52-001/2023

LØGMÁLARÁÐIÐ
M I N I S T R Y O F J U S T I C E
Gongin 7 • Box 64 • FO-110 Tórshavn
 (+298) 35 80 80 •  lmr@lmr.fo • www.lmr.fo
Løgtingið
Tinghúsvegur 1-3 Postboks 208
110 Tórshavn
Tórshavn, tann: 9. august 2023
J. nr.: 23/15653-2
Viðgjørt: JAK
52-001/2023
Svar
uppá
skrivligan fyrispurning nr. 52-001/2023 eftir tingskipanini § 52 a til Bjarna Kárason
Petersen, landsstýrismann í lógarmálum, frá Honnu Jensen, løgtingskvinnu, um
útoyggjamál
Fyrispurningurin er soljóðandi:
1. Hvørjar ábøtur eru sambært landsstýrismanninum tær mest átrokandi fyri kor og
trivnað á útoyggj í Føroyum?
2. Hvussu ætlar landsstýrismaðurin at raðfesta útoyggjamál í arbeiðinum hjá
landsstýrinum?
3. Nær verður nýtt álit um menningarætlan fyri útoyggjar gjørt?

-- 1 of 2 --

LØGMÁLARÁÐIÐ
M I N I S T R Y O F J U S T I C E
2/2
Svar
Til nr. 1
Yvirskipað eri eg av teirri fatan, at eitt trygt og regluligt ferðasamband er sjálvt grundarlagið undir
møguleikanum fyri at kunna liva á útoyggj í Føroyum. Fyri meg hevur tað tí alstóran týdning, at
vit skjótast gjørligt fáa sett gongd á arbeiðið við at endurnýggja strandfaraskipini. Tí fegnist eg
eisini um, at tað á fíggjarlógini fyri 2023 eru settar 3 mió. kr. av til at gera kanningar og
fyrireikingar í sambandi við eina ætlaða endurnýggjan av skipunum.
Til nr. 2
Samgongan hevur sett sær fyri at styrkja møguleikarnar hjá útoyggjum at mennast. Ein fyritreyt
fyri hesum er, at tað verður gjørt eitt nýtt útoyggjaálit við eini greiðari menningarætlan fyri
smáplássini. Sum landsstýrismaður í útjaðaramálum havi eg yvirskipaðu ábyrgdina av nýggja
útoyggjaálitinum, og tað er fyrst og fremst hetta, eg fari at hugsavna meg um og raðfesta komandi
árini.
Farið verður undir nýggja útoyggjaálitið innan stutta tíð, men eg kann í løtuni ikki siga nakað um,
nær arbeiðið verður liðugt.
Til nr. 3
Sí svarið til nr. 2.
Bjarni Kárason Petersen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Hanna Jensen, løgtingskvinna
Svarari: Bjarni K. Petersen, landsstýrismaður í lógarmálum
Evni: Útoyggjamál
Spurningar:
1. Hvørjar ábøtur eru sambært landsstýrismanninum tær mest átrokandi fyri kor
og trivnað á útoyggj í Føroyum?
2. Hvussu ætlar landsstýrismaðurin at raðfesta útoyggjamál í arbeiðinum hjá
landsstýrinum?
3. Nær verður nýtt álit um menningarætlan fyri útoyggjar gjørt?
Viðmerkingar:
Samgongan hevur í samgonguskjalinum sett sær nøkur mál fyri útoyggjar, og í
fíggjarlógini fyri 2023 eru m.a. tveir tættir innan samferðslu og ferðavinnu raðfestir: at
fyrireika eina endurnýggjan av strandferðsluskipunum og at byggja eina farstøð á
Syðradali í Kalsoynni.
Orðingarnar í samgonguskjalinum snúgva seg um menningarmøguleikar, um búseting,
samferðslu, trivnað og nýtt útoyggjaálit. Útoyggjafelagið hevur á seinastu
aðalfundunum eftirlýst fleiri ítøkilig og alneyðug átøk, sum gagna útoyggjunum, og í
seinasta tíðindaskrivi teirra vórðu tey sett upp í 5 punkt:
• At skapa møguleika fyri búseting, við at útstykkja, við at byggja leiguíbúðir og
veita sethúsafígging.
• At skipa eina samferðslu, har trygdin, tænastan og títtleikin livir upp til nútíðar
standardar.
• Tryggja betri karmar fyri jarðarbrúki og væl skipaðari ferðavinnu.
• At tryggja lokalt fólkaræði, grundað á lokala luttøku og fíggjarorku.
• At skapa sosiala trygd og veita tænastur, ið ger, at borgararnir fáa virkað og
kunnu trívast í lokalsamfelagnum alt árið.
Útoyggjarnar eru sera týdningarmikil partur av ferðavinnuni í Føroyum og eiga m.a. tí
at fáa hægri raðfesting sum slíkar. Tær eru eins týdningarmiklar fyri Føroyar og
føroyingar sum heild sum bústaður, sum landbúnaðar- og vinnuøki, sum landafrøði,
náttúruppliving, mentanararvur, skúlaferðamál og meira.
Tí verða hesir spurningar settir.

-- 1 of 2 --

Á Løgtingi, 1. august 2023
Hanna Jensen

-- 2 of 2 --