52-020/2023

Dagf. 19. september 2023
HMR j. nr. 23/17911
Margit Stórá
landsstýriskvinna
Svar
upp á
Fyrispurning nr. 52-020/2023 eftir § 52 a í tingskipanini viðvíkjandi vaktarskipanini hjá
portørunum á Suðuroyar sjúkrahúsi, frá Erhard Joensen, løgtingsmanni
Spurningarnir vóru soljóðandi:
1. Ætlar landsstýriskvinnan at gera broytingar í vaktarskipanini hjá portørunum á Suðuroyar
sjúkrahúsi, soleiðis at arbeiðstíðin hjá portørunum verður meira í samsvari við ætlanirnar hjá
landsstýrinum at stytta arbeiðstíðina hjá starvsfólki sum heild?
2. Ætlar landsstýriskvinnan at seta pening av á komandi fíggjarlóg til uppnormering av
økinum, soleiðis at portørarnir kunnu hava 12 tíma vaktarskipan?
3. Metir landsstýriskvinnan, at núverandi vaktarskipan er í samsvari við ætlanirnar um at stytta
arbeiðsvikuna?
4. Metir landsstýriskvinnan, at verandi skipan er í samsvari við lógina um arbeiðsumhvørvi?
Svar:
Til spurning 1 og 2
Sum støðan er í dag, arbeiða portørarnir á Suðuroyar sjúkrahúsi í skiftum, har teir aðru hvørja viku
hava tríggjar ferðir 24 tíma vaktir og aðruhvørja viku fýra ferðir 24 tíma vaktir. Hetta merkir
samstundis, at teir aðruhvørja viku hava frí, ávikavist 3 ferðir í 24 tímar og 4 ferðir í 24 tímar.
Vaktin er skipað soleiðis, at teir fyrst hava átta tímar arbeiðsvakt og síðani hava tilkallivakt í 16
tímar.
Sjúkrahúsverkið hevur ætlanir um at gera broytingar í vaktarskipanina, men enn er ongin endalig
avgerð tikin hesum viðvíkjandi.

-- 1 of 2 --

Til spurning 3
Tað er torført at samanbera arbeiðsvikur hjá starvsfólki, sum til dømis hava eina vanliga
arbeiðsviku við 40 tímum, við eina arbeiðsviku hjá starvsfólki, ið hava eina samansetta arbeiðsviku
við ávikavist arbeiðsvaktum og tilkallivaktum. Hóast hetta metir landsstýriskvinnan at politiska
málið, um at fáa stytt arbeiðsvikuna, eisini eigur at verða galdandi fyri tey starvsfólk, sum arbeiða í
ymiskum vaktarskipanum.
Til spurning 4
Sambært arbeiðsumhvørvislógini er tað altíð arbeiðsgevarin – í hesum føri Suðuroyar sjúkrahús – ið
hevur evstu ábyrgd av at tryggja, at lógin um arbeiðsumhvørvi verður hildin.
Landsstýriskvinnan hevur ikki kunnleika til, at lógin ikki verður hildin.
Heilsumálaráðið, 19. september 2023
Margit Stórá
landsstýriskvinna

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Erhard Joensen, løgtingsmaður
Svarari: Margit Stórá, landsstýriskvinna í heilsumálum
Evni: Viðvíkjandi vaktarskipanini hjá portørunum á Suðuroyar sjúkrahúsi
Spurningar:
1. Ætlar landsstýriskvinnan at gera broytingar í vaktarskipanini hjá portørunum á
Suðuroyar sjúkrahúsi, soleiðis at arbeiðstíðin hjá portørunum verður meira í
samsvari við ætlanirnar hjá landsstýrinum at stytta arbeiðstíðina hjá starvsfólki
sum heild?
2. Ætlar landsstýriskvinnan at seta pening av á komandi fíggjarlóg til
uppnormering av økinum, soleiðis at portørarnir kunnu hava 12 tíma
vaktarskipan?
3. Metir landsstýriskvinnan, at núverandi vaktarskipan er í samsvari við
ætlanirnar um at stytta arbeiðsvikuna?
4. Metir landsstýriskvinnan, at verandi skipan er í samsvari við lógina um
arbeiðumhvørvi?
Viðmerkingar:
Fyri at kunna geva sjúklinginum eina fyrsta floks viðgerð, er tað av sera stórum
týdningi, at starvsfólkið, ið verður sent út til kritiskar støður, er væl fyri; í hesum
førinum merkir væl fyri, úthvíld.
Eisini kann responstíðin verða avgerandi fyri støðuna hjá sjúklinginum. Um starvsfólk
sova heima í tilkallitíðini, í mun til, um tey eru stødd á sjúkrahúsinum, er responstíðin
einar 3-5 minuttir longri.
Tað er eisini væl kent ímillum tey, sum arbeiða undir slíkari skipan við tilkallivakt, at
svøvnurin er sera ótryggur og svøvngóðskan er vánalig. Hetta kann føra við sær, at
einkulta starvsfólkið kennir seg troytt/ stressað.
Samgongan arbeiðir í løtuni við at stytta arbeiðsvikuna niður í 37 tímar m.a. fyri at
tryggja trivnaðin hjá familjuni.
Tað er ikki óvanligt, at ein portørur á Suðuroyar sjúkrahúsi arbeiðir í 55 tímar í eini 4
daga vakt. Tað hendir, at starvsfólk arbeiða upp ímóti 20 tímum um samdøgrið. Hetta
merkir sjálvsagt, at hvíldin hevur verið sera óstøðug og ikki nøktandi.
Arbeiðsumhvørvið hjá heilsustarvsfólki er týdningarmikið, bæði fyri starvsfólkið
sjálvt, men sanniliga eisini fyri góðskuna á tí arbeiði, vit áleggja teimun.
Tí verður hesin spurningur settur.
Á Løgtingi, 7. september 2023
Erhard Joensen

-- 1 of 1 --