52-045/2023

B A R N A - O G Ú T B Ú G V I N G A R M Á L A R Á Ð I Ð
J. H. Schrøtersgøta 7 • FO-100 Tórshavn • Tel: +298 306500 • bumr@bumr.fo
Løgtingið 30. november 2023
Tinghúsvegur 1-3 Mál: 22/22133-52
100 Tórshavn Viðgjørt: JáR
Svar
upp á
§ 52a fyrispurning nr. 52-045/2023 frá Biritu Matras Petersen, løgtingskvinnu, um ókeypis
alment ferðasamband til lesandi og næmingar alt árið, settur Djóna Nolsøe Joensen,
landsstýrismanni í barna- og útbúgvingarmálum.
Fyrispurningurin er soljóðandi:
1. Hevur landsstýrismaðurin ætlanir um at tryggja lesandi og næmingum bíligari ella ókeypis
alment ferðasamband alt árið?
2. Hvørjar eykaútreiðslur fær landið, um skúlakortið er virkið alt árið?
Svar
Til 1: Verandi skipan virkar eftir avtalu millum Studna og Strandferðsluna. Sambært hesi skipan
kunnu lesandi og næmingar ferðast aftur og fram í skúla ókeypis einaferð um dagin uttan mun til
fjarstøðu frá skúlanum. Skúlakortið kann brúkast í 11 mánaðir, men ikki 1 mánað, tá summarfrítíðin
er. Eingin ítøkilig ætlan fyriliggur í løtuni um at broyta hetta.
Til 2: Sambært tølum frá Studna vildi meirkostnaðurin verið slakar 400 tkr. pr. ár, um skipanin var
virkin í 12 mánaðar.
Vinarliga
Barna- og útbúgvingarmálaráðið
Djóni Nolsøe Joensen
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Birita Matras Petersen, løgtingskvinna
Svarari: Djóni Nolsøe Joensen, landsstýrismaður í barna- og undirvísingarmálum
Evni: Ókeypis alment ferðasamband til lesandi og næmingar alt árið
Spurningar:
1. Hevur landsstýriskvinnan ætlanir um at tryggja lesandi og næmingum bíligari ella
ókeypis alment ferðasamband alt árið?
2. Hvørjar eykaútreiðslur fær landið, um skúlakortið er virkið alt árið?
Viðmerkingar:
Einasti ferðastudningurin, ið lesandi og næmingar fáa, er eitt ókeypis skúlakort, ið gevur
teimum møguleika at ferðast millum bústaðin og útbúgvingarstaðið í mesta lagi eina ferð um
dagin. Lesandi og næmingar, ið fáa lestrarstuðul, umframt næmingar á Húsarhaldsskúlanum,
á háskúlum, eftirskúlum og skiftisnæmingar hava rætt til eitt skúlakort.
Við galdandi reglum er skúlakortið ikki virkið í summarfrítíðini. Studningurin til livikostnað
til lesandi á hægri útbúgvingum og styttri vinnuførleikagevandi útbúgvingum er 4.960 kr. um
mánaðin, meðan studningurin til miðnámsskúlanæmingar er 2.113 kr. ella 4.387 kr.. Tí er ofta
neyðugt við arbeiði við síðuna av lesnaðinum og skúlanum. Summarfrítíðin er upplagda
høvið at samla sær nøkur oyru til komandi lestrarhálvuna ella skúlagongdina. Havandi í huga,
at studningurin er lutfalsliga lágur, er hugsandi, at fleiri ikki hava ráð til ein bil at brúka í
summarfrítíðini til at ferðast til eitt nú arbeiði og annað virksemi í summarfrítíðini.
Eitt bíligari ella ókeypis alment ferðasamband til lesandi og næmingar alt árið hevði javnsett
lesandi og næmingar í útjaðaranum við onnur, ið eru búsitandi í miðstaðarøkinum. Harafturat
hevði hetta eggjað ungum til at brúka umhvørvisvinarligari ferðamøguleikar alt árið.
Á Løgtingi, 14. november 2023
Birita Matras Petersen

-- 1 of 1 --