52-086/2023

Dagf. 20. februar 2024
HMR j. nr. 24/03360-5
Margit Stórá
landsstýriskvinna
Svar
upp á
Fyrispurning nr. 52-086/2023 eftir § 52 a í tingskipanini viðvíkjandi dialysuviðgerð á
Suðuroyar Sjúkrahúsi, frá Erhardi Joensen, løgtingsmanni.
Spurningarnir vóru soljóðandi:
1. Hví er ætlaða dialysuviðgerðin á Suðuroyar Sjúkrahúsi ikki enn sett í verk?
2. Nær ítøkiliga verður skipanin/ dialysuviðgerðin sett í verk?
3. Hvørjar eru orsakirnar til, at skipanin enn ikki er sett í verk?
Svar:
Til spurning 1 og 3
Tað eru samansettar orsøkir til, at dialysuviðgerðin á Suðuroyar Sjúkrahúsi ikki er sett í verk enn.
Fýra sjúkrarøktarfrøðingar eru settir í starv at manna dialysusatelittin í Suðuroy. Teir hava fingið
upplæring í Aalborg og á Landssjúkrahúsinum, men fyri at teir skulu kunna arbeiða sjálvstøðugt er
neyðugt, at teir fyrstu tíðina arbeiða saman við royndum dialysusjúkrarøktarfrøðingum.
Ætlanin var, at royndir sjúkrarøktarfrøðingar frá dialysueindini á Landssjúkrahúsinum, skuldu vera
til staðar á Suðuroyar Sjúkrahúsi ta fyrstu tíðina. Av tí, at hetta ikki er partur av setanartreytunum
hjá royndu dialysusjúkrarøktarfrøðingunum, sum eru settir á Landssjúkrahúsinum, kann
sjúkrahúsleiðslan ikki áleggja teimum at fara til Suðuroyar sum partur av starvinum, men leiðslan
kann heita á sjúkrarøktarfrøðingarnar um at gera tað. Sjúkrarøktarfrøðingarnir hava fingu bjóðað
samsýning, sambært sáttmálanum millum Fíggjarmálaráðið og Felagið Føroyskir
Sjúkrarøktarfrøðingar, fyri at fara til Suðuroyar. Samskifti er millum sjúkrahúsleiðsluna og
sjúkrarøktarfrøðingarnar í løtuni, men enn er ikki endalig niðurstøða hesum viðvíkjandi.
Eisini hevur sjúkrahúsleiðslan kannað møguleikan, at fáa dialysusjúkrarøktarfrøðing gjøgnum
útlendska vikarstovu. Vikarstovur er áhugaðar, men sjúkrahúsleiðslan ynskir fyrst at fáa at vita, um

-- 1 of 2 --

tað ikki kann finnast ein loysn, har tað eru royndir dialysusjúkrarøktarfrøðingar frá
Landssjúkrahúsinum, sum fyrstu tíðina kunnu fara til Suðuroy.
Í mun til læknafakligu ábyrgdina er týdningarmikið at fáa tryggja, at bráðfeingis tilbúgvingin fyri
hæmodialysuna á Suðuroyar Sjúkrahúsi er nøktandi í mun til sjúklingatrygdina. Sjúkrahúsverkið er
í tøttum samskifti við danska Heilsustýrið, fyri at fáa hetta váttað, og vænta at fáa svar hesum
viðvíkjandi í hesi vikuni.
Til spurning 2
Sambært Sjúkrahúsverkinum ber enn ikki til at siga ítøkiliga, nær dialysuviðgerðin byrjar á
Suðuroyar Sjúkrahúsi, tí tað hongur neyvt saman við viðurskiftunum, ið eru nevnd í svarinum
omanfyri. Sum sjúkrahúsleiðslan alment hevur boðað frá verður væntað, at skipanin kann verða sett
í verk innanfyri nakrar dagar, meðan tað í ringasta fall kunnu ganga nakrar vikur.
Heilsumálaráðið, 20. februar 2024
Margit Stórá
landsstýriskvinna

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Erhard Joensen, løgtingsmaður
Svarari: Margit Stórá, landsstýriskvinna í heilsumálum
Evni: Dialysuviðgerð á Suðuroyar Sjúkrahúsi
Spurningar:
1. Hví er ætlaða dialysuviðgerðin á Suðuroyar Sjúkrahúsi ikki enn sett í verk?
2. Nær ítøkiliga verður skipanin/ dialysuviðgerðin sett í verk?
3. Hvørjar eru orsakirnar til, at skipanin enn ikki er sett í verk?
Viðmerkingar:
Løgtingið hevur í fleiri umførum játtað pening til dialysuviðgerð á Suðuroyar
Sjúkrahúsi, bæði í 2022, 2023 og 2024 - alt við tí endamáli at fyrireika og seta í verk
skipanina.
Gjørdir eru nýggir fasilitetir og íløgur í bestu útgerðina til dialysuviðgerð - útgerð í
serklassa.
Harafturat kann upplýsast, at 3 sjúkrarøktarfrøðingar hava fingið upplæring í at brúka
tólini og kunna fremja viðgerðina - tær gjørdust lidnar við upplæringina hálvan
desember 2023. Hóast hetta er dialysuviðgerðin enn ikki byrjað.
Tað er heilt greitt Løgtingsins vilji, at skipanin skal setast í verk á Suðuroyar
Sjúkrahúsi, og tí er tað sera óheppið, at tað dregur út at seta hana í verk. Tí verður
hesin fyrispurningur settur.
Á Løgtingi, 8. februar 2024
Erhard Joensen

-- 1 of 1 --