52-039/2023

A L M A N N A – O G M E N T A M Á L A R Á Ð I Ð
M I N I S T R Y O F S O C I A L A F F A I R S A N D C U L T U R E
Eirargarður 2 • FO-100 Tórshavn
 (+298) 30 40 00 •  ammr@ammr.fo • www.ammr.fo
Løgtingið
Tinghúsvegur 1 – 3
100 Tórshavn
3. november 2023
Mál: 23/20994-5
Tygara skriv:
Viðgjørt: HP
Nr. 52-039/2023
Svar upp á skrivligan fyrispurning nr. 52-039/2023 eftir tingskipanini §52a til Sirið Stenberg,
landsstýriskvinnu í almanna- og mentamálum, frá Súsonnu Bertholdsen, løgtingskvinnu, um
hjálp til fíggjarliga sperd húski.
Fyrispurningurin ljóðar soleiðis:
Spurningar:
1. Hvussu nógv húski fingu familju- og hjálparískoyti í sambandi við inflatiónshjálpina,
sum Løgtingið samtykti fyrr í ár?
2. Hvørjum loysnum arbeiðir landsstýrið við fyri at lætta um hjá fíggjarliga sperdum
húskjum?
3. Er ætlanin at gera nakað við stóra bráðfeingis tørvin á fíggjarligari hjálp í løtuni?
Svar:
Til spurning nr. 1
Tað eru 675 húski, sum higartil hava fingið játtað hjálparískoyti, sum er 12.000 kr. Onkur
einstøk umsókn er ikki endaliga avgreidd enn.
Hjálparpakkin, sum Løgtingið samtykti fyrr í ár, ávirkar ikki talið av teimum, sum hava rætt til
familjuískoyti. Men øll, sum hava rætt til familjuískoyti, fáa 750 kr. meira fyri hvørt barnið í
eitt tíðarskeið. Tað eru stívliga 300 familjur, sum hvønn mánað fáa familjuískoyti, og øll hesi
fáa sostatt ágóða av hjálparpakkanum, sum enn er galdandi.
Til nr. 2 og 3
Landsstýrið arbeiðir við fleiri málum, sum skulu bøta um fíggjarligu umstøðurnar lágløntum.
Hækkaða familjuískoyti verður galdandi inn til ársenda. Í januar 2024 kemur ætlandi ein
skattaumlegging í gildi, sum fer at hava við sær, at lág og miðallønt fara at fáa hægri tøka
inntøku. Samstundis verður arbeitt við sonevnda lønarlyftinum, sum eisini fer at hava við sær
betri fíggjarligt rásarúm til tey, ið eru fevnd av lønarlyftinum.
Kunngerð um javningarprosent fyri almannaveitingar fyri 2024 er júst kunngjørd, og verður
javningarprosentið fyri 2024 sostatt 3,8 prosent. Allar almannaveitingar hækka sostatt komandi
ár – t.d. hækkar árliga fólkapensjónin saman við saman við samhaldsfasta við umleið 6 til 7.000
kr. komandi ár.

-- 1 of 2 --

A L M A N N A - O G M E N T A M Á L A R Á Ð I Ð
Síða 2 av 2
Ein partur av arbeiðnum at bøta um fíggjarliga rásarúmi hjá familjum liggur uttanfyri mítt
málsræði, sum landsstýriskvinna í almannamálum. Tað er m.a. bústaða-, útbúgvingar, -
arbeiðsmarknaðar- og skattapolitikkur, ið eru týðandi amboð, sum skulu stuðla undir, at
familjur hava nøktandi fíggjarligar umstøður og flyta seg úr einari sosialari støðu í aðra. Eg
haldi kortini, at eg vegna samgonguna kann siga, at vit allatíðina meta um støðuna og vita, at
tað orsakað av høgu prísunum er trupult hjá nógvum familjum. Tí mugu vit støðugt taka upp til
politiska viðgerð, um og hvørji átøk kunnu gerast neyðug fyri at tryggja tey, sum hava minst at
liva av.
Tórshavn 3. november 2023
Sirið Stenberg
landsstýriskvinna

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Súsanna Bertholdsen, løgtingskvinna
Svarari: Sirið Stenberg, landsstýriskvinnu í almanna- og mentamálum
Evni: Hjálp til fíggjarliga sperd húski
Spurningar:
1. Hvussu nógv húski fingu familju- og hjálparískoyti í sambandi við inflatiónshjálpina, sum
Løgtingið samtykti fyrr í ár?
2. Hvørjum loysnum arbeiðir landsstýrið við fyri at lætta um hjá fíggjarliga sperdum húskjum?
3. Er ætlanin at gera nakað við stóra bráðfeingis tørvin á fíggjarligari hjálp í løtuni?
Rentur, húsaleiga og matvøruprísir eru ógvuliga nógv hækkað og hetta merkist allastaðni. Tað
sansar veruliga at og neyðugt er at handla skjótt, so fólk kunnu fáa ein lætta í ár. Veturin og jólini
stunda til, og nógvar familjur vita ikki síni livandi ráð.
Tað er ikki dagur, at onkur ikki rópar neyðarróp í sosialu miðlunum, tí tey ikki vita síni livandi ráð.
Bankakontan er á minus, mánaðurin er bert komin í helvt, og tey eiga ikki pening fyri mat. Tey
biðja alment um hjálp í vón um, at onkur forbarmar seg yvir tey og rættir eina hjálpandi hond.
Hjálparfelagsskapir hoyra hvønn dag frá fólki, sum ikki eiga fyri mat, og støðan er hættislig.
Fyrr í ár samtykti Løgtingið ein hjálparpakka, har øll húski – bæði barnafamiljur, fólkapensjónistar
og onnur – kundu søkja um eingangsstuðul á 12.000 kr sum hjálparískoyti. Harumframt hækkaði
familjuískoytið við 750 kr. um mánaðin fyri hvørt barnið í tíðarskeiðinum frá juni og restina av
2023. Kortini mugu vit staðfesta, at tørvur framvegis er á hjálp til fíggjarliga sperd húski.
Á Løgtingi, 24. oktober 2023
Súsanna Bertholdsen

-- 1 of 1 --