52-050/2023

1 / 2
Uttanríkis- og vinnumálaráðið
Løgtingið Tórshavn, 05. desember 2023
Journal nr.: 23/23697
Svar upp á § 52a- fyrispurning nr. 52-050/2023 frá Eiriki í Jákupsstovu, løgtingsmanni,
um bygningin hjá Sjóvinnustýrinum
Spurningarnir vóru soljóðandi
1. Hvat kostar bygningurin hjá Sjóvinnustýrinum, nú hann er liðugur?
2. Hvør er fermetrakostnaðurin á bygninginum alt íroknað uttan ognan av lendi, nú hann
er liðugur?
3. Hvussu er fíggjarliga býtið millum handverkaraútreiðslur, ráðgeving, ognan av lendi
og annað?
4. Hvussu var byggingin skipað?
5. Hvussu er mann nøgdur við úrslitið, nú bygningurin er liðugur?
6. Hvørjar orsakir metir mann vera til, at byggingin hevur gingið, sum hon hevur?
Svar
Spurningur nr. 1
Byggiroknskapurin er ikki endaligur enn, men alt bendir á, at kostnaðurin verður innanfyri
tær 30 mió. kr., sum verklagslógin ásetur.
Spurningur nr. 2
Fyribils, av tí at byggiroknskapurin ikki er endaligur enn, kann upplýsast, at
fermeturkostnaðurin er 37.736 kr/m2.
Spurningur nr. 3
• Handverkaraútreiðslur 23.779.651 kr.
• Eyka avtalur/veitingar og prísvøkstur í sambandi við handverkaraútreiðslur 3.978.872
kr.
• Ráðgeving 1.680.378 kr.
• Ognan av lendi 0 kr. – Føroya landsstýri gjørdi gerðabýti við Vága kommunu, har
kommunan yvirtók eitt fyrrverandi grótbrot, sum landið átti, og landið yvirtók
grundøkið, har bygningurin er staðsettur.
• Annað 561.099 kr.

-- 1 of 2 --

2 / 2
Spurningur nr. 4
Bygningurin varð boðin út sum heildararbeiðstøka, sum merkir, at tað er arbeiðstakarin, sum
skipar og samskipar arbeiðið, ger avtalur og hevur samskifti við undirveitarar. Arbeiðið varð
skipað við føstum byggileiðara á staðnum.
Stýrisbólkurin/bygginevndin hittist mánaðarliga á byggiplássinum við umboðum frá
arbeiðstakara (Sp/f Búsetur), ráðnum (UVMR), byggiharra (Landsverk) og brúkara
(Sjóvinnustýrið).
Landsverk hevði dagliga samskiftið við byggileiðaran. Einki eksternt fakeftirlit var.
Spurningur nr. 5
Vit eru sum heild væl nøgd og fegin um verkætlanina.
Spurningur nr. 6
Tað eru fleiri viðurskifti, sum skulu samvirka, fyri at ein bygging er væleydnað. Áðrenn
verkætlanin varð boðin út, vórðu tørvurin hjá Sjóvinnustýrinum og byggiskráin væl allýst.
Sostatt var útgangsstøðið fyri verkætlanini greitt frá byrjan.
Eftir at útboðsvinnari varð funnin og farið varð undir byggingina, hevur dentur verið lagdur á
at halda seg til tilboðið og byggiskránna, tað vil siga at ikki gera broytingar.
Ein viðvirkandi faktorur, sum eisini er týdningarmikil, er, at tað í byggitíðarskeiðinum hevur
verið regluligt samskifti millum byggiharra og arbeiðstakara umframt uppfylging frá
stýrisbólkinum.
Uttanríkis- og vinnumálaráðið, tann 05. desember 2023
Høgni Hoydal
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eirikur í Jákupsstovu, løgtingsmaður
Svarari: Høgni Hoydal, landsstýrismaður í uttanríkis- og vinnumálum
Evni: Bygningurin hjá Sjóvinnustýrinum
Spurningar:
1. Hvat kostar bygningurin hjá Sjóvinnustýrinum, nú hann er liðugur?
2. Hvør er fermetrakostnaðurin á bygninginum alt íroknað uttan ognan av lendi,
nú hann er liðugur?
3. Hvussu er fíggjarliga býtið millum handverkaraútreiðslur, ráðgeving, ognan av
lendi og annað?
4. Hvussu var byggingin skipað?
5. Hvussu er mann nøgdur við úrslitið, nú bygningurin er liðugur?
6. Hvørjar orsakir metir mann vera til, at byggingin hevur gingið, sum hon
hevur?
Viðmerkingar:
Í 2021 samtykti Løgtingið, at upp til 30 mió. kr. kundu brúkast til umsitingarbygning í
Miðvági til Sjóvinnustýrið.
Fyri nøkrum døgum síðan varð lykilin til bygningin handaður Sjóvinnustýrinum, og tí
hevði verið áhugavert at vitað, hvussu hendan verkætlanin hevur gingið – eisini
havandi í huga avbjóðingarnar, sum í fleiri førum hava verið í samband við bygging
av almennum bygningum seinastu árini.
Á Løgtingi, 23. november 2023
Eirikur í Jákupsstovu

-- 1 of 1 --