52-041/2023

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 10. november 2023
J. nr.: 23/21500
Svar til skrivligan fyrispurning nr. 52-041/2023 frá Eiriki í Jákupsstovu, løgtingsmanni,
settur landsstýriskvinnuni í fíggjarmálum, Ruth Vang, um vinnubilar í privatari nýtslu.
Fyrispurningurin er soljóðandi:
1. Hvørjar tankar ger landsstýriskvinnan sær um skipanina, sum er fyri privata nýtslu av
vinnubilum í Føroyum samanborið við okkara grannalond?
2. Hvørjar tankar ger landsstýriskvinnan sær um, at tað í Føroyum eru fleiri akfør enn fólk
yvir 18 ár?
3. Í hvønn mun er landsstýriskvinnan sinnað at gera nýtsluna av vinnuakførum til privata
nýtslu nakað meira smidliga, enn hon er í dag?
Svar:
Til nr. 1
Fríir ágóðar, undir hesum privat nýtsla av arbeiðsbili, eru fíggjarligar sømdir, sum arbeiðstakari fær
frá arbeiðsgevara aftur at lønini. Slíkir ágóðar verða sum meginregla skattaðir. Undantak verður tó
gjørt, tá ið talan bara er um smávegis privata nýtslu. Hetta er eitt sokallað bagatelmark, sum tekur
atlit at, at tann, sum nýtir arbeiðsbil, til dømis ikki skal nýta óneyðuga tíð og orku til at seta
arbeiðsbilin frá sær fyri at nýta egnan bil til at avgreiða egin ørindi, sum eru á arbeiðsrutuni.
Okkara grannalond hava somu meginreglu um, hvat verður roknað sum skattskyldugir ágóðar.
Ymiskt er tó, hvar bagatelmarkið verður sett. Í flestu av grannalondunum eru eisini krøv um, at
firmabilar skulu vera týðuliga frámerktir sum firmabilar. Fíggjarmálaráðið hevur ikki gjørt nakra
neyva greining av reglunum í øðrum londum. Leggjast kann aftrat, at í 2014 varð ásett, at skattur
verður ikki rindaður av fríari telefon.
Eitt týðandi atlit er, at vóru fríir ágóðar skattafríir, hevði verið lætt hjá arbeiðsgevarum at lønt
starvsfólkum við tílíkum ágóðum, sum so hevði verið at rokna sum skattafrí løn hjá
starvsfólkunum. Hetta hevði máað støðið undan skattagrundarlagnum og gjørt tilvildarligan mun á
løntakarum alt eftir, hvør nýtir arbeiðsbil ella annað, sum kann vera privatur ágóði.
Endamálið við bagatelmarkinum er, at umsitingin skal standa mát við tað, sum fæst burturúr, og at
hon ikki verður óneyðuga tung og dýr. Í umsitingini av hesum reglum verður miðað eftir eini
javnvág, har eftirlitið ikki kennist óneyðuga smáligt, og hinvegin, at órímiligur munur ikki verður á
skatting av inntøku, alt eftir, hvussu hon verður útgoldin. Bagatelmarkið er ásett at vera koyring,
sum eru styttri enn 200 metrar frá arbeiðsrutuni.

