Tá bótin verður goldin, fer hon so í landskassan ella í danska statskassan?
Svar
Spurningur nr. 1 og nr. 2
Spurningur nr. 1 og nr. 2 verða svaraðir undir einum.
Heilsufrøðiliga starvsstovan, ið er stovnur undir Uttanríkis- og vinnumálaráðnum, hevur
viðgjørt og tikið støðu í málinum. Málið varð sent fútanum til støðutakan á vári í 2022.
Sum áður er upplýst Løgtinginum, so er tað fútin, ið hevur málsræði á málinum, tá málið er
fráboðað fútanum. Eftir tað er Heilsufrøðiliga starvsstovan einans við til at upplýsa málið.
Sum skilst verður arbeitt við málinum.
Spurningur nr. 3
Um ikki serstøk avtala er gjørd, fara inntøkur frá sektum í danska statskassan, sí § 52a
fyrispurning og svar í løgtingsmáli 52-108/2023. Sum løgmaður upplýsir í svarinum, so
verður arbeitt við einum øðrvísi býti av sektum millum ríkiskassan og landskassan.
Uttanríkis- og vinnumálaráðið, tann 2. mai 2024
Høgni Hoydal
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Bjarni Hammer, løgtingsmaður
Svarari: Høgni Hoydal, landsstýrismaður í uttanríkis- og vinnumálum
Evni: Um bótina til alifyritøku
Spurningar:
1. Nær kann væntast at frætta um bótina til alifyritøkuna Bakkafrost?
2. Hví er málið ikki avgreitt?
3. Tá bótin verður goldin, fer hon so í landskassan ella danska statskassan?
Viðmerkingar:
Hvar endaði rokningin til Bakkafrost?
Tað var í desember í 2021, at Kringvarpið visti at siga, at Heilsufrøðiliga starvsstovan hevði latið
fútanum mál um at áseta revsing og bót á 67 mió. kr. móti alifyritøkuni Bakkafrost.
Síðani tykist einki vera hent í hesum álvarsliga máli.
Í sjónvarpsinnslagnum var stjórin á Heilsufrøðiligu starvsstovuni annars ivaleysur. Bakkafrost hevði
afturvendandi brotið flutnings- og rakstrarkunngerðina og átti at fáa hóskandi revsing. Eisini fútin
helt málið verða so álvarsligt og av so stórum samfelagsligum áhuga, at hann ringdi til
løgmansstjóran og “kunnaði” um málið.
Nú løgmaður í farnu viku kundi boða frá, at arbeitt verður við at fáa bøtur, sum í dag enda í danska
statskassanum, í landskassan, so reisur spurningurin seg aftur um bótina, sum Bakkafrost skuldi
gjalda.
Hvar liggur málið? Hví er ikki meira hent í málinum? Hvar endar bótin - í landskassanum ella í
danska statskassanum?
Á Løgtingi, 18. apríl 2024
Bjarni Hammer

-- 1 of 1 --