52-023/2023

A L M A N N A – O G M E N T A M Á L A R Á Ð I Ð
M I N I S T R Y O F S O C I A L A F F A I R S A N D C U L T U R E
Eirargarður 2 • FO-100 Tórshavn
 (+298) 30 40 00 •  ammr@ammr.fo • www.ammr.fo
Løgtingið
Tinghúsvegur 1 – 3
100 Tórshavn
20. september 2023
Mál: 23/18223-5
Tygara skriv:
Viðgjørt: HP
Nr. 52-023/2023
Svar upp á skrivligan fyrispurning nr. 52-023/2023 eftir tingskipanini §52a til Sirið Stenberg,
landsstýriskvinnu í almanna- og mentamálum, frá Liljan Weihe, løgtingskvinnu, um
hjálparískoyti og hækkað familjuískoyti í 2023
Fyrispurningurin ljóðar soleiðis:
Spurningar:
1. Hvussu nógv húski hava fingið hjálparískoyti sambært løgtingslóg um familjuískoyti?
2. Hvussu nógv av hesum eru húski við einum vaksnum og hvussu nógv húski hava fleiri
vaksin?
3. Hvussu nógv húski hava fingið oljuískoyti sambært løgtingslóg um familjuískoyti?
4. Hvussu nógv húski fáa ágóðan av, at familjuískoytið er hækkað í løtuni?
Svar:
1. Hvussu nógv húski hava fingið hjálparískoyti sambært løgtingslóg um familjuískoyti?
Tað eru 668 húski, ið higartil hava móttikið hjálparískoyti, sambært løgtingslóg um
familjuískoyti. Harumframt eru umleið 10 umsóknir, sum ikki eru liðugt viðgjørdar.
2. Hvussu nógv av hesum eru húski við einum vaksnum og hvussu nógv húski hava fleiri
vaksin?
Fyri at svara spurninginum er neyðugt at fáa uttanhýsis kt-veitaran hjá Almannaverkinum
at gera nakrar broytingar ella at kanna málini manuelt. Hetta hevur ikki eydnast áðrenn
freistina.
3. Hvussu nógv húski hava fingið oljuískoyti sambært løgtingslóg um familjuískoyti?
Tað eru 415 húski, ið hava móttikið oljuískoyti, sambært løgtingslóg um familjuískoyti.
4. Hvussu nógv húski fáa ágóðan av, at familjuískoytið er hækkað í løtuni?
Í mun til oljuískoyti og hjálparískoyti, so er rætturin til familjuískoyti ikki knýttur at
húskishugtakinum. Ein stakur uppihaldari, sum t.d. býr hjá egnum foreldrum, ella ein stakur
uppihaldari, sum eisini hevur vaksin heimabúgvandi børn, er í sambandi við rættin til
familjuískoyti at rokna sum stakur. Hinvegin hevur parlagsstøða týdning fyri, hvussu
familjuískoytið verður roknað.

-- 1 of 2 --

A L M A N N A - O G M E N T A M Á L A R Á Ð I Ð
Síða 2 av 2
Broytingin í løgtingslógini um familjuískoyti hevur við sær, at veitingin hjá øllum
móttakarum hækkar, og harvið fáa øll, sum eru í skipanini ágóðan av hækkingini. Talið av
móttakarum broytist eitt sindur frá mánað til mánað. Síðani broytingin kom í gildi hava 316
familjur móttikið familjuískoyti og hava harvið fingið ágóða av hækkingini. Av teimum 316
eru 268 støk og 48 samlivandi pør.
Tórshavn, 20. september 2023
Sirið Stenberg
landsstýriskvinna

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Liljan Weihe, løgtingskvinna
Svarari: Sirið Stenberg, landsstýriskvinna í almanna- og mentamálum
Evni: Hjálparískoyti og hækkað familjuískoyti í 2023
Spurningar:
1. Hvussu nógv húski hava fingið hjálparískoyti sambært løgtingslóg um
familjuískoyti?
2. Hvussu nógv av hesum eru húski við einum vaksnum og hvussu nógv húski
hava fleiri vaksin?
3. Hvussu nógv húski hava fingið oljuískoyti sambært løgtingslóg um
familjuískoyti?
4. Hvussu nógv húski fáa ágóðan av, at familjuískoytið er hækkað í løtuni?
Viðmerkingar:
Eitt tað fyrsta, samgongan tók stig til eftir valið í fjør, var at lætta um gerandisdagin
hjá fíggjarliga sperdum familjum. Familjum, sum vóru illa raktar av ógvusligu
príshækkingunum seinastu tíðina.
Ein eingangsupphædd á 12.000 kr. skuldi latast húskjum við lágari inntøku og ongum
ognum av týdningi. Harafturat bleiv familjuískoytið hækkað við 750 kr. um mánaðin
frá 1. juni til 31. desember 2023, soleiðis at barnafamiljur eisini fáa ein eyka
fíggjarligan styrk.
Hjálparpakkin varð einmælt samtyktur 22. mars í ár. Freistin at søkja um
hjálparískoyti var 30. juni 2023. Tí hesar spurningar.
Á Løgtingi, 11. september 2023
Liljan Weihe

-- 1 of 1 --