52-036/2023

LØGMÁLARÁÐIÐ
M I N I S T R Y O F J U S T I C E
Gongin 7 • Postrúm 377 • FO-110 Tórshavn
 (+298) 35 80 80 •  lmr@lmr.fo • www.lmr.fo
Løgtingið
Tinghúsvegur 1-3
Postrúm 208
110 Tórshavn
Tórshavn, tann: 25. oktober 2023
J. nr.: 23/20492-2
Svar
upp á
fyrispurning nr. 52-036/2023 eftir § 52 a í tingskipanini um heimild hjá kommununum at
taka tænastugjald, frá Sólvit E. Nolsøe, løgtingsmanni
Spurningurin var soljóðandi:
1. Nær fáa kommunur heimild at taka tænastugjald fyri veitingar til summarhús?
Svar:
Í samgonguskjalinum frá 22. desember 2022 stendur m.a., at heimild verður latin kommunum at
taka hóskandi gjald fyri tænastuveitingar til húsaeigarar, sum ikki búgva í kommununi.
Sum víst verður á í sambandi við fyrispurningin omanfyri, eru lutfalsliga nógv hús í summum
kommunum, serliga í smærru kommununum, sum verða brúkt sum summarhús. Av tí at eigararnir
ikki búgva í kommununi, og tí ikki rinda kommunuskatt til kommununa, rinda teir einki fyri
kommunalar tænastur so sum vatnveiting og kloakk. Kommunurnar hava, sum nú er, ikki heimild
at taka gjald fyri hesar tænastur. Fyri fleiri kommunur er hetta ein lutfalsliga stór útreiðsla, serliga
fyri tær kommunur, har fleiri slík hús eru.
Uppgávan at útvega kommununum neyðugu heimildirnar til at krevja tænastugjøld fyri
kommunalar veitingar til húsaeigarar, sum ikki búgva í kommununi, hevur høga raðfesting. Eg fari
tí í næstum undir fyrireikandi arbeiði at útvega kommununum tær neyðugu heimildirnar til hetta.

-- 1 of 2 --

LØGMÁLARÁÐIÐ
M I N I S T R Y O F J U S T I C E
2/2
Í summum førum hava kommunurnar longu heimildir at taka gjald fyri ávísar tænastur, sum
kommunurnar veita húsaeigarum, og harvið eisini til húsaeigarum, sum ikki búgva í kommununi.
Til dømis heimilar § 8 í kunngerð nr. 186 frá 5. november 1993 um spillvatnsevju, sum broytt við
kunngerð nr. 90 frá 28. september 2007, kommunustýrum at áseta eitt gjald fyri tøming og
burturbeining av spillvatnsevju.
Eisini heimilar § 16 í kunngerð nr. 147 frá 19. oktober 1995 um burturkast, sum broytt við
kunngerð nr. 90 frá 28. september 2007, kommunustýrum at áseta eitt gjald, eftir góðkenning frá
Føroya Landsstýri, fyri goymslu, handfaring og viðgerð av burturkasti. Hetta verður mett at snúgva
seg um eyka burturkast á bingjuplássum.
Í fyrsta umfari fari eg tí at bjóða umboð fyri kommunurnar á fund fyri at nágreina, hvørjum
ítøkiligum heimildum tørvur er á, soleiðis at greiða kann fáast á, hvussu víðari skal farast fram í
lógararbeiðinum at útvega kommununum neyðugar heimildir til at taka tænastugjøld fyri
kommunalar veitingar til húsaeigarar, sum ikki búgva í kommununi. Lógaruppskot viðvíkjandi
hesum verður væntandi lagt fram í Løgtinginum í vár.
Løgmálaráðið, tann 25. oktober 2023
Bjarni K. Petersen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Sólvit E. Nolsø, løgtingsmaður
Svarari: Bjarni Kárason Petersen, landsstýrismaður í lógarmálum
Evni: Heimild hjá kommunum at taka tænastugjald
Spurningur:
1. Nær fáa kommunur heimild at taka tænastugjald fyri veitingar til summarhús?
Viðmerkingar:
Samgongan hevur sett sær fyri at geva kommunum heimild at taka eitt tænastugjald fyri
veitingar til hús, tá húsaeigarin ikki býr í kommununi, og í samgonguskjalinum stendur
m.a. soleiðis:
Heimild verður latin kommunum at taka hóskandi gjald fyri tænastuveitingar til
húsaeigarar, sum ikki búgva í kommununi, og at áseta bústaðarskyldu í sambandi
við nýggjar kommunalar byggiætlanir.
Í fleiri kommunum, serliga í nógvum av teimum smærri kommununum, eru nógv hús,
har eigarin ikki býr í kommununi. Nógv hús verða brúkt sum summarhús og verða brúkt
lutfalsliga nógv, meðan onnur standa tóm stóran part av árinum.
Felags fyri øll hesi hús er, at tey fáa kommunalar tænastur so sum vatnveiting og kloakk,
men heimild hjá kommunum er ikki at taka eitt gjald fyri tað.
Fastbúgvandi rinda kommunuskatt og harvið fyri tær tænastur tey fáa, men tey, ið brúka
hús sum summarhús, rinda ikki fyri tænastur, sum tey fáa. Fyri nógvar kommunur er
hetta ein lutfalsliga stór útreiðsla, serliga í teimum kommunum, har fleiri súmmarhús
eru.
Summar kommunur hava av sínum eintingum sett eitt tænastugjald á summarhús, men
hava onga heimild at krevja pengarnar inn. Tí er tað tilvildin, sum ræður á økinum, og
greiða má fáast á lógarheimildunum.
Á Løgtingi, 17. oktober 2023
Sólvit E. Nolsø

-- 1 of 1 --