52-108/2023

L Ø G M A N S S K R I V S T O V A N
P r i m e M i n i s t e r ´ s O f f i c e
Tinganes - Fo-100 Tórshavn – Faroes
Tel: (+298)306000 – e-mail: info@tinganes.fo - www.lms.fo
Løgtingið
Svar
uppá
skrivligan fyrispurning nr. 108/2023 eftir tingskipanini § 52a til Aksel V. Johannesen, løgmann,
frá Jørgen Niclasen, løgtingsmanni, um pengar úr landskassanum í statskassan
Fyrispurningurin var soljóðandi:
1. 	Ætlar landsstýrið at taka upp samráðingar við donsku stjórnina um, at bøtur í Føroyum skulu í
landskassan, heldur enn statskassan?
2. 	Um so er, hvørjar bøtur vil landsstýrið royna at tryggja landskassanum?
Svar:
Til spurning 1
Eg eri samdur við spyrjaranum í, at tá talan er um bøtur á yvirtiknum málsøkjum, so eiga hesar sjálvsagt
at fella til landskassan. Tí tók eg longu málið upp við danska forsætisráðharran, á fundi í Keypmannahavn,
tann 2. oktober í fjør, har eg kom við eini áheitan um, at samráðingar verða tiknar upp um eitt øðrvísi
býti av sektum millum ríkiskassan og landskassan. Á fundinum varð avtalað, at Løgmálaráðið og danska
Justitsministeriet skuldu umrøða hesi viðurskifti nærri. Málið hevur drigið nakað út, tí at man frá danskari
síðu ikki var greiður um, hvørt tað var Justitsministeriet ella Finansministeriet, ið varaði av málinum. Hesi
ivamál eru nú avgreidd, og Løgmálaráðið hevur upplýst, at samráðingarnar verða væntandi tiknar upp við
Justitsministeriet í næstum.
Til spurning 2
Sum spyrjarin ger vart við í viðmerkingunum til fyrispurningin, verða útreiðslurnar fyri eftirlit á
yvirtiknum málsøkjum hildnar av landskassanum. Tað eru sostatt føroyskir myndugleikar, sum kanna og
fyrireika hesi málini. Tí haldi eg at tað er sjálvsagt, at vit finna eitt framtíðar býti, har sektir fyri brot á
lóggávu á yvirtiknum málsøkjum fella til landskassan, meðan sektir fyri brot á lóggávu á felags málsøkjum
fella til ríkiskassan.
Í Tinganesi, 4. apríl 2024
Aksel V. Johannesen
løgmaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Jørgen Niclasen, løgtingsmaður
Svarari: Aksel V. Johannesen, løgmaður
Evni: Pengar úr landskassanum í statskassan
Spurningar:
1. Ætlar landsstýrið at taka upp samráðingar við donsku stjórnina um, at bøtur í
Føroyum skulu í landskassan, heldur enn statskassan?
2. Um so er, hvørjar bøtur vil landsstýrið royna at tryggja landskassanum?
Viðmerkingar:
Herfyri gjørdu Kappingareftirlitið og Føroya Tele semju um eina bót til Føroya Tele.
Peningurin frá slíkari bót fer í danska statskassan. Føroya Tele er alment partafelag, og
bótin minkar tí um vinningsbýtið til landsskassan. Sostatt ber til at siga, at ein almennur
myndugleiki og eitt alment partafelag gera avtalu um at taka pening úr føroyska
landskassanum at koyra í danska statskassan.
Í síni tíð gjørdi landsstýrið avtalu við donsku stjórnina um, at bøtur fyri brot á
fiskivinnulóggávuna skuldu rindast í landskassan. Tað varð mett rímiligt, tí eftirlitið var
rindað av landskassanum. Peningur fyri allar aðrar bøtur enda í danska statskassanum.
Spurningurin er, um bótin ikki eigur at fara í landskassan, tá landskassin rindar fyri
eftirlitið, sum landskassin til dømis ger, tá Heilsufrøðiliga starvsstovan og
Kappingareftirlitið geva bøtur, og um tað ikki hevði verið rætt og rímiligt, at allar bøtur
í Føroyum verða rindaðar í landskassan.
Tí verður hesum spurningur settur landsstýrinum.
Á Løgtingi, 26. mars 2024
Jørgen Niclasen

-- 1 of 1 --