-- 1 of 2 --

F Í G G J A R M Á L A RÁ Ð I Ð
Ministry of Finance
2/2
Eg meti, at galdandi reglur hava eina skilagóða og rímiliga javnvág, har hildið verður fast við, at øll
lønarinntøka sum meginregla verður skattað eins, uttan mun til, hvussu hon verður útgoldin.
Samstundis verður atlit tikið at, at smávegis privat ørindi, sum liggja í rímiligari frástøðu til ta leið,
sum kortini verður nýtt í arbeiðskoyring, ikki verður skattað.
Víst verður eisini til hesa heimasíðuna hjá TAKS, har til ber at lesa um skipanina við fríum
ágóðum í Føroyum: https://www.taks.fo/fo/borgari/yvirlit-yvir-sjalvuppgavuna-2022/friir-
agodar#Fr%C3%ADur%20bilur.
Til nr. 2
Skrásettu akførini fevna bæði um persónbilar, lastbilar, prutl, motorsúkklur, viðfestivognar,
vøruvognar, ellisakfør, kampingvognar, neyðsendarakfør, pylsuvognar, traktorar o.s.fr. Høga talið
av akførum eru fyrst og fremst eitt tekin um stóra búskaparliga framgongd síðstu um 25 árini og
ein livihátt, har flytføri og frælsi at kunna koyra hagar ein vil og tá ein vil, verður raðfest høgt av tí
einstaka.
Fíggjarmálaráðið metir ikki, at galdandi reglur um skatting av fríum ágóðum hevur nakað samband
við samlaða talið av akførum í samfelagnum. Havast skal í huga, at skattingin av fríum bili er
lagaligari enn samlaði kostnaðurin av at eiga ein bil privat. Tí er ikki orsøk at halda, at handhevjan
av verandi reglum í sær sjálvum fer at økja talið av akførum tilsamans.
Til nr. 3
Fíggjarmálaráðið og TAKS eftirmeta javnan ymiskar skipanir á skatta- og avgjaldsøkinum, undir
hesum skipanina við fríum ágóðum. Higartil hevur ikki verið mett, at tørvur er á stórum ella
grundleggjandi broytingum í skipanini. Tó eri eg sinnað at gera tillagingar í skipanini í næstum og í
samráði við TAKS, um mett verður, at verandi reglur ikki eru nóg smidligar.
Tinganes, 10. november 2023
Ruth Vang
Landsstýriskvinna í fíggjarmálum

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eirikur í Jákupsstovu, løgtingsmaður
Svarari: Ruth Vang, landsstýriskvinna í fíggjarmálum
Evni: Vinnubilar í privatari nýtslu
Spurningar:
1. Hvørjar tankar ger landsstýriskvinnan sær um skipanina, sum er fyri privata
nýtslu av vinnubilum í Føroyum samanborið við okkara grannalond?
2. Hvørjar tankar ger landsstýriskvinnan sær um, at tað í Føroyum eru fleiri akfør
enn fólk yvir 18 ár?
3. Í hvønn mun er landsstýriskvinnan sinnað at gera nýtsluna av vinnuakførum til
privata nýtslu nakað meira smidliga, enn hon er í dag?
Viðmerkingar:
Nú er tíðin aftur komin, at TAKS fer á fótbóltsvøllir, møtir, ruskpláss og í barnagarðar
at kanna, um onkur hevur gloymt, at tey hava ein vinnubil, sum ikki kann nýtast til
nakra privata nýtslu.
TAKS ger hesi eftirlitini og hevur sera greitt boðað frá, at nú fara hesi eftirlitini at
verða gjørd.
Støðan í Føroyum í dag er, at tað eru fleiri akfør enn koyrikort í landinum. Tað eru
enntá fleiri akfør, enn tað eru persónar yvir 18 ár.
Hetta hevur við sær, at nógvir bilar verða seldir, men spurningurin er, um tað er
neyðugt at hava so nógvar bilar í okkara landi, tá vit hugsa um grøna orkuskiftið, og at
størsti parturin av hesum bilunum standa stillir størsta partin av tíðini.
Í øðrum londum eru skipanir, sum hava við sær, at vinnubilar í ein ávísan mun kunnu
nýtast til privata nýtslu, fyri eitt gjald, sum er munandi lægri enn at keypa ein eyka
bil, men gevur meining í sambandi við, at bilarnir sum vinnuakfør eru slopnir undan
gjøldum. Sum skilst er skipanin í Føroyum soleiðis, at skal eitt vinnuakfar nýtast til
privata nýtslu, so ber ikki til at gera tað partvíst ella fyri ávís tíðarskeið, men fult og
heilt.
Tí hesir spurningar, um landsstýriskvinnan er sinnað at kanna loysnirnar, sum eru í
samfeløgum líknandi okkara, og um tað kundi givið meining at verið eitt sindur meira
smidligur í Føroyum.

-- 1 of 2 --

Á Løgtingi, 31. oktober 2023
Eirikur í Jákupsstovu

-- 2 of 2 